មន្ត្រីតុលាការខេត្តកំពង់ចាម ថាសកម្មភាពរបស់លោក សម រង្ស៊ី ដកបង្គោលតម្រុយដែលបោះដោយមន្ត្រីតុលាការ និងអាជ្ញាធរនៅចំណុចដីមានជម្លោះក្នុងភូមិអង្គរជា ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ គឺជារឿងជ្រៀតជ្រែកកិច្ចរបស់តុលាការ។ ការលើកឡើងនេះ បន្ទាប់ពីប្រធានគណបក្សសង្គ្រោះជាតិ លោក សម រង្ស៊ី ដកបង្គោលតម្រុយនោះ កាលថ្ងៃទី១៧ ខែកក្កដា ដោយយល់ថា ករណីនេះជារឿងអយុត្តិធម៌សម្រាប់ពលរដ្ឋទន់ខ្សោយ។
មន្ត្រីតុលាការខេត្តកំពង់ចាម ថាពួកគេនឹងធ្វើការងារនេះតាមនីតិវិធី ដោយត្រូវឱ្យមន្ត្រីមានសមត្ថកិច្ចនៅទីនោះ រៀបចំប្រមូលភស្តុតាងអំពីសកម្មភាពលោក សម រង្ស៊ី ដកបង្គោលតម្រុយកំណត់ដីទំនាស់ ដើម្បីចាត់វិធានការតាមផ្លូវច្បាប់។
ព្រះរាជអាជ្ញារងអមសាលាដំបូងខេត្តកំពង់ចាម លោក ផាន់ សុភ័ក្ត្រ មានប្រសាសន៍ថា ជាជំហានដំបូង គឺរង់ចាំឱ្យខាងដើមបណ្ដឹងដែលស្នើឱ្យបើកផ្លូវនោះ គាត់ជាអ្នកសម្រេចចិត្តជាមុនសិន ថាតើក្នុងរឿងនេះគាត់គួរដាក់ពាក្យប្ដឹង ឬយ៉ាងណា? បន្ទាប់មកខាងលោកនឹងឱ្យមន្ត្រីសមត្ថកិច្ចប្រមូលភស្តុតាងដើម្បីបង្ហាញថា នរណាជាអ្នកប្រព្រឹត្តផ្ទាល់ ពីព្រោះខាងលោកមិនបានឃើញសកម្មភាពលោក សម រង្ស៊ី ប្រព្រឹត្តនោះទេ។
លោកបញ្ជាក់ថា តម្រុយនោះ គឺបោះសំគាល់ចំណុចដីដើម្បីឱ្យពលរដ្ឋមួយគ្រួសាររើរបងផ្ទះរបស់ខ្លួនចេញដោយខ្លួនឯងក្នុងអំឡុងពេល ១៥ថ្ងៃ ហើយករណីដកតម្រុយនេះ លោកថា ជាការរំលោភកិច្ចការតុលាការ៖ «រឿងជ្រៀតជ្រែកវាជ្រៀតជ្រែកពេកហើយ ព្រោះនេះជាការងាររបស់តុលាការ។តាមពិតគេបោះតម្រុយដើម្បីឱ្យភាគីនេះបើកផ្លូវតាមអំណាចរបស់ដីកាសម្រេចរក្សាការពារ»។
កាលពីថ្ងៃទី១០ ខែកក្កដា មន្ត្រីតុលាការខេត្តកំពង់ចាម ដែលដឹកនាំដោយព្រះរាជអាជ្ញារងអមសាលាដំបូងលោក ផាន់ សុភ័ក្ត្រ បានចុះអនុវត្តដីកាសម្រេចរក្សាការពារ ដែលតម្រូវឱ្យគ្រួសារអ្នកស្រី សាន់ ណាស់ រុះរើរបងផ្ទះចេញដើម្បីបើកផ្លូវលើដីទំនាស់នៅចន្លោះផ្ទះអ្នកស្រី និងផ្ទះពលរដ្ឋមួយគ្រួសារទៀតសម្រាប់ផលប្រយោជន៍ពលរដ្ឋទូទៅ។ ការចុះអនុវត្តដីកានេះ បន្ទាប់ពីមន្ត្រីនគរបាលប៉ុស្តិ៍ឃុំស្រឡប់ លោក ស្លេះ ហាន់ណាហ្វី ដាក់ពាក្យប្ដឹងគ្រួសារអ្នកស្រី សាន់ ណាស់ ថាបានធ្វើរបងផ្ទះរំលោភដីផ្លូវសាធារណៈ។
