អតីតកងកម្លាំងប្រដាប់អាវុធ ឬនិវត្តជនជិត ៤០នាក់ ស្ថិតក្នុងចំណោមនិវត្តជនច្រើនទៀត ចង់ឲ្យរដ្ឋាភិបាលពន្លឿនសកម្មភាពបែងចែកដីសម្បទានសង្គមកិច្ច និងផ្ទះ ដែលគ្រោងផ្ដល់ជូនពួកគាត់ មានទីតាំងក្នុងខេត្តព្រះសីហនុ ឲ្យបានឆាប់ ព្រោះនិវត្តជនខ្លះមានវ័យជរា និងមានជំងឺរ៉ៃរ៉ៃប្រចាំកាយធ្ងន់ធ្ងរ។
បញ្ហានេះ ក្រុមមន្ត្រីអង្គការសង្គមស៊ីវិល ក៏បានស្នើដល់ប្រមុខរដ្ឋាភិបាល ឬស្ថាប័នពាក់ព័ន្ធ ត្រូវពន្លឿនបែងចែកដីសម្បទានសង្គមកិច្ចជូនពួកគាត់ ដើម្បីកុំឲ្យពួកគាត់បាត់បង់ជំនឿទៅលើការដឹកនាំរបស់រាជរដ្ឋាភិបាល។
អតីតកងកម្លាំងប្រដាប់អាវុធចូលនិវត្តន៍ ឬនិវត្តជនឆ្នាំ២០០៩ ចំនួន ៣៧នាក់ ស្ថិតក្នុងចំណោមនិវត្តជនច្រើនទៀតនៅទូទាំងប្រទេស កំពុងទន្ទឹងរង់ចាំរដ្ឋាភិបាល ឬស្ថាប័នពាក់ព័ន្ធ បែងចែកដីសម្បទានសង្គមកិច្ច ឬលំនៅឋានជូនពួកគាត់ដោយអន្ទះសា ព្រោះបច្ចុប្បន្ននេះមាននិវត្តជនខ្លះដែលត្រូវទទួលបានដីសម្បទានសង្គមកិច្ច និងផ្ទះ មានទីតាំងក្នុងខេត្តព្រះសីហនុ បានបាត់ដំណឹងសូន្យឈឹង។
ផ្តើមពីបញ្ហានេះ អតីតមន្ត្រីនគរបាលក្រសួងមហាផ្ទៃ ឬនិវត្តជន គឺលោកវរសេនីយ៍ត្រី ឌិន តុង ដែលអះអាងជាតំណាងឲ្យនិវត្តជនចំនួន ៣៧នាក់ មានប្រសាសន៍នៅថ្ងៃពុធ ទី២០ ខែឧសភា ថា និវត្តជនពួកគាត់ទាំង ៣៧នាក់ នៅមិនទាន់ទទួលបានដីសម្បទានសង្គមកិច្ច និងផ្ទះ ដែលរដ្ឋាភិបាលត្រូវផ្ដល់ជូននោះទេ។ លោកថា គិតមកដល់ពេលនេះ មានរយៈពេលចន្លោះពី ៦ ទៅ ៧ឆ្នាំទៅហើយ ហើយក៏មាននិវត្តជនមួយចំនួនមានជំងឺប្រចាំកាយធ្ងន់ធ្ងរ។
តំណាងនិវត្តជន លោក ឌិន តុង បានសំណូមដល់លោកនាយករដ្ឋមន្ត្រី ហ៊ុន សែន ជួយអន្តរាគមន៍ទៅក្រសួង ឬស្ថាប័នពាក់ព័ន្ធ ឲ្យពន្លឿនបែងចែកដីសម្បទានសង្គមកិច្ច និងផ្ទះជូននិវត្តជនពួកគាត់ឲ្យបានឆាប់ ព្រោះបច្ចុប្បន្ននេះជីវភាពគ្រួសារកំពុងជួបប្រទះការខ្វះខាត៖ «កាលពីអាណត្តិលោក ស្បោង សារ៉ាត់ នៅជាអភិបាលខេត្តព្រះសីហនុ ខ្ញុំបានទៅសួរនាំគាត់ម្ដងរួចហើយ លើបញ្ហាផ្ដល់ដីសម្បទានសង្គមកិច្ច និងផ្ទះជូននិវត្តជនពួកខ្ញុំនាដើមឆ្នាំ២០១៤ ដែលត្រូវផ្ដល់ជូននៅតំបន់អូរត្រជាក់ចិត្ត ប៉ុន្តែឈ្មោះពួកគាត់ទាំង ៣៧នាក់ មិនមានឈ្មោះនៅទីនោះទេ ហើយត្រូវគេដាក់ឈ្មោះឲ្យទៅយកចំណែកដីនៅកោះខ្ចង ឬតំបន់អូរចំណាវិញ។ ប៉ុន្តែរហូតមកដល់ពេលនេះ ឆ្នាំ២០១៥ មានរយៈពេល ៦ឆ្នាំទៅហើយ នៅតែបាត់ដំណឹង មិនដឹងជាឯកសាររបស់និវត្តជនពួកខ្ញុំទាំង ៣៧នាក់ទៅដល់ណា? ហើយពេលណាទើបពួកខ្ញុំទទួលបានដីសម្បទានសង្គមកិច្ច និងផ្ទះទេ សូមឲ្យសម្ដេច ហ៊ុន សែន ជួយពួកខ្ញុំផង»។
អតីតមន្ត្រីនគរបាលក្រសួងមហាផ្ទៃ លោកវរសេនីយ៍ត្រី ឌិន តុង ថ្លែងបន្តថា ក្នុងចំណោមអតីតកម្លាំងប្រដាប់អាវុធដែលចូលនិវត្តន៍ កាលពីឆ្នាំ២០០៩ ចំនួន ៣៧នាក់ គឺមាន ២នាក់ កំពុងមានជំងឺប្រចាំកាយរ៉ាំរ៉ៃ ហើយពួកគាត់ទាំងពីររូបនេះទំនងជាគ្មានសង្ឃឹមថា អាចទទួលបានសម្បទានដីសង្គមកិច្ចនៅមុនសេចក្ដីស្លាប់ មកដល់នោះទេបើសិនការផ្ដល់ដីសម្បទានសង្គមកិច្ចនៅយឺតយូរបន្តទៀតនោះ៖ «សំណើពួកខ្ញុំ គឺស្នើសុំសម្ដេចនាយក ហ៊ុន សែន ជួយដោះស្រាយ ឬអន្តរាគមន៍ផ្ដល់ដីសង្គមកិច្ច និងផ្ទះ ជូននិវត្តជនពួកខ្ញុំទាំង ៣៧នាក់ឲ្យបានឆាប់ផង ព្រោះមាននិវត្តជនខ្លះកំពុងមានជំងឺប្រចាំកាយធ្ងន់ធ្ងរ។ និវត្តជនពួកខ្ញុំទាំង ៣៧នាក់ គឺបានចូលនិវត្តន៍តាំងពីឆ្នាំ២០០៩ រហូតមកដល់ឆ្នាំ២០១៥ ទៅហើយ នៅមិនទាន់ទទួលបានដីនិងផ្ទះទៀត។ ដូច្នេះសុំសំណូមពរឲ្យសម្ដេចនាយកជួយកកូរកកាយរឿងនេះជូននិវត្តជនពួកខ្ញុំដោយអនុគ្រោះផង»។
បញ្ហានេះដែរ លោក ឃុន សាវឿន មន្ត្រីសម្របសម្រួលអង្គការលីកាដូ ប្រចាំខេត្តព្រះសីហនុ ក៏បានដឹងឮ ឬទទួលបានបណ្ដឹងចំពោះភាពយឺតយ៉ាវនៃការបែងចែកដីសម្បទានសង្គមកិច្ច និងផ្ទះ ជូននិវត្តជន ឬអតីតកងកម្លាំងប្រដាប់អាវុធ ដែលត្រូវទទួលបានចំណែកដីនាខេត្តព្រះសីហនុ នេះដែរ។
