មន្ត្រីអង្គការក្រៅរដ្ឋាភិបាល និងប្រជាពលរដ្ឋមួយចំនួន រស់នៅខេត្តកំពង់ឆ្នាំង បានបញ្ជាក់នៅព្រឹកថ្ងៃទី២៤ ខែកញ្ញា ថា ស្ថានភាពសិទ្ធិមនុស្ស សេដ្ឋកិច្ច និងស្ថានភាពនយោបាយនៅកម្ពុជា អាចនឹងមានការរង្គោះរង្គើខ្លាំង ប្រសិនបើអ្នកនយោបាយនៅតែមិនចុះសម្រុងគ្នា ឬនៅតែជម្នះបង្កើតរដ្ឋសភា និងរដ្ឋាភិបាល ដោយពុំមានការចូលរួមពីខាងគណបក្សប្រឆាំង។
នាយិកាសមាគមសកម្មភាពដើម្បីបរិស្ថាន និងសហគមន៍ (AEC) អ្នកស្រី ស សាត មានប្រសាសន៍ថា ប្រជាពលរដ្ឋអាចនឹងមានការងើបឡើងតវ៉ាចំពោះការបង្កើតសភា និងរដ្ឋាភិបាលអាណត្តិទី៥ ដែលមិនបានបម្រើឆន្ទៈពិតប្រាកដរបស់ពួកគាត់។ អ្នកស្រីបន្តថា កងកម្លាំងប្រដាប់អាវុធ ដូចជាប៉ូលិស ប៉េអិម និងទាហាន មិនត្រូវប្រើអំពើហិង្សាដាក់ប្រជាពលរដ្ឋឡើយ ប្រសិនមានការបញ្ចេញមតិ ឬការប្រមូលផ្ដុំគ្នាតវ៉ា ដើម្បីបង្ហាញអំពីឆន្ទៈរបស់ពួកគាត់នោះ៖ «សេដ្ឋកិច្ចវិញកុំថាឡើយទៅមុខទៀត គ្រាន់តែបច្ចុប្បន្ន ឥឡូវហ្នឹងក៏ធ្លាក់ចុះហើយដែរ ដោយសារអី? ដោយសារជាប់គាំងខាងផ្នែកនយោបាយ ហើយរាស្ដ្រគាត់ដឹង គាត់ដឹងថាអ្វីដែលគាត់បានធ្វើ ហើយមិនពេញចិត្តរបស់គាត់ គឺគាត់មិនអាចទទួលយកបានទេ»។
មន្ត្រីសម្របសម្រួលអង្គការសិទ្ធិមនុស្សលីកាដូ (Licadho) ប្រចាំខេត្តកំពង់ឆ្នាំង លោក គង់ ច័ន្ចមុនី មានប្រសាសន៍ថា លោកមានការសោកស្ដាយចំពោះកិច្ចប្រជុំសភា និងការបង្កើតរដ្ឋាភិបាលថ្មីដោយពុំមានវត្តមានរបស់តំណាងរាស្ត្រគណបក្សសង្គ្រោះជាតិ។ លោកបន្តថា ការអនុវត្តបែបនេះ អាចធ្វើឲ្យមជ្ឈដ្ឋានអន្តរជាតិមិនទទួលស្គាល់រដ្ឋាភិបាល និងអាចមានការកើតទុក្ខមិនសុខចិត្តពីសំណាក់ប្រជាពលរដ្ឋម្ចាស់ឆ្នោតទៀតផង៖ «ពេលនោះឯង មានអ្នកដែលតវ៉ាគាត់តវ៉ាឡើង ហើយដែលបានទទួលថាគឺជារដ្ឋាភិបាល ៥០ បូក ១ ហ្នឹង គាត់អនុវត្តច្បាប់ទៅមានការបង្ក្រាបមានអីហ្នឹង វាធ្ងន់ធ្ងរធ្វើឲ្យរំលោភសិទ្ធិមនុស្ស»។
លោកបញ្ជាក់ថា ក្នុងកាលៈទេសៈដែលមានការជាប់គាំង ឬមានភាពចម្រូងចម្រាសខ្លាំងខាងផ្នែកនយោបាយ អ្នកនយោបាយខ្មែរគួរតែងាកមកជជែកគ្នារឿងនយោបាយឲ្យបានចប់សព្វគ្រប់សិន មុននឹងអនុវត្តច្បាប់ ដើម្បីបង្កើតរដ្ឋសភា ឬរដ្ឋាភិបាលអាណត្តិថ្មី។