ទោះយ៉ាងណា គ្រួសារអ្នកស្រី សាន់ ណាស់ ដែលជាស្ត្រីមេម៉ាយបញ្ជាក់ថា របងផ្ទះអ្នកស្រីធ្វើលើដីរបស់ខ្លួន ហើយចំណុចដីទំនាស់ គឺពុំមែនជាផ្លូវសាធារណៈឡើយ ប៉ុន្តែជាផ្លូវសម្រាប់ប្រើប្រាស់ក្នុងគ្រួសារផ្ទាល់ខ្លួនប៉ុណ្ណោះ។ ដោយមើលឃើញស្ថានភាពអយុត្តិធម៌បែបនេះ ទើបប្រធានគណបក្សសង្គ្រោះជាតិ លោក សម រង្ស៊ី សម្រេចដកបង្គោលតម្រុយនោះបោះចោលតែម្ដង កាលពីថ្ងៃទី១៧ ខែកក្កដា ក្រោយពេលបញ្ចប់ការសំណេះសំណាលជាមួយពលរដ្ឋជនជាតិចាម នៅភូមិអង្គរជា ក្បែរចំណុចដីមានទំនាស់។
លោក សម រង្ស៊ី មានប្រសាសន៍ថា ដោយមើលឃើញភាពអយុត្តិធម៌កើតឡើងចំពោះពលរដ្ឋទន់ខ្សោយ ពលរដ្ឋស្លូតត្រង់ ទើបលោកត្រូវតែឈឺឆ្អាលការពារពលរដ្ឋរងគ្រោះទាំងនោះ៖ «គាត់មានដីតែប៉ុណ្ណឹង ក្បាលដីតែប៉ុណ្ណឹង គេមានបំណងពុះដីគាត់យកទៅធ្វើអីជាផលប្រយោជន៍ខាងគេនោះ ដោយបង្ខំ ដោយប្រើអំណាច ដូច្នេះវាអយុត្តិធម៌»។
យ៉ាងណាក៏ដោយចុះ ថ្ងៃកំណត់ ១៥ថ្ងៃដែលតុលាការទុកឱ្យគ្រួសារអ្នកស្រី សាន់ ណាស់ សម្រាប់រុះរើរបងផ្ទះដោយខ្លួនឯងនោះ នឹងមកដល់នៅថ្ងៃទី២៥ ខែកក្កដា ហើយជំហររបស់តុលាការ គឺអនុវត្តតាមផ្លូវច្បាប់ដដែល។ ប្រសិនបើគ្រួសារអ្នកស្រី សាន់ ណាស់ មិនព្រមរើរបងដោយខ្លួនឯងតាមការកំណត់ទេ គឺពួកគេនឹងអាចពាក់ព័ន្ធរឿងព្រហ្មទណ្ឌ រឿងរំលោភដីកាសម្រេចរក្សាការពាររបស់តុលាការទៀតផង។
ជាមួយគ្នានេះ លោក សម រង្ស៊ី ថាករណីនេះ កំពុងតែផ្អើលហើយ ចំណែកលោកនឹងតាមដានលើរឿងនេះតទៅទៀត ដោយលោកបញ្ជាក់ថា មនុស្សអាក្រក់មិនអាចធ្វើអំពើអាក្រក់របស់ខ្លួនបានទៀតទេ ប្រសិនបើយើងលាតត្រដាងអំពើអាក្រក់របស់គេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។