មន្ត្រីសង្គមស៊ីវិលរូបនេះបានទទូចដល់ថ្នាក់ដឹកនាំស្ថាប័នពាក់ព័ន្ធ ពិសេសលោកនាយករដ្ឋមន្ត្រី ហ៊ុន សែន ត្រូវជួយពន្លឿនសកម្មភាពបែងចែកដីសម្បទានសង្គមកិច្ច និងផ្ទះជូនមន្ត្រីរាជការចូលនិវត្តន៍ឲ្យបានគ្រប់គ្នា ដើម្បីផ្សះផ្សាវិបត្តិផ្លូវចិត្តរបស់ពួកគាត់៖ «តាមខ្ញុំស្ដាប់ការរៀបរាប់របស់និវត្តជន គឺពួកគាត់មានការសោកស្ដាយចំពោះរដ្ឋាភិបាល នៅពេលពួកគាត់ចូលនិវត្ត ហាក់មិនបានជួយឈឺឆ្អាលពីសុខទុក្ខពួកគាត់ទេ។ បញ្ហានេះ បើរដ្ឋាភិបាលពិតជាមានគោលការបែងចែកដីសម្បទានសង្គមកិច្ច និងផ្ទះ ជូននិវត្តជនពិតមែន គួរតែផ្ដល់ជូនពួកគាត់ឲ្យបានឆាប់ និងត្រូវកំណត់ក្នុងរយៈពេលប៉ុន្មានឆ្នាំ ដែលអាចឲ្យពួកគាត់យកដីសង្គមកិច្ច និងផ្ទះនោះលក់ដូរបាន»។
លោក ឃុន សាវឿន បានស្នើដល់ប្រមុខរដ្ឋាភិបាល គួរពិនិត្យ និងបែងចែកដីសម្បទានសង្គមកិច្ចជូននិវត្តជន ឬអតីតកម្លាំងប្រដាប់អាវុធ ដោយយកចិត្តទុកដាក់ ព្រោះបច្ចុប្បន្ននេះ អតីតកងកម្លាំងចូលនិវត្តន៍ ឬបាត់បង់សមត្ថភាពការងារដោយពិការភាព និងគ្រួសារយុទ្ធជនពលីមរណៈមួយចំនួន មានជីវភាពរស់នៅតោកយ៉ាក ឬក៏មាននិវត្តជនខ្លះ បានដើរសុំទានតាមទីប្រជុំជនដោយសារតែជីវភាពរស់នៅខ្វះខាត។ លោកថា បញ្ហានេះ គឺជាការទទួលខុសត្រូវរបស់រដ្ឋាភិបាល ព្រោះពួកគាត់បានជួយបំពេញការងារជូនជាតិ មានស្នាដៃធំធេង មុនត្រូវបាត់បង់កម្លាំងពលកម្ម ឬគ្មានកម្លាំងធ្វើការបម្រើរដ្ឋលែងកើត។
ឆ្លើយតបបញ្ហានេះ លោក ឈិត សុខុន អភិបាលខេត្តព្រះសីហនុ ថ្លែងថា កន្លងមកការបែងចែកសម្បទានដីសង្គមកិច្ចជូននិវត្តជន មានទីតាំងនៅខេត្តនេះ នៅតំបន់អូរត្រជាក់ចិត្ត ក្នុងស្រុកស្ទឹងហាវ ដោយនិវត្តជនម្នាក់ៗ ត្រូវទទួលបានផ្ទះមួយខ្នង និងដីកសិកម្មចំនួន ១ហិកតារ។ ប៉ុន្តែដោយសារតែការបែងចែកដីសម្បទានសង្គមកិច្ចជូននិវត្តជន នាខេត្តព្រះសីហនុ គឺនិវត្តជននៅទូទាំងប្រទេសត្រូវមកទទួលសម្បទានដីសង្គមកិច្ច និងផ្ទះនៅក្នុងខេត្តនេះ អាជ្ញាធររៀបចំផ្ដល់ជូនមិនបានទាន់ពេលវេលាទេ។
