មេដឹកនាំគណបក្សសង្គ្រោះជាតិ បានស្នើឲ្យរដ្ឋាភិបាល ជួយទប់ស្កាត់សកម្មភាពទំនិញគេចពន្ធ មានដូចជាប្រេងសាំងជាដើម ដែលកំពុងធ្វើសកម្មភាពចូលតាមដែនសមុទ្រខេត្តព្រះសីហនុ។
ប្រជាពលរដ្ឋ និងមន្ត្រីបក្សប្រឆាំងនៅថ្នាក់មូលដ្ឋានចោទថា មន្ត្រីពាក់ព័ន្ធស្ថាប័នជំនាញការពារលំហសមុទ្រជាអ្នកនៅពីក្រោយបទល្មើសនេះ ទើបគ្មានសកម្មភាពបង្ក្រាប។ ប៉ុន្តែការចោទនេះ ត្រូវមន្ត្រីជំនាញបង្ក្រាបបទល្មើសលំហសមុទ្របដិសេធ។
សារអំពាវនាវរបស់លោក កឹម សុខា មេដឹកនាំគណបក្សប្រឆាំងដូច្នេះ កើតឡើងបន្ទាប់មន្ត្រីរាជការថ្នាក់ក្រោម និងប្រជាពលរដ្ឋនាខេត្តព្រះសីហនុ អះអាងថា មានសកម្មភាពរត់ពន្ធទំនិញ ពិសេសប្រេងសាំង បានធ្វើសកម្មភាពក្នុងលំហសមុទ្រខេត្តជាប់មាត់សមុទ្រមួយនេះជាច្រើនឆ្នាំមកហើយ។ លោកបន្តថា សកម្មភាពរត់ពន្ធប្រេងសាំងពីប្រទេសជិតខាងចូលមកកម្ពុជា តាមច្រកផ្សេងៗ ពិសេសតាមលំហសមុទ្រខេត្តព្រះសីហនុ ជាដើម បាននាំឲ្យបាត់ចំណូលថវិកាជាតិ និងតម្លៃសាំងកើនខ្ពស់ជារៀងរាល់ឆ្នាំ។
លោក កឹម សុខា ដែលជាអនុប្រធានសភាផងនោះ បានស្នើដល់លោកនាយករដ្ឋមន្ត្រី ហ៊ុន សែន ឲ្យស៊ើបអង្កេតនិងទប់ស្កាត់ ព្រមទាំងវែករកមុខអ្នកជាប់ពាក់ព័ន្ធសកម្មភាពរត់ពន្ធទំនិញ ឬប្រេងសាំងនាខេត្តព្រះសីហនុ មកមកផ្ដន្ទាទោសតាមច្បាប់។
មេដឹកនាំបក្សប្រឆាំងរូបនេះព្រមានថា នឹងលើកយកសកម្មភាពទំនិញគេចពន្ធ ឬប្រេងសាំងគេចពន្ធ ព្រមទាំងបទល្មើសផ្សេងៗទៀតនាខេត្តព្រះសីហនុ ដាក់ជូនគណៈកម្មការជំនាញរដ្ឋសភាពពិនិត្យ និងស៊ើបអង្កេត ព្រមទាំងឈានដល់កោះហៅអ្នកជាប់ពាក់ព័ន្ធមកបំភ្លឺនៅមន្ទីររដ្ឋសភាជុំវិញបទល្មើសនីមួយៗ៖ «យើងបាននិយាយច្បាស់ៗរឿងរត់ពន្ធទំនិញគេចពន្ធមានប្រេងសាំងជាដើម នាំឲ្យបាត់បង់ចំណូលថវិកាជាតិទៅមេដឹកនាំគណបក្សកាន់អំណាច រួចហើយៗករណីនេះ កុំថាឡើយដំឡើងប្រាក់ខែជូនមន្ត្រីរាជការ បើសិនជាទប់ស្កាត់អំពើពុករលួយទាំងឡាយ ដែលពីការគេចពន្ធនេះ គឺអាចយកមកជួយប្រជាពលរដ្ឋក្រីក្រ ឬជួយព្យាបាលជំងឺជូនពលរដ្ឋក្រីក្រដោយមិនគិតថ្លៃក៏បានដែរ។ បញ្ហាទាំងអស់នេះ មេដឹកនាំគណបក្សប្រជាជនកម្ពុជា ល្មមភ្ញាក់ខ្លួនហើយៗថា ករណីនាំទំនិញគេចពន្ធ មានប្រេងសាំងជាដើមផ្ដាច់មុខនៅកម្ពុជា គឺជាហេតុធ្វើឲ្យមន្ត្រីមានអំណាចក្នុងជួររដ្ឋាភិបាលខ្លួនឯងបានចំណេញច្រើន ប៉ុន្តែតម្លៃសាំងឡើងថ្លៃខ្ពស់ និងបានប៉ះពាល់ដល់មនុស្សគ្រប់គ្នាដែលប្រើប្រាស់ប្រេងប្រចាំថ្ងៃ។ សកម្មភាពនេះ មិនខុសគ្នាទៅនឹងព្រាយបិសាចជញ្ជក់ឈាមទេ»។
ទាក់ទិនបញ្ហានេះ មន្ត្រីរាជការមានឋានៈតូចតាច ប្រជាពលរដ្ឋ និងមន្ត្រីបក្សប្រឆាំងនាខេត្តព្រះសីហនុ សុទ្ធតែបានដឹងឮលើករណីរត់ពន្ធប្រេងសាំង និងអ្នកនៅពីក្រោយបទល្មើសនេះ ថាជាប់ពាក់ព័ន្ធសែស្រឡាយមន្ត្រីជំនាញបង្ក្រាបបទល្មើសតាមលំហសមុទ្រ ឬស្ថាប័នប៉ូលិស និងកងទ័ពជើងទឹកជាដើម។
សមាជិកក្រុមប្រឹក្សាខេត្តព្រះសីហនុ លោក លី ឌី បានទទួលស្គាល់ថា ពិតជាមានករណីរត់ពន្ធប្រេងសាំង និងបទល្មើសនាំទំនិញផ្សេងៗគេចពន្ធតាមដែនសមុទ្រខេត្តនេះពិតមែន។ ប៉ុន្តែលោកស្នើមិនទាន់បញ្ចេញអត្តសញ្ញាណអ្នកជាប់ពាក់ព័ន្ធ ឬនៅពីក្រោយបទល្មើសទាំងនេះទេ។
ករណីនេះ លោកក៏ស្នើដល់ប្រមុខរដ្ឋាភិបាលជួយបញ្ជូនមន្ត្រីឯករាជ្យចុះស៊ើបអង្កេត និងមានវិធានការទប់ស្កាត់សកម្មភាពទំនិញគេចពន្ធ មានប្រេងសាំងជាដើម នាដែនសមុទ្រខេត្តព្រះសីហនុ ឲ្យមានប្រសិទ្ធភាព៖ «នៅខេត្តព្រះសីហនុ អ្នកណាៗក៏បានដឹងដែរថា អ្នកមានអំណាច ១គ្រួសារ ទៅ ២គ្រួសារ ជាអ្នករកស៊ីរត់ពន្ធប្រេង និងទំនិញផ្សេងៗ ហើយមន្ត្រីទាំងនោះគេស្គាល់ទាំងឈ្មោះ និងតួនាទី កំពុងបំរើការងារក្នុងស្ថាប័នជំនាញប្រដាប់អាវុធ ជាពិសេសមានតួនាទីសំខាន់ក្នុងសកម្មភាពបង្ក្រាបបទល្មើសនានា នៅលើលំហសមុទ្រថែមទៀត។ ប៉ុន្តែផ្ទុយទៅវិញ មន្ត្រីមួយចំនួននោះ បាន នៅពីក្រោយបទល្មើសនាំទំនិញ ពិសេសប្រេងសាំងគេចពន្ធចូលតាមដែនសមុទ្រនាខេត្តព្រះសីហនុ ជាយូរឆ្នាំមកហើយ»។
