ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង ថ្លែងនៅថ្ងៃទី៩ ខែសីហា ថា កិច្ចប្រជុំរវាងសង្គមស៊ីវិល និងក្រសួងមហាផ្ទៃ ក្នុងគោលបំណងឲ្យគណបក្សឈ្នះឆ្នោតច្រើនជាងគេចំនួន២ គឺគណបក្សសង្គ្រោះជាតិ និងគណបក្សប្រជាជនកម្ពុជា បង្កើតគណៈកម្មការពិសេសមួយ ដើម្បីដោះស្រាយបញ្ហាសេសសល់។
តំណាងសង្គមស៊ីវិល លោក ធន សារាយ ថ្លែងថា ដោយសារតែមានការចល័តទ័ពច្រើនតែក្នុងទីក្រុង និងខេត្តក្បែរក្រុង មិនពង្រាយទ័ពនៅតាមព្រំដែន ទើបអង្គការក្រៅរដ្ឋាភិបាលចំនួន១០ មកជួប លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មការសន្តិសុខបោះឆ្នោត បំភ្លឺទៅមហាជនពីបំណងទ័ពចល័តនោះផង និងសុំឲ្យក្រសួងមហាផ្ទៃ ជំរុញគណបក្សនយោបាយឈ្នះឆ្នោតទាំង២ បន្ថយកម្ដៅរៀងខ្លួន ដែលនាំឲ្យមានហិង្សា មកជួបចរចាដោះស្រាយភាពមិនប្រក្រតីក្រោយបោះឆ្នោតឆ្នាំ២០១៣។
បញ្ហាចល័តទ័ពនៅក្នុងប្រទេសកម្ពុជា ពី ២ ទៅ ៣ថ្ងៃមកនេះ លោក ស ខេង បំភ្លឺថា ដើម្បីការពារសន្តិសុខ ក្រែងគណបក្សសង្គ្រោះជាតិ អាចធ្វេសប្រហែសនាំឲ្យជនឱកាសនិយម ឆ្លៀតយកពេលមនុស្សប្រមូលផ្តុំច្រើនធ្វើមហាបាតុកម្មអហិង្សា អាចមានអ្នកបន្លំធ្វើសកម្មភាពនាំឲ្យកើតមានអសន្តិសុខនៅក្នុងប្រទេសកម្ពុជា។
លោក ស ខេង ថ្លែងថា យ៉ាងហោចណាស់ គណបក្សឈ្នះឆ្នោតទាំង២ បានជួបគ្នាចរចាបណ្ដើរៗហើយ ប៉ុន្តែការចរចាបង្កើតគណៈកម្មការពិសេសនោះលឿនដល់កម្រិតណា មិនទាន់អាចដឹងច្បាស់នៅឡើយ។
កាលពីព្រឹកថ្ងៃទី៩ ខែសីហា គ.ជ.ប បានចេញសេចក្តីអំពាវនាវឲ្យគណបក្សសង្គ្រោះជាតិ និងគណបក្សប្រជាជនកម្ពុជា ចូលរួមប្រជុំ ដើម្បីសម្រេចបង្កើតគណៈកម្មការពិសេសមួយ សម្រាប់ត្រួតពិនិត្យផ្ទៀងផ្ទាត់របាយការណ៍អំពីភាពមិនប្រក្រតីទាំងឡាយក្នុងថ្ងៃបោះឆ្នោតជ្រើសតាំងតំណាងរាស្ត្រនីតិកាលទី៥ ដែល គ.ជ.ប បានទទួលចាប់ពីថ្ងៃទី២ ដល់ថ្ងៃទី៦ ខែសីហា ឆ្នាំ២០១៣។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានឲ្យដឹងថា គណៈប្រតិភូនៃគណបក្សឈ្នះឆ្នោតទាំង២ គឺគណបក្សសង្គ្រោះជាតិ និងគណបក្សប្រជាជនកម្ពុជា បានជួបគ្នាចរចានៅក្នុងរដ្ឋសភា កាលពីម៉ោង ៩ ដល់ម៉ោង ១១ ថ្ងៃទី៩ ខែសីហា ដើម្បីបង្កើតគណៈកម្មការឯករាជ្យមួយ ត្រួតពិនិត្យបញ្ហាមិនប្រក្រតីក្នុងពេល មុន និងថ្ងៃបោះឆ្នោត។
ការជួបគ្នារវាងតំណាងគណបក្សប្រជាជនកម្ពុជា ជាមួយតំណាងគណបក្សសង្គ្រោះជាតិ នេះ កើតមានក្នុងពេលមានដំណឹងចចាមអារ៉ាមជាច្រើន ទាក់ទងការប្រុងប្រៀបធ្វើមហាបាតុកម្មតវ៉ារបស់អ្នកគាំទ្រគណបក្សសង្គ្រោះជាតិ បើសិនជាមានការប្រកាសលទ្ធផលបោះឆ្នោតដែលមិនត្រឹមត្រូវ និងយុត្តិធម៌។
យោងតាមប្រតិទិននៃការបោះឆ្នោតជ្រើសតាំងតំណាងរាស្ត្រអាណត្តិទី៥ គ.ជ.ប នឹងប្រកាសលទ្ធផលបណ្ដោះអាសន្ននៅថ្ងៃទី១០ សីហា ប្រសិនបើគ្មានគម្រោងបោះឆ្នោតឡើងវិញទេ។ លទ្ធផលបឋមប្រកាសដោយ គ.ជ.ប បានអោយដឹងថា គណបក្សប្រជាជនកម្ពុជា បានទទួលសន្លឹកឆ្នោតគាំទ្រច្រើនជាងគណបក្សសង្គ្រោះជាតិ។ ប៉ុន្តែគណបក្សសង្គ្រោះជាតិ មិនទទួលស្គាល់លទ្ធផលនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។