លោក សម រង្ស៊ី ប្រធានគណបក្សសង្គ្រោះជាតិ បានផ្ញើលិខិតមួយច្បាប់នៅថ្ងៃទី២៣ កក្កដា សុំឲ្យ លោក អ៊ឹម សួស្តី ប្រធាន គ.ជ.ប ឲ្យដាក់បញ្ចូលឈ្មោះលោកជាស្វ័យប្រវត្តិទៅក្នុងបញ្ជីឈ្មោះអ្នកបោះឆ្នោត និងបញ្ជីផ្លូវការបេក្ខជនឈរឈ្មោះបោះឆ្នោត ដោយសាររូបលោកជាអ្នកតំណាងរាស្ត្រដែលបានទទួលការលើកលែងទោសពីព្រះមហាក្សត្ររួចហើយ។ ដូច្នេះ តាមមាត្រា ១៥ នៃច្បាប់ស្ដីពីលក្ខន្តិកៈតំណាងរាស្ត្រ លោកត្រូវតែបានទទួលសុពលភាពអភ័យឯកសិទ្ធិ និងបុព្វសិទ្ធិឡើងវិញ។
នៅក្នុងលិខិតនោះ លោក សម រង្ស៊ី បានបញ្ជាក់ថា រូបលោកមិនមែនសុំចុះឈ្មោះជាថ្មីឡើងវិញនោះទេ ពីព្រោះរូបលោកជាអ្នកតំណាងរាស្ត្រដែលមានឈ្មោះនៅក្នុងបញ្ជីអ្នកបោះឆ្នោតរួចទៅហើយ ហើយការលុបឈ្មោះលោកកន្លងមក ដោយ គ.ជ.ប អាងលើអំណាចសាលដីការបស់តុលាការប៉ុណ្ណោះ។ ដូច្នេះ ការប្រើមាត្រា ៤៩ថ្មី របស់ច្បាប់ស្ដីពីការជ្រើសតាំងតំណាងរាស្ត្រមកធ្វើការរារាំង មិនឲ្យលោកមានសិទ្ធិបោះឆ្នោត និងឈរឈ្មោះឲ្យគេបោះឆ្នោតនោះ គឺពុំត្រឹមត្រូវទេ។
ម៉្យាងវិញទៀត មាត្រាច្បាប់ស្ដីពីការបោះឆ្នោតរើសតំណាងរាស្ត្រនេះ ក៏មិនបានចែងហាមឃាត់មិនឲ្យធ្វើការកែប្រែបញ្ជីឈ្មោះអ្នកបោះឆ្នោត ដែល គ.ជ.ប បានផ្តល់សុពលភាពជាផ្លូវការហើយនោះដែរ។ លោក សម រង្ស៊ី សុំឲ្យ គ.ជ.ប អនុវត្តករណីលោកតាមមាត្រា ១៦ថ្មី ស្ដីពីសិទ្ធិអំណាចរបស់ គ.ជ.ប ភារកិច្ចរបស់ គ.ជ.ប ក្នុងការចាត់ចែង និងត្រួតពិនិត្យការបោះឆ្នោត។
ក្រៅពីផ្ញើលិខិតតវ៉ាទៅ គ.ជ.ប លោក សម រង្ស៊ី មានគម្រោងតវ៉ាទៅក្រុមប្រឹក្សាធម្មនុញ្ញដែរ។
លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍នៅថ្ងៃទី២៣ កក្កដា ថា លោក សម រង្ស៊ី នឹងតវ៉ាទៅក្រុមប្រឹក្សាធម្មនុញ្ញជាបន្តទៅទៀត ក្រោយពេល គ.ជ.ប បានប្រកាសថា លោក សម រង្ស៊ី ប្រធានគណបក្សសង្គ្រោះជាតិ មិនអាចដាក់ឈ្មោះក្នុងបញ្ជីបោះឆ្នោត និងដាក់បញ្ចូលក្នុងបញ្ជីផ្លូវការបេក្ខជនឈរឈ្មោះបោះឆ្នោតបាននោះ។
កាលពីថ្ងៃទី២១ កក្កដា លោក សម រង្ស៊ី បានសរសេរលិខិតទៅ លោក អ៊ឹម សួស្តី ប្រធានគណៈកម្មាធិការជាតិរៀបចំការបោះឆ្នោត សុំឲ្យដាក់បញ្ចូលឈ្មោះលោកទៅក្នុងបញ្ជីអ្នកបោះឆ្នោត និងក្នុងបញ្ជីផ្លូវការបេក្ខជនឈរឈ្មោះបោះឆ្នោតរបស់គណបក្សសង្គ្រោះជាតិ សម្រាប់មណ្ឌលខេត្តកណ្ដាល។