ទាក់ទិនបញ្ហានេះ លោក ឈិត សុខុន អភិបាលខេត្តព្រះសីហនុ មានប្រសាសន៍ថា អាជ្ញាធរពាក់ព័ន្ធកំពុងរឹតបន្តឹង និងមានវិធានការជុំវិញបទល្មើសផ្សេងៗ មានដូចជាបទល្មើសរត់ពន្ធប្រេងសាំង និងបទល្មើសនេសាទជាដើម។
លោកទទួលស្គាល់ថា កន្លងមកពិតជាមានបទល្មើសផ្សេងៗ បានធ្វើសកម្មភាពនៅលើលំហសមុទ្រខេត្តជាប់មាត់សមុទ្រមួយនេះ មានដូចជាប្រេងសាំង និងបទល្មើសនេសាទជាដើមពិតមែន ប៉ុន្តែមានមិនច្រើនទេ។ លោកបង្ហាញពីផលវិបាក និងកង្វះមធ្យោបាយរបស់មន្ត្រីជំនាញក្នុងការចុះបង្ក្រាបបទល្មើសនៅក្នុងលំហសមុទ្រដ៏ធំល្វឹងល្វើយនាខេត្តព្រះសីហនុ៖ «នៅក្នុងខេត្តព្រះសីហនុ គឺមានបង្កើតនូវគណៈកម្មការបង្ក្រាបបទល្មើសផ្សេងៗ មិនថាតែប្រេងសាំងទេ គឺគ្រប់បទល្មើសទាំងអស់ឲ្យតែរកឃើញ។ បទល្មើសនេះនៅក្នុងលំហសមុទ្រដ៏ធំល្វឹងល្វើយ គឺមានបទល្មើសទាំងនេះកើតឡើង ហើយអាជ្ញាធរជំនាញក៏កំពុងចាត់វិធានការទៅលើបទល្មើសទាំងនេះហើយដែរ»។
ចំណែកលោកឧត្ដមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការជួរមុខនៃគណៈកម្មាធិការជាតិ សន្តិសុខលំហសមុទ្រ ឆ្លើយបដិសេធថា មិនមានសកម្មភាពបទល្មើសដឹកទំនិញគេចពន្ធ មានដូចជាប្រេងសាំងគគ្រឹកគគ្រេងកើតមានក្នុងដែនសមុទ្រខេត្តព្រះសីហនុ ដូចការចោទនោះទេ។ លោកថា បទល្មើសទាំងនេះកម្លាំងជំនាញបានឃ្លាំមើលជាប្រចាំ៖ «តាមដែលកម្លាំងជំនាញធ្វើការងារជាក់ស្តែងដូចជាមិនឃើញបទល្មើសរត់ពន្ធទំនិញ ឬប្រេងសាំងកើតមានតាមដែនសមុទ្រខេត្តព្រះសីហនុទេ។ តាមដែលឯកឧត្តម កឹម សុខា បានលើកឡើងពីបទល្មើសប្រេងសាំងគេចពន្ធនេះកើតមាននៅកន្លងណាខ្លះ? ដូចជាមិនមានទេ»។
យ៉ាងនេះក្តី មន្ត្រីរាជការថ្នាក់ក្រោម និងមន្ត្រីគណបក្សប្រឆាំងខេត្តព្រះសីហនុ ចោទថា កងកម្លាំងក្នុងជួរកងទ័ពជើងទឹក និងប៉ូលិសជើងទឹកជាដើម បាននៅពីក្រោយបទល្មើសនាំទំនិញគេចពន្ធពីប្រទេសជិតខាង មានប្រេងសាំងជាដើម ចូលមកកម្ពុជា តាមខេត្តជាប់មាត់សមុទ្រមានខេត្តព្រះសីហនុ ហើយថា បទល្មើសទាំងនេះ គ្មានស្ថាប័នណាមួយហ៊ានចេញមុខបង្ក្រាប ឬទប់ស្កាត់ទេកន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។