ចំណែកឯប្រជាពលរដ្ឋរស់នៅក្រុងកំពង់ឆ្នាំង លោក ជួន ថាច មានប្រសាសន៍ថា លោកមិនទទួលស្គាល់ និងឲ្យតម្លៃចំពោះរដ្ឋាភិបាលដែលបង្កើតឡើងដោយឯកបក្សនោះទេ។ ដូច្នេះ លោកស្នើសុំដល់អ្នកនយោបាយទាំងអស់ ងាកមកចរចាគ្នាឡើងវិញ ដើម្បីកុំឲ្យស្ថានការណ៍នយោបាយ សេដ្ឋកិច្ច និងសិទ្ធិមនុស្សកាន់តែធ្លាក់ចុះខ្លាំង៖ «លុះណាតែអ្វីៗវាស្របនឹងច្បាប់ អាហ្នឹងបានខ្ញុំទទួលស្គាល់។ សហគមន៍អន្តរជាតិនឹងដាក់គំនាបសេដ្ឋកិច្ច ការផ្ដាច់ជំនួយមកលើអង្គការក្រៅរដ្ឋាភិបាលផ្សេងៗ ហើយនិងការកម្ចីប្រាក់ពីបរទេសអី គឺយើងមិនអាចឲ្យយើងខ្ចីបុលតទៅទៀតទេ។ សេដ្ឋកិច្ចកម្ពុជា នឹងធ្លាក់ចុះខ្លាំងមែនមែនទែន ដើរថយក្រោយមហិមាហើយ»។
អ្នកវិភាគនយោបាយឯករាជ្យ លោកបណ្ឌិត សុខ ទូច មានប្រសាសន៍ថា ប្រជាពលរដ្ឋម្ចាស់ឆ្នោតនឹងមានការងើបឡើងតវ៉ា ក៏ប៉ុន្តែប្រសិនបើពុំមានការគាំទ្រ ឬធ្វើឲ្យមានចរន្តនយោបាយពីអ្នកនយោបាយខាងលើទេនោះ ប្រជាពលរដ្ឋខិតខំយ៉ាងណាក៏ពុំមានការផ្លាស់ប្ដូរដែរ៖ «ច្រកល្អស្ថាប័នសភាឲ្យនៅក្នុងដៃការគ្រប់គ្រងរបស់គណបក្សប្រឆាំងឲ្យបានច្រើនបន្តិចទៅ ដើម្បីឲ្យត្រួតពិនិត្យនៅក្នុងស្ថាប័នអង្គនីតិប្រតិបត្តិ»។
តំណាងរាស្ត្រជាប់ឆ្នោតរបស់គណបក្សប្រជាជនកម្ពុជា ដែលប្រកាសដោយគណៈកម្មាធិការជាតិរៀបចំការបោះឆ្នោត (គ.ជ.ប) ចំនួន ៦៨រូប បានចូលប្រជុំសភាលើកដំបូងក្រោមព្រះរាជាធិបតីភាពរបស់ព្រះមហាក្សត្រ នៅថ្ងៃទី២៣ ខែកញ្ញា ឆ្នាំ២០១៣ ដោយពុំមានវត្តមានរបស់តំណាងរាស្ត្រជាប់ឆ្នោតទាំង ៥៥រូប ពីខាងគណបក្សសង្គ្រោះជាតិ ឡើយ។
តំណាងរាស្ត្ររបស់គណបក្សសង្គ្រោះជាតិ នៅតែធ្វើពហិការមិនចូលរួមប្រជុំសភា ដោយយល់ថា ការបោះឆ្នោតជ្រើសតាំងតំណាងរាស្ត្រនីតិកាលទី៥ ប្រព្រឹត្តទៅមិនសេរី ត្រឹមត្រូវ និងយុត្តិធម៌។ ទោះជាយ៉ាងណា សមាជិកសភាមកពីគណបក្សប្រជាជនកម្ពុជា ទាំង ៦៨រូប នៅថ្ងៃទី២៤ ខែកញ្ញា នៅតែជម្នះបើកប្រជុំសភា និងបានបោះឆ្នោតកញ្ចប់ជ្រើសតាំង លោក ហេង សំរិន ជាប្រធានសភា និងជ្រើសតាំង លោក ហ៊ុន សែន ជានាយករដ្ឋមន្ត្រី សម្រាប់នីតិកាលទី៥ នេះបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។