រដ្ឋមន្ត្រីក្រសួងរ៉ែ និងថាមពល លោក ស៊ុយ សែម នៅព្រឹកថ្ងៃទី១៩ ខែមិថុនា ចូលសភាឆ្លើយបំភ្លឺតាមការកោះហៅរបស់សមាជិកសភាគណបក្សប្រជាជនកម្ពុជា អំពីបញ្ហាមួយចំនួន ពាក់ព័ន្ធនឹងការអភិវឌ្ឍគម្រោងសាងសង់ទំនប់វារីអគ្គិសនីសេសានក្រោម២ ក្នុងខេត្តស្ទឹងត្រែង។
សំណួរដែលសមាជិកសភាសាកសួរទៅកាន់ លោក ស៊ុយ សែម ភាគច្រើន គឺជាសំណួរដែលអង្គការសង្គមស៊ីវិលធ្លាប់បានលើកឡើងកន្លងមក។ ក្នុងពេលជាមួយគ្នា ក៏មានសមាជិកសភាខ្លះឡើងថ្លែងគាំទ្រ និងរៀបរាប់ពីផលប្រយោជន៍ ដែលនឹងទាញបានពីគម្រោងនេះ ហើយក៏វាយប្រហារទៅលើអង្គការសង្គមស៊ីវិល និងក្រុមមនុស្សមួយចំនួន ដែលបានរិះគន់ទៅលើគម្រោងនេះផងដែរ។
សភាដែលមានតែសមាជិកមកពីគណបក្សប្រជាជនកម្ពុជា ចំណាយពេលប្រហែល ២ម៉ោងកន្លះ ដើម្បីសាកសួរ និងស្តាប់ការបំភ្លឺរបស់ លោក ស៊ុយ សែម ដែលភាគច្រើនរដ្ឋមន្ត្រីរូបនេះអានចម្លើយដែលលោកបានត្រៀមទុកជាស្រេចក្នុងក្រដាស ដើម្បីឆ្លើយតបទៅនឹងការចោទសួររបស់តំណាងរាស្ត្រមកពីគណបក្សតែមួយជាមួយលោក។
សំណួរដែលបានចោទសួរដោយតំណាងរាស្ត្រចំនួន ៥រូប ក្នុងចំណោមតំណាងរាស្ត្រដែលឡើងថ្លែងចំនួន ៧រូប គឺពាក់ព័ន្ធទៅនឹងបញ្ហាមួយចំនួន ដែលគម្រោងសាងសង់ទំនប់វារីអគ្គិសនីមួយនេះកំពុងជួបប្រទះ ក្នុងនោះរួមមាន បញ្ហាបន្លាស់ទីប្រជាពលរដ្ឋទៅកាន់ទីកន្លែងថ្មី បញ្ហាផ្តល់ដីឲ្យពលរដ្ឋបង្កបង្កើនផល បញ្ហាកាប់ព្រៃឈើ ការផ្តល់សំណងផ្សេងៗ និងដំណើរការអនុវត្តរបស់ក្រុមហ៊ុន ជាដើម។
ទោះជាយ៉ាងណាក៏ដោយ តំណាងរាស្ត្រភាគច្រើនបានសម្ដែងការគាំទ្រចំពោះការអភិវឌ្ឍគម្រោងវារីអគ្គិសនីនេះ ដោយលើកឡើងថា ជាការអភិវឌ្ឍមួយត្រឹមត្រូវ ដើម្បីឆ្លើយតបនឹងតម្រូវការថាមពលជាក់ស្តែងនៅកម្ពុជា ក្នុងពេលបច្ចុប្បន្ន និងទៅថ្ងៃអនាគត។
ចំណែក លោក ស៊ុយ សែម វិញ លោកបានឆ្លើយតបទៅនឹងសំណួររបស់តំណាងរាស្ត្រ ដោយអានចម្លើយក្នុងក្រដាសដែលលោកបានត្រៀមទុកជាស្រេច។ ក្នុងការឆ្លើយតបនេះ លោក ស៊ុយ សែម ព្យាយាមលើកឡើងអំពីមូលហេតុ និងផលប្រយោជន៍ផ្សេងៗ កើតឡើងពីការអភិវឌ្ឍទំនប់វារីអគ្គិសនីមួយនេះ និងគោលការណ៍ផ្សេងៗសម្រាប់ដោះស្រាយ ក្នុងការអនុវត្តគម្រោង។ ទោះជាយ៉ាងណាក៏ដោយ រដ្ឋមន្ត្រីក្រសួងរ៉ែ និងថាមពល រូបនេះ ទទួលស្គាល់ថា ការអភិវឌ្ឍនូវគម្រោងនេះ ពិតជាធ្វើឲ្យប៉ះពាល់មួយចំនួន តែលោកថា ក៏មានការសិក្សាវាយតម្លៃយ៉ាងហ្មត់ចត់អំពីគម្រោងនេះរួចហើយដែរ។
