មន្ត្រីនាំពាក្យក្រសួងការបរទេសថៃ បដិសេធថា មិនបានបញ្ជូនពលករខ្មែរខុសច្បាប់ទៅរកការងារធ្វើនៅប្រទេសថៃ ដ៏ច្រើនសន្ធឹកសន្ធាប់វិលមកកម្ពុជា ទាំងបង្ខំ ឬប្រើហិង្សាលើរាងកាយដូចសារព័ត៌មានមួយចំនួនចុះផ្សាយទេ។ បញ្ហានេះ មន្ត្រីក្រសួងការបរទេសកម្ពុជា ថ្លែងថា កំពុងពិនិត្យលើបញ្ហាបញ្ជូនពលករខ្មែរនេះ ដោយយកចិត្តទុកដាក់ និងបន្តទំនាក់ទំនងល្អជាមួយថៃ ជាធម្មតា។
អ្នកនាំពាក្យក្រសួងការបរទេសថៃ លោក សេក វណ្ណមេធី បានឲ្យដឹងនៅក្នុងលិខិតចុះថ្ងៃទី១៣ ខែមិថុនា ដោយច្រានចោលរាល់ការចុះផ្សាយព័ត៌មានដែលថា ថៃ បានបញ្ជូនពលករខ្មែរខុសច្បាប់ដោយហិង្សា ឬបំផ្លាញឯកសារធ្វើដំណើររបស់ពលករខ្មែរ ចូលទៅប្រទេសថៃ ទាំងស្រប និងខុសច្បាប់។
អ្នកនាំពាក្យរូបនេះចាត់ទុកការវិលត្រឡប់របស់ពលករខ្មែរខុសច្បាប់ពីប្រទេសថៃ មកកម្ពុជា ប៉ុន្មានថ្ងៃមកនេះ គឺធ្វើដោយការស្ម័គ្រចិត្ត ព្រោះពលករខុសច្បាប់ទាំងនោះ បានស្ម័គ្រចិត្តរាយការណ៍ដល់អាជ្ញាធរថៃ ហើយការិយាល័យអន្តោប្រវេសន៍ថៃ ខេត្តស្រះកែវ បានសហការជាមួយផ្នែកពាក់ព័ន្ធជួយសម្រួលលើផ្នែកដឹកតែប៉ុណ្ណោះ មិនមែនជាការចាប់បង្ខំពលករកម្ពុជា ឲ្យវិលត្រឡប់មកកម្ពុជា នោះទេ។
ទាក់ទិនបញ្ហានេះ លោក កុយ គួង មន្ត្រីនាំពាក្យក្រសួងការបរទេសកម្ពុជា ថ្លែងថា មានព្រភពខុសគ្នាជុំវិញការបញ្ជូនពលករខ្មែរខុសច្បាប់ពីប្រទេសថៃ ពេលនេះ។ លោកថា សម្រាប់ភាគីថៃ បានអះអាងថា នៅបន្តទំនាក់ទំនងជាមួយកម្ពុជា ជាធម្មតា ហើយបដិសេធថា មិនបានរំលោភដល់សិទ្ធិពលករខ្មែរខុសច្បាប់ទាំងនោះទេ៖ «មួយទៀតអ្នកនាំពាក្យក្រសួងការបរទេសថៃ ក៏គេបានបញ្ជាក់ដែរថា ចំណុចខ្លះដោយសារពលករខ្លួនឯងមានការភ័យខ្លាច ដោយសារតែព័ត៌មានចចាមអារ៉ាមតទៅមាត់មួយទៅមាត់មួយហ្នឹង ពលករមួយចំនួនក៏ស្ម័គ្រចិត្តទៅស្ថានីយប៉ូលិស ដើម្បីឲ្យសមត្ថកិច្ចថៃ ជួយសម្រួលការដឹកជញ្ជូនគេត្រឡប់មកប្រទេសខ្មែរយើងវិញ។ អាហ្នឹងតាមការបញ្ជាក់ខាងភាគីថៃ នោះបាទ»។
បញ្ហានេះ លោក កុយ គួង បញ្ជាក់ថា មន្ត្រីការទូតកម្ពុជា និងថៃ បានបន្តធ្វើការងារជាមួយគ្នាជាធម្មតា ហើយថា ការបញ្ជូនពលករខុសច្បាប់ពីប្រទេសថៃ មិនមែនមានតែពលករខុសច្បាប់កម្ពុជា ទេ គឺមានពលករខុសច្បាប់ប្រទេសផ្សេងៗទៀត ក៏ត្រូវអនុវត្តដូចគ្នាដែរ៖ «មួយទៀតដែលធ្វើឲ្យពលករខ្មែរយើងវិលត្រឡប់មកច្រើននោះ គឺអាជ្ញាធរយោធាថៃ ហ្នឹងគេមិនបានបណ្ដេញទេ ក៏ប៉ុន្តែគេតម្រូវឲ្យក្រុមហ៊ុន សហគ្រាស រោងចក្រឯកជនថៃ ហ្នឹង បញ្ឈប់ការប្រើប្រាស់ពលករខុសច្បាប់។ ដូច្នេះហើយ សហគ្រាសឯកជន សហគ្រាសរោងចក្រ និងក្រុមហ៊ុនទាំងអស់នោះ គឺដើម្បីជៀសវាងផ្ដន្ទាទោសដោយតុលាការយោធាថៃ គេបានប្រាប់ដល់ពលករមិនស្របច្បាប់ផ្សេងៗហ្នឹងត្រឡប់មកស្រុកវិញ ហើយក្នុងហ្នឹងក៏មានពលករខ្មែរយើងដែរ។ ហើយខ្ញុំសូមបញ្ជាក់ថា អារឿងបញ្ជូនពលករឲ្យត្រឡប់មកស្រុកវិញ មិនមែនប្រាប់តែពលករខ្មែរខុសច្បាប់ទេ គឺប្រាប់ដល់ពលករខ្មែរខុសច្បាប់ទូទៅ ក្នុងហ្នឹងមានពលករខុសច្បាប់ភូមា ឬមីយ៉ាន់ម៉ា និងពលករខុសច្បាប់ឡាវ ផងដែរ»។
ត្រង់ចំណុចនេះ អ្នកនាំពាក្យក្រសួងការបរទេសថៃ លោក សេក វណ្ណមេធី ក៏បានបញ្ជាក់ក្នុងលិខិតថា អាជ្ញាធរថៃ បានយល់ច្បាស់ពីសារសំខាន់របស់ពលករប្រទេសជិតខាង ក្នុងការជួយជំរុញសេដ្ឋកិច្ចប្រទេសថៃ ទើបត្រូវរៀបចំការគ្រប់គ្រងឲ្យមានជាប្រព័ន្ធ និងឯកភាពគ្នា ព្រមទាំងកម្ចាត់ការស្វែងