ចំពោះចម្លើយតបទៅគណបក្សសង្គ្រោះជាតិ វិញនោះ លោកបញ្ជាក់ថា នឹងផ្តល់នៅមុនពេលប្រកាសលទ្ធផលឆ្នោតរបស់គណៈកម្មាធិការជាតិរៀបចំការបោះឆ្នោត។
លោកបន្តថា ក្នុងការប្រជុំកាលពីថ្ងៃទី៩ សីហា កន្លងមកនេះ ដើម្បីបង្កើតគណៈកម្មការរួមគ្នា ដើម្បីដោះស្រាយបញ្ហាមិនប្រក្រតីកើតឡើងក្នុងពេលបោះឆ្នោត គឺមានចំណុចមិនឯកភាពគ្នាត្រង់ថា គណបក្សសង្គ្រោះជាតិ បានស្នើសុំឱ្យមានអង្គការសហប្រជាជាតិ និងសហគមន៍អន្តរជាតិចូលរួម ប៉ុន្តែលោកបញ្ជាក់ថា វាមិនមានច្បាប់ណាចែងចំពោះសមាសភាពរបស់អង្គការសហប្រជាជាតិ ដែលត្រូវចូលរួមនោះទេ ពីព្រោះវាជារឿងផ្ទៃក្នុងរបស់កម្ពុជា។ ចំពោះសំណើរបស់បក្សសង្គ្រោះជាតិ មិនឱ្យមានសមាសភាពរបស់ គ.ជ.ប ចូលរួមក្នុងគណៈកម្មការចម្រុះ គឺជារឿងមិនត្រឹមត្រូវនោះឡើយ។
លោក ជាម យៀប៖ «វាង គ.ជ.ប ធ្វើម៉េចនឹងកើត គេសមត្ថកិច្ចដែលច្បាប់បានចែងនៅក្នុងរដ្ឋធម្មនុញ្ញ ហើយនិងនៅក្នុងច្បាប់បោះឆ្នោត គឺថា គ.ជ.ប ទទួលផ្តាច់មុខក្នុងការរៀបចំនូវលក្ខខណ្ឌ ឬក៏ការប្រព្រឹត្តទៅ ឬក៏គ្រប់គ្រងរាល់ការងារបោះឆ្នោតទាំងសកល និងអសកលនៅទូទាំងប្រទេស។ អាហ្នឹងមានតែ គ.ជ.ប មួយទេ មិនអាចឃ្លាតឆ្ងាយពី គ.ជ.ប បានទេ។ អ្នកឯទៀតគ្មានសមត្ថភាពគ្មានប្រជាមតិឯណាជាង គ.ជ.ប ដែលគេធ្វើ ៤អាណត្តិមកហើយៗពេញឆ្នាំហើយ។ ហើយរៀងរាល់ឆ្នាំ នៅរវាងខែ១០ គ.ជ.ប តែងតែធ្វើការអាប់ដេត (Update = ធ្វើបច្ចុប្បន្នភាព) គឺថា បច្ចុប្បន្នភាពដើម្បីចុះឈ្មោះសម្រាប់អ្នកដែលដល់អាយុចុះឈ្មោះបោះឆ្នោតបោះអី គេធ្វើរៀងរាល់ឆ្នាំរបស់គេ»។
ចំពោះបញ្ហានេះ ប្រធានក្រុមអ្នកតំណាងរាស្ត្រគណបក្សសង្គ្រោះជាតិ លោក សុន ឆ័យ បានឱ្យដឹងដែរថា ខាងគណបក្សសង្គ្រោះជាតិ បានស្នើសុំឱ្យមានសមាសភាពចូលរួមក្នុងគណៈកម្មការចម្រុះនោះ គឺជាអ្នកដែលមានបទពិសោធន៍ក្នុងរឿងបោះឆ្នោត ដូចជាអង្គការអន្តរជាតិ និងខាងសង្គមស៊ីវិលជាដើម។
លោកបន្តថា គ.ជ.ប វិញ មិនគួរស្ថិតនៅក្នុងសមាសភាពគណៈកម្មការចម្រុះនោះទេ ពីព្រោះ គ.ជ.ប ជាអ្នកបង្កបញ្ហា ហើយខាងគណបក្សសង្គ្រោះជាតិ គឺរង់ចាំតែចម្លើយពីខាងគណបក្សប្រជាជនកម្ពុជា នោះទេ។
កាលពីថ្ងៃទី៩ សីហា មានកិច្ចប្រជុំអស់រយៈពេលជិត ២ម៉ោង នៅវិមានរដ្ឋសភា រវាងមន្ត្រីតំណាងគណបក្សសង្គ្រោះជាតិ និងតំណាងគណបក្សប្រជាជនកម្ពុជា។ នៅក្នុងកិច្ចប្រជុំនោះ បានលើកឡើងជុំវិញការបង្កើតគណៈកម្មការឯករាជ្យមួយ ដើម្បីស៊ើបអង្កេតជុំវិញភាពមិនប្រក្រតីនៅថ្ងៃបោះឆ្នោត និងការរាប់សន្លឹកឆ្នោត កាលពីថ្ងៃទី២៨ កក្កដា កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។