លោក ឈិត សុខុន៖ «ដីដែលអាជ្ញាធររៀបចំផ្តល់ជូននិវត្តជននៅខេត្តព្រះសីហនុ គឺរៀបចំផ្តល់ជូននិវត្តជនទូទាំងប្រទេស មិនមែនតែនិវត្តជននៅខេត្តនេះទេ ហើយដល់ពេលអាជ្ញាធរស្រាវជ្រាវបានរកឃើញថា មាននិវត្តជនមានលំនៅឋានក្នុងខេត្តព្រះសីហនុ ក៏មិនទាន់ទទួលបានដីសម្បទានសង្គមកិច្ច និងផ្ទះពួកគាត់ក៏បានសំណូមពរឲ្យបែងចែកដីជូនពួកគាត់ដែរ។ ប៉ុន្តែបញ្ហានេះជាគោលនយោបាយរបស់រដ្ឋាភិបាល ហើយខាងក្រសួងដែនដីជាអ្នកទទួលរៀបចំសង់ផ្ទះ និងចំណាយថវិកាសាងសង់ផ្សេងៗ»។
ទោះយ៉ាងណា លោក ឈិត សុខុន បញ្ជាក់ថា សកម្មភាពបែងចែកដីសម្បទានសង្គមកិច្ច និងផ្ទះជូននិវត្តជន ដែលត្រូវទទួលបាននៅខេត្តព្រះសីហនុ គឺអាជ្ញាធរ ឬរដ្ឋាភិបាលកំពុងដោះស្រាយជាជំហានៗ៖ «កន្លងមកនេះខាងក្រសួងរៀបចំដែនដី បានសង់ផ្ទះជូននិវត្តជនបាន ៨០ខ្នង នៅចំណុចអូរត្រជាក់ចិត្ត ក្នុងស្រុកស្ទឹងហាវ ដោយផ្ទះមួយខ្នងសង់លើដីទំហំ ២០ម៉ែត្រ គុណ ៣០ម៉ែត្រ មានតម្លៃចន្លោះពី ៦ ទៅ ៧ពាន់ដុល្លារសហរដ្ឋអាមេរិក និងបានបែងចែកដីកសិកម្មជូននិវត្តជនម្នាក់ៗចំនួន ១ហិកតារថែមទៀត។ ប៉ុន្តែមិនទាន់បានគ្រប់គ្នាទេ ចំណែកនិវត្តជនជាង ៣០នាក់ដែលតវ៉ាពេលនេះទំនងជាពួកគាត់ពិតជាមិនទាន់ទទួលបានដីសម្បទានសង្គមកិច្ច និងផ្ទះដូចពួកគាត់អះអាងពិតមែន»។
ត្រង់ចំណុចនេះ លោក ឃុន សាវឿន មន្ត្រីអង្កេតអង្គការលីកាដូ ប្រចាំខេត្តព្រះសីហនុ ថ្លែងរិះគន់ចំពោះភាពយឺតយ៉ាវនេះ ពីព្រោះនិវត្តជនខ្លះបានចូលនិវត្តន៍មានរយៈពេលចន្លោះពី ៦ ទៅ ៧ឆ្នាំទៅហើយ នៅមិនទាន់ទទួលបានដីសម្បទានសង្គមកិច្ច និងផ្ទះដែលរដ្ឋាភិបាលត្រូវផ្តល់ជូនទៀត។ ជាងនេះទៀត ក៏សង្កេតឃើញមាននិវត្តជន ឬអតីតកងកម្លាំងប្រដាប់អាវុធខ្លះ ដែលធ្លាក់ខ្លួនពិការ ក៏បានបង្ខំចិត្តដើរសុំទាននៅតាមទីប្រជុំជន ដើម្បីចិញ្ចឹមគ្រួសារជួបការខ្វះខាតជាដើម។
