ប្រធានគណបក្សសង្គ្រោះជាតិ លោក សម រង្ស៊ី នៅព្រឹកថ្ងៃទី១៧ មីនា បានចុះជួបសកម្មជនបក្សឃុំ និងសកម្មជនបក្សស្រុកត្រាំកក់ នៅខេត្តតាកែវ ជិត ៥០០នាក់។
មន្ត្រីក្រុមប្រឹក្សាខេត្តតាកែវ ខាងគណបក្សសង្គ្រោះជាតិ លោក ណុប សុវណ្ណ ឲ្យដឹងក្រោយពេលកិច្ចប្រជុំចប់ថា លោក សម រង្ស៊ី ដែលចុះមកជួបសកម្មជនស្រុកត្រាំកក់ រយៈពេលមួយព្រឹកនេះ គឺដើម្បីពង្រឹងការងារបក្សសម្រាប់ការបោះឆ្នោតខាងមុខ៖ «ចំណុចសំខាន់ដែលសារទី១ (លោក សម រង្ស៊ី) គឺសុំឲ្យរចនាសម្ព័ន្ធនៅតាមមូលដ្ឋានថ្នាក់ដឹកនាំទាំងអស់មានការរួបរួមគ្នា ហើយបង្ហាញពីការរួបរួមគ្នានៅតែរឹងមាំដដែល។ ចំណុចទី២ គាត់បានពង្រឹងនិងផ្ដែផ្ដាំទៅរចនាសម្ព័ន្ធថ្នាក់ក្រោម ទាំងថ្នាក់ខេត្ត ថ្នាក់ឃុំ ថ្នាក់ភូមិហ្នឹង សុំឲ្យរៀបចំឲ្យបានរឹងមាំដើម្បីឈានយកជ័យជំនះថ្ងៃបោះឆ្នោតនៅឆ្នាំ២០១៧ -២០១៨ នេះ។ ចំណុចទី៣ គឺគាត់បានជម្រាបបង្ហាញលទ្ធផលនៃការចរចាសេចក្ដីព្រាងច្បាប់ គ.ជ.ប ថ្មី ដែលយើងអនុម័តនៅពេលខាងមុខនេះ»។
គណបក្សសង្គ្រោះជាតិ នៅខេត្តតាកែវ បានឈ្នះ ៤កៅអី ក្នុងការបោះឆ្នោតជាតិកន្លងទៅ ខណៈគណបក្សប្រជាជនដែលជាគូប្រកួតប្រជែងទទួលបាន ៤កៅអីដូចគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។