ប្រធានក្រុមស្រាវជ្រាវផែនទីកម្ពុជា-វៀតណាម នៃរាជបណ្ឌិត្យសភាកម្ពុជា លោកបណ្ឌិត សុខ ទូច កាលពីថ្ងៃទី២៧ សីហា ផ្ញើលិខិតជូនលោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដើម្បីខ្ចីផែនទីយកមកផ្ទៀងផ្ទាត់ជាមួយផែនទីដែលក្រុមស្រាវជ្រាវទទួលបានពីភាគីនានា។
ការស្នើសុំរបស់លោកបណ្ឌិត សុខ ទូច ធ្វើឡើងមួយថ្ងៃក្រោយពីលោក អ៊ុំ សំអាន បានសរសេរអះអាងនៅលើបណ្ដាញសង្គមហ្វេសប៊ុក (Facebook) របស់លោកពីសហរដ្ឋអាមេរិកថា លោកបានរកឃើញផែនទីបោន (Bonnes) ខ្នាត ១/១០០.០០០ ចំនួន ២៦ផ្ទាំង ទាំងផែនទី ឌីជីថល (Digital) និងផែនទីក្រដាសពីបណ្ណាល័យសភាសហរដ្ឋអាមេរិក។
លោក អ៊ុំ សំអាន បញ្ជាក់ដែរថា គឺផែនទីបោនខ្នាត ១/១០០.០០០ ចំនួន ២៦ផ្ទាំងនេះហើយ ដែលអតីតព្រះមហាក្សត្រខ្មែរ សម្ដេចព្រះ នរោត្តម សីហនុ ដែលកាលពីឆ្នាំ១៩៦៤ ព្រះអង្គបានយកទៅស្នើសុំឲ្យសហរដ្ឋអាមេរិក និងអន្តរជាតិទទួលស្គាល់ខ្សែព្រំដែនប្រទេសកម្ពុជា។ លោក អ៊ុំ សំអាន បញ្ជាក់បន្ថែមថា ផែនទីដែលលោករកឃើញនោះ គឺមិនមានត្រា និងហត្ថលេខាពីលើដូចផែនទីរបស់រដ្ឋាភិបាលឡើយ។
ក្រុមស្រាវជ្រាវផែនទីកម្ពុជា-វៀតណាម នៃរាជបណ្ឌិត្យសភាកម្ពុជា កាលពីថ្ងៃទី១៤ សីហា បានផ្ទៀងផ្ទាត់ផែនទីដែលខ្លួនទទួលបានពីភាគីនានារួចហើយ ក្នុងនោះរួមមានផែនទីរបស់រដ្ឋាភិបាលចំនួន ២៦ផ្ទាំង ផែនទីពីគណបក្សសង្គ្រោះជាតិ ចំនួន ២៤ផ្ទាំង ផែនទីពីបណ្ណាល័យព្រឹទ្ធសភាសហរដ្ឋអាមេរិក ចំនួន ២៦ផ្ទាំង ផែនទីពីអង្គការសហប្រជាជាតិ ចំនួន ១៨ផ្ទាំង និងផែនទីពីបណ្ណាល័យវិទ្យាស្ថានភូមិសាស្ត្រជាតិបារាំង ចំនួន ២៦ផ្ទាំង។ ក្រោយការផ្ទៀងផ្ទាត់ក្រុមស្រាវជ្រាវអះអាងថា ផែនទីទាំងអស់គឺសុទ្ធតែដូចគ្នាទៅនឹងផែនទីរបស់រដ្ឋាភិបាលដែលកំពុងប្រើប្រាស់ក្នុងការបោះបង្គោលព្រំដែនជាមួយប្រទេសវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។