ចំពោះសំណួរថា តើលោក សម រង្ស៊ី នឹងមកនៅថ្ងៃណាជាក់លាក់? មន្ត្រីនាំពាក្យគណបក្សប្រឆាំង លោក យឹម សុវណ្ណ ថ្លែងប្រាប់វិទ្យុអាស៊ីសេរីថា លោកសុំមិនទាន់បញ្ចេញអំពីពេលវេលាពិតប្រាកដទេក្នុងពេលនេះ ប៉ុន្តែលោកបញ្ជាក់ថា លោក សម រង្ស៊ី ពិតជាមកកាន់កម្ពុជា មុនថ្ងៃបោះឆ្នោត។
ទាក់ទងនឹងគម្រោងវិលចូលស្រុករបស់ប្រធានគណបក្សប្រឆាំងរូបនេះ ទីភ្នាក់ងារព័ត៌មាន អា.អេហ្វ.ប៉េ (AFP) កាលពីថ្ងៃអាទិត្យ ទី៧ កក្កដា ដកស្រង់សំដីមន្ត្រីនាំពាក្យរដ្ឋាភិបាល លោក ខៀវ កាញារីទ្ធ ថ្លែងថា នឹងរង់ចាំមើល ថាតើលោក សម រង្ស៊ី នឹងចូលមកមែនទេ។
ចំពោះសំណួរថា តើលោក សម រង្ស៊ី នឹងត្រូវចាប់ខ្លួនឬទេនៅពេលលោកមកដល់កម្ពុជា វិញនោះ? លោក ខៀវ កាញារីទ្ធ ថ្លែងប្រាប់ អា.អេហ្វ.ប៉េ ថាគប្បីទៅសួរតុលាការ។
ប៉ុន្តែមន្ត្រីនាំពាក្យគណបក្សប្រឆាំង លោក យឹម សុវណ្ណ បញ្ជាក់ទៀតថា ទោះជាត្រូវប្រឈមមុខនឹងការចាប់ខ្លួនក្តី ក៏លោក សម រង្ស៊ី នៅតែវិលចូលស្រុកនៅមុនថ្ងៃបោះឆ្នោតយ៉ាងប្រាកដ ឥតមានការកែប្រែឡើយ៖ «អាហ្នឹងគាត់ធ្វើ គាត់ចាប់ខ្លួន អាហ្នឹងជាវិធានការរបស់រដ្ឋាភិបាល ដែលប្រើប្រាស់ប្រព័ន្ធតុលាការជាឧបករណ៍នយោបាយរបស់ខ្លួន។ ប៉ុន្តែប្រជាពលរដ្ឋក៏មានមធ្យោបាយដើម្បីការពារឯកឧត្ដម ប្រធាន សម រង្ស៊ី មិនឱ្យអ្នកណាប៉ះពាល់គាត់បានដែរ។ ខ្ញុំមិនមានការព្រួយបារម្ភអ្វីទេ ព្រោះមានប្រជាពលរដ្ឋរាប់ម៉ឺនរាប់សែននាក់ កំពុងត្រៀមខ្លួនចាំការពារយុត្តិធម៌ជូនគាត់ ព្រោះករណីគាត់ គឺជាករណីនយោបាយ គឺគណបក្សកាន់អំណាចគេចោទប្រកាន់គាត់ដោយខុសច្បាប់ ដោយគ្មានភស្តុតាង ហើយម៉្យាងទៀត ទង្វើរបស់គាត់ គឺជាទង្វើវីរជនស្នេហាជាតិ ការពារទឹកដី ការពារយុត្តិធម៌ជូនប្រជាពលរដ្ឋ។ ដូច្នេះគេទាំងអស់គ្នាចាត់ទុកឯកឧត្ដមប្រធាន សម រង្ស៊ី ជាមនុស្សស្លូតត្រង់ គ្មានទោស ជាជនស្នេហាជាតិ ជាវីរជននៃប្រជាពលរដ្ឋខ្មែរ»។
លោក សម រង្ស៊ី បាននិរទេសខ្លួនទៅប្រទេសបារាំង កាលពីឆ្នាំ២០០៩។ ក្នុងរយៈពេលប៉ុន្មានឆ្នាំកន្លងទៅនេះ លោកធ្លាប់បានប្រកាសជាច្រើនលើកច្រើនសាថា នឹងវិលចូលស្រុកវិញ ប៉ុន្តែមិនដែលបានមកកាន់ប្រទេសកម្ពុជា តាមការប្រកាសនោះឡើយ។
ប្រសិនជាលោកវិលចូលស្រុកវិញមែននោះ លោក សម រង្ស៊ី នឹងត្រូវប្រឈមមុខនឹងការចាប់ខ្លួនដាក់ពន្ធនាគារចំនួន ១២ឆ្នាំ បន្ទាប់ពីតុលាការបានផ្ដន្ទាទោសកំបាំងមុខ ក្រោមបទចោទជាច្រើនករណី រួមមានការផ្សាយផែនទីមិនពិត អំពីព្រំដែនកម្ពុជា ជាមួយវៀតណាម ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។