ក្នុងពេលដំណើរការរាប់សន្លឹកឆ្នោតនៅតាមការិយាល័យចាប់ផ្ដើមបានមួយសន្ទុះ ស្រាប់តែ លោក សម រង្ស៊ី ប្រធានគណបក្សសង្គ្រោះជាតិ បានចេញសេចក្តីថ្លែងការណ៍មួយជាសាធារណៈ ដោយចាត់ទុកថ្ងៃទី២៨ ខែកក្កដា ជាទិវាប្រវត្តិសាស្ត្រដែលគណបក្សសង្គ្រោះជាតិ បានឈ្នះការបោះឆ្នោតជ្រើសតាំងតំណាងរាស្ត្រអាណត្តិទី៥ ឆ្នាំ២០១៣។ គណបក្សនេះក៏បានថ្លែងអំណរគុណដល់ពលរដ្ឋដែលបានបោះឆ្នោតគាំទ្រឲ្យគណបក្សសង្គ្រោះជាតិ ឲ្យឈ្នះការបោះឆ្នោត។
សេចក្តីប្រកាសព័ត៌មាននោះចេញមិនទាន់បានមួយម៉ោងស្រួលបួលផង លោក សម រង្ស៊ី បានចេញសេចក្តីប្រកាសមួយទៀត ដោយប្ដូរអត្ថន័យពីការឈ្នះឆ្នោតក្នុងលិខិតទី១ ទៅជាការអរគុណពលរដ្ឋទាំងអស់ដែលបានអញ្ជើញចូលរួមបោះឆ្នោតយ៉ាងឱឡារិក។
លោក សម រង្ស៊ី បានថ្លែងនៅក្នុងសន្និសីទកាសែតកាលពីយប់ថ្ងៃទី២៨ ខែកក្កដា ចាត់ទុកការចេញសេចក្តីថ្លែងការណ៍ដំបូងរបស់ខ្លួនថា ជាការយល់ច្រឡំ និងចេញដោយច្រឡំ។ លោក សម រង្ស៊ី បញ្ជាក់ថា ការបោះឆ្នោតលើកនេះ គឺប្រជាពលរដ្ឋជាអ្នកឈ្នះ គឺជាជ័យជម្នះលទ្ធិប្រជាធិបតេយ្យនៅកម្ពុជា ដោយការបោះឆ្នោតនោះបានប្រព្រឹត្តទៅដោយមានការចូលរួមកុះករពីប្រជាពលរដ្ឋ អត់មានអំពើហិង្សា ហើយមានភាពចាស់ទុំខាងនយោបាយ។
សមត្ថកិច្ចកម្លាំងប្រដាប់អាវុធជាច្រើន បានដាក់ពង្រាយនៅតាមផ្លូវ ហើយមហាវិថី និងវិថីសំខាន់ៗ បានដាក់បារ៉ាស់បិទមិនឲ្យធ្វើចរាចរណ៍។ ផ្លូវមួយចំនួនក្នុងក្រុងមានសភាពស្ងប់ស្ងាត់ ហើយពលរដ្ឋខ្លះបានសម្រុកចេញទៅក្រៅក្រុងភ្លាមៗ នៅពេលដែលមានព័ត៌មានធ្លាយថា គណបក្សសង្គ្រោះជាតិ ឈ្នះឆ្នោត។ សភាពតានតឹងនេះ បានធូរស្រាលឡើងវិញបន្តិច ដោយផ្លូវមួយចំនួនត្រូវបានចរាចរឡើងវិញ ហើយកម្លាំងសមត្ថកិច្ចក៏បានដកថយនៅពេលដែល លោក សម រង្ស៊ី ធ្វើសន្និសីទកាសែតយ៉ាងប្រញាប់ កែប្រែលើសេចក្តីថ្លែងការណ៍របស់ខ្លួនពីជ័យជម្នះលើការបោះឆ្នោត។ ស្របពេលដែល លោក ខៀវ កាញារីទ្ធ អ្នកនាំពាក្យរដ្ឋាភិបាល និងជារដ្ឋមន្ត្រីក្រសួងព័ត៌មាន ក៏បានចេញប្រកាសលទ្ធផលស្មានដំបូងលើបណ្ដាញព័ត៌មានសង្គមហ្វេសបុក (Facebook) បង្ហាញថា គណបក្សប្រជាជនកម្ពុជា បាន ៦៨កៅអី ហើយគណបក្សសង្គ្រោះជាតិ បាន ៥៥កៅអី។
ចំពោះសំណួរដែលសួរថា តើមូលហេតុអ្វីបានជាគណបក្សសង្គ្រោះជាតិ ចេញលិខិតពីរផ្សេងគ្នាយ៉ាងដូច្នេះ? តើមានអ្វីនៅពីក្រោយនៃរឿងនេះឬយ៉ាងណា?
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បដិសេធថា លោកមិនបានដឹងថាមានរឿងអ្វីកើតឡើង ឬស្ថិតនៅពីក្រោយខ្នងក្នុងរឿងចេញលិខិតថ្លែងការណ៍ពីរនេះទេ ប៉ុន្តែលោកអាចនិយាយបានថា លទ្ធផលនៃការបោះឆ្នោតគណបក្សសង្គ្រោះជាតិ កំពុងប្រមូលតាមបណ្ដាខេត្ត ហើយផ្ទៀងផ្ទាត់ជាមួយលទ្ធផលប្រកាសដោយគណៈកម្មាធិការជាតិរៀបចំការបោះឆ្នោត។
លោកបន្តថា អ្វីដែលគណបក្សសង្គ្រោះជាតិ កត់សម្គាល់ថាមានករណីមិនប្រក្រតីក្នុងការបោះឆ្នោត ដែលពលរដ្ឋទាមទារខ្លាំងជាងគេនោះ គឺការដឹកមនុស្សពីក្រៅភូមិឲ្យទៅបោះឆ្នោត ការរាប់សន្លឹកឆ្នោតមានការបិទទ្វារ ប្រធានការិយាល័យបោះឆ្នោតជួយគូសសន្លឹកឆ្នោតឲ្យជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។