មន្ត្រីសង្គមស៊ីវិលរូបនេះស្នើដល់លោកនាយករដ្ឋមន្ត្រី ហ៊ុន សែន ជួយពិចារណា និងគិតគូរដល់ជីវិតគ្រួសារនិវត្តជន ឬអតីតកងកម្លាំងប្រដាប់អាវុធចូលនិវត្តន៍ ដោយយកចិត្តទុកដាក់។
ទាក់ទិនបញ្ហានេះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានជំរុញឲ្យរដ្ឋមន្ត្រីក្រសួងសង្គមកិច្ចអតីតយុទ្ធជននិងយុវនីតិសម្បទា ត្រូវរៀបចំកិច្ចសហការសម្របសម្រួលឲ្យមន្ត្រីនគរបាល ឬកងរាជអាវុធហត្ថចូលនិវត្ត អាចមានលទ្ធភាពបានជ្រើសរើសទៅបម្រើការងារឲ្យក្រុមហ៊ុនសន្តិសុខឯកជន ដើម្បីរកប្រាក់ចិញ្ចឹមគ្រួសារ។
សារអំពាវនាវនេះធ្វើឡើងនៅក្នុងពិធីអបអរសាទរខួបលើកទី៧០ នៃការបង្កើតកម្លាំងនគរបាលជាតិ ថ្ងៃទី១៦ ខែឧសភា ឆ្នាំ១៩៤៥ ដល់ថ្ងៃទី១៦ ខែឧសភា ឆ្នាំ២០១៥។
សេចក្ដីប្រកាសរបស់លោក ស ខេង ធ្វើឡើងបន្ទាប់ពីលោកបានទទួលការឆ្លើយតបជាវិជ្ជមានពីក្រុមហ៊ុនសន្តិសុខឯកជនមួយចំនួនដែលលោកបានស្នើសុំឲ្យក្រុមហ៊ុនសន្តិសុខឯកជននានា ជួយទទួលយកមន្ត្រីនគរបាលចូលនិវត្តន៍ទៅបម្រើការងារក្នុងគោលបំណងផ្ដល់លទ្ធភាពឲ្យពួកគាត់អាចរកប្រាក់ចំណូល ដើម្បីផ្គត់ផ្គង់គ្រួសារ និងជាការផ្ដល់ឱកាសដល់មន្ត្រីចូលនិវត្តន៍ អាចយកបទពិសោធន៍ដែលមានស្រាប់បន្តចូលរួមការងារការពារសន្តិសុខសង្គមនាថ្ងៃអនាគត។
ទោះយ៉ាងណា គំនិតផ្ដួចផ្ដើមរបស់លោកឧបនាយករដ្ឋមន្ត្រី ស ខេង បានរងការរិះគន់ពីមន្ត្រីសង្គមស៊ីវិលមួយចំនួន ដោយបានលើកឡើងថា និវត្តជន ឬកម្លាំងប្រដាប់អាវុធចូលនិវត្តន៍ភាគច្រើន ពួកគាត់គ្មានកម្លាំងគ្រប់គ្រាន់ដើម្បីបំពេញការងារជូនក្រុមហ៊ុនឯកជនឲ្យបានពេញលេញ ឬពេញម៉ោងនោះទេ ព្រោះកាយសម្បទារបស់ពួកគាត់បានទ្រុឌទ្រោមស្ទើរទាំងស្រុងទៅហើយ ហើយក្រោយពេលចូលនិវត្តន៍ ត្រូវទន្ទឹងរង់ចាំប្រាក់ឧបត្ថម្ភចូលនិវត្តន៍ ឬការបែងចែកដីសម្បទានសង្គមកិច្ច និងផ្ទះពីរដ្ឋាភិបាលផ្ដល់ជូនឲ្យបានទាន់ពេលវេលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។