មួយថ្ងៃក្រោយមក គឺនៅថ្ងៃទី២២ កក្កដា គ.ជ.ប បានកោះប្រជុំសមាជិក គ.ជ.ប ទាំងអស់ ដើម្បីពិនិត្យមើលអំពីការស្នើសុំរបស់ លោក សម រង្ស៊ី ហើយបានប្រកាសឲ្យដឹងថា សំណើសុំរបស់ លោក សម រង្ស៊ី គឺមិនអាចធ្វើបានទេ យោងតាមច្បាប់បោះឆ្នោតជ្រើសតាំងតំណាងរាស្ត្រមាត្រា ៤៩ថ្មី និងមាត្រា ១១៨ថ្មី។
នៅថ្ងៃទី២៣ កក្កដា នេះដែរ លោក សម រង្ស៊ី ក៏បានផ្ញើលិខិតមួយច្បាប់ជូន លោក ហេង សំរិន ប្រធានរដ្ឋសភា ដើម្បីសុំឲ្យរដ្ឋសភាផ្តល់សុពលភាពអភ័យឯកសិទ្ធិតំណាងរាស្ត្រ និងបុព្វសិទ្ធិតំណាងរាស្ត្រឲ្យលោកវិញ។
នៅក្នុងលិខិតផ្ញើជូន លោក ហេង សំរិន នោះ លោក សម រង្ស៊ី បានសរសេរបញ្ជាក់ថា យោងមាត្រា ១៥ នៃច្បាប់ស្ដីពីលក្ខន្តិកៈតំណាងរាស្ត្រ បានចែងថា តំណាងរាស្ត្ររូបណាមួយជាទណ្ឌិត ហើយត្រូវព្រះមហាក្សត្រលើកលែងទោស តំណាងរាស្ត្ររូបនោះនឹងបានទទួលសុពលភាព អភ័យឯកសិទ្ធិ និងបុព្វសិទ្ធិឡើងវិញ។ ដូច្នេះ រូបលោកសុំឲ្យមានអភ័យឯកសិទ្ធិ និងបុព្វសិទ្ធិតំណាងរាស្ត្រឡើងវិញ ដើម្បីលោកមានលទ្ធភាពក្នុងការបំពេញតួនាទីជាអ្នកតំណាងរាស្ត្របានពេញលេញ ស្របតាមរដ្ឋធម្មនុញ្ញ និងច្បាប់នានានៅកម្ពុជា។
លោកបណ្ឌិត ឡៅ ម៉ុងហៃ អ្នកវិភាគឯករាជ្យ មានប្រសាសន៍ថា ការមិនបានចុះឈ្មោះបោះឆ្នោត និងឈរឈ្មោះឲ្យគេបោះឆ្នោតឲ្យ មិនមែនជាកំហុសរបស់ លោក សម រង្ស៊ី ទេ ហើយបើ គ.ជ.ប គិតតែលើមូលដ្ឋានច្បាប់មួយមុខនោះ មិនឲ្យ លោក សម រង្ស៊ី បានចុះឈ្មោះបោះឆ្នោត និងឈរឈ្មោះឲ្យគេបោះឆ្នោត ក៏មិនទាន់គ្រប់គ្រាន់ដែរ ពីព្រោះ លោក សម រង្ស៊ី បានទទួលការលើកលែងទោសពីសំណាក់ព្រះមហាក្សត្រហើយ។
នៅក្នុងលិខិតរបស់លោកនាយករដ្ឋមន្ត្រី ហ៊ុន សែន ផ្ញើថ្វាយព្រះមហាក្សត្រ សុំឲ្យលើកលែងទោស លោក សម រង្ស៊ី នោះ បានសរសេរជាអាទិ៍ថា ដោយយោងលើស្មារតីបង្រួបបង្រួមជាតិ និងផ្សះផ្សាជាតិ និងដើម្បីឲ្យការបោះឆ្នោតជ្រើសតាំងតំណាងរាស្ត្រនីតិកាលទី៥ នេះ ប្រព្រឹត្តទៅតាមគោលការណ៍លទ្ធិប្រជាធិបតេយ្យ សេរីពហុបក្ស ដោយមានគ្រប់ភាគីពាក់ព័ន្ធចូលរួម និងផ្អែកតាមលិខិតស្នើសុំព្រះរាជទានទោសរបស់ លោក សម រង្ស៊ី ចុះថ្ងៃទី១៣ មិថុនា សូមព្រះករុណា ជាអម្ចាស់ជីវិតតម្កល់លើត្បូង ព្រះរាជតម្រិះលើសេចក្តីស្នើលើកលែងទោសនេះដោយអនុគ្រោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។