លោក យឹម សុវណ្ណ មន្ត្រីនាំពាក្យគណបក្សសង្គ្រោះជាតិ មានប្រសាសន៍ថា លោកទទួលបានដំណឹងពីកាលបរិច្ឆេទនៃការវិលចូលស្រុករបស់លោក សម រង្ស៊ី ហើយ។ លោកបន្តថា នឹងស្នើសុំឲ្យមានការប្រជុំគណៈអចិន្ត្រៃយ៍របស់បក្ស ដើម្បីរៀបចំកម្មវិធីទទួលលោក សម រង្ស៊ី។ ប៉ុន្តែ លោកមិនទាន់ហ៊ានអះអាងពីចំនួនអ្នកដែលនឹងចូលរួមទទួលស្វាគមន៍លោក សម រង្ស៊ី នៅឡើយទេ តែលោកជឿជាក់ថា នឹងមានអ្នកចូលរួមច្រើន។
លោក យឹម សុវណ្ណ៖ «ខ្ញុំនឹងចូលរួម និងស្នើឲ្យមានការប្រជុំគណៈអចិន្ត្រៃយ៍ ដើម្បីស្នើឲ្យមានការរៀបចំកម្មវិធីទទួលលោកប្រធាន ហើយអ្នកចូលរួមប៉ុន្មាន យើងនឹងសម្រេចទៅតាមហ្នឹង។ បើតាមបើកទូលាយ គឺថារាប់ម៉ឺននាក់ យ៉ាងតិចក៏ ៥ម៉ឺននាក់ដែរ ប៉ុន្តែយើងខ្ញុំនឹងរៀបចំ»។
លោក សម រង្ស៊ី ត្រូវបានតុលាការកាត់ទោសឲ្យជាប់ពន្ធនាគារចំនួន ១២ឆ្នាំ ពីបទបំផ្លាញតម្រុយបង្គោលព្រំដែន និងបទផ្សព្វផ្សាយព័ត៌មានមិនពិត ដែលត្រូវបានគណបក្សប្រឆាំងចាត់ទុកថាជារឿងនយោបាយ។ លោកត្រូវបាន ព្រះមហាក្សត្រ ព្រះបាទ នរោត្តម សីហមុនី ទ្រង់ព្រះប្រទានការលើកលែងទោស នៅថ្ងៃទី១២ កក្កដា បន្ទាប់ពីមានការស្នើសុំពីលោកនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។