ចំពោះការតាំងលំនៅឋានថ្មីរបស់ពលរដ្ឋ លោក ស៊ុយ សែម មានប្រសាសន៍ថា រដ្ឋាភិបាលត្រូវអនុវត្តទៅតាមផែនការដែលបានកំណត់រួចហើយ ដែលក្នុងនោះ ពលរដ្ឋក្នុងមួយគ្រួសារទទួលបានដីភូមិទំហំ ១ពាន់ម៉ែត្រការ៉េ និងដីបង្កបង្កើនផលចំនួន ៥ហិកតារ។ ចំណែកបញ្ហាកាប់ព្រៃវិញ លោកថា វាមិនមែនជាសមត្ថកិច្ចរបស់ក្រសួងរ៉ែ និងថាមពល ទេ ប៉ុន្តែវាស្ថិតក្រោមការគ្រប់គ្រងរបស់ក្រសួងកសិកម្ម រីឯការប្រមូលលុយពីការកាប់ឈើវិញ វាជាភារកិច្ចរបស់ក្រសួងសេដ្ឋកិច្ច និងហិរញ្ញវត្ថុ។ លោកថា តួនាទីរបស់ក្រសួងរ៉ែ និងថាមពល គឺធ្វើយ៉ាងណាឲ្យអាងស្អាត និងធ្វើឲ្យទំនប់វារីអគ្គិសនីដំណើរការប៉ុណ្ណោះ។
ថ្លែងទៅកាន់អ្នកសារព័ត៌មានបន្ទាប់ពីកិច្ចប្រជុំ លោក ស៊ុយ សែម អះអាងថា ផលប្រយោជន៍ដែលទទួលបានពីគម្រោងនេះ គឺមានច្រើនជាងផលប៉ះពាល់ដែលកើតចេញពីគម្រោង។ ចំណែកប្រជាពលរដ្ឋវិញ លោកថា ក៏ទទួលបានផលប្រយោជន៍ច្រើនពីគម្រោងនេះផងដែរ៖ «ដីម្នាក់ ៥ហិកតារ ដីបង្កបង្កើនផល ៥ហិកតារ ដីភូមិឲ្យ ១ពាន់ម៉ែត្រការ៉េ ផ្ទះសង់ឲ្យម្នាក់ ៨០ម៉ែត្រការ៉េ គ្រប់គ្នា ម្នាក់ ៨០ម៉ែត្រការ៉េទាំងអស់ គឺមនុស្សមួយគ្រួសារមានតែ ២នាក់ ក៏ ៨០ម៉ែត្រការ៉េ ៥នាក់ក៏ ៨០ម៉ែត្រការ៉េ អាធំ ហើយថ្មក៏បាន ឈើក៏បាន ស្រេចគាត់យកអាណាសង់ឲ្យអាហ្នឹង និងហេដ្ឋារចនាសម្ព័ន្ធ ស្រែភ្លឺឲ្យគាត់ ធារាសាស្ត្រឲ្យគាត់ សាលារៀន ធ្វើឲ្យគាត់ វត្ត មណ្ឌលសុខភាព ធ្វើជូនគាត់ទាំងអស់»។
លោក ស៊ុយ សែម បន្តថា ផ្ទៃដីប៉ះពាល់សរុបដែលពលរដ្ឋត្រូវបាត់បង់ដោយសារគម្រោងវារីអគ្គិសនីសេសានក្រោម២ សរុបចំនួន ៩១០ហិកតារប៉ុណ្ណោះ ប៉ុន្តែលោកថា ចំនួនផ្ទៃដីដែលរដ្ឋាភិបាលសងពួកគាត់វិញ មានរហូតដល់ ៤ពាន់ ៦៤ហិកតារ។
ទោះជាយ៉ាងណាក៏ដោយ គម្រោងដ៏ចម្រូងចម្រាសមួយនេះ កំពុងបន្តដំណើរការសាងសង់ទៅមុខ ដោយពុំទាន់បានដោះស្រាយបញ្ហាឲ្យចប់សព្វគ្រប់ជាមួយប្រជាពលរដ្ឋនៅឡើយ ហើយដែលនៅពេលនេះ ប្រជាពលរដ្ឋខ្លះបានយល់ព្រមទទួលសំណងរួចហើយ ចំណែកពលរដ្ឋមួយចំនួនផ្សេងទៀត ពិសេសពលរដ្ឋដែលបានតាំងទីលំនៅនៅក្នុងតំបន់សាងសង់ទំនប់ជាយូរមកហើយនោះ មិនទាន់យល់ព្រមទទួលសំណងនៅឡើយ ដោយពួកគេលើកឡើងថា សំណងដែលរដ្ឋាភិបាលប្រគល់ឲ្យគេនោះ មិនទាន់សមរម្យ។
គម្រោងសាងសង់ទំនប់វារីអគ្គិសនីសេសានក្រោម២ ដែលអាចផលិតថាមពលអគ្គិសនីចំនួន ៤០០មេហ្គាវ៉ាត់ និងត្រូវចំណាយទឹកប្រាក់សាងសង់ជិត ១ពាន់លានដុល្លារអាមេរិក នេះ កំពុងធ្វើឲ្យប៉ះពាល់ប្រជាពលរដ្ឋជិត ១ពាន់គ្រួសារ។ បើតាម លោក ស៊ុយ សែម គម្រោងសាងសង់នេះអាចបញ្ចប់នៅឆ្នាំ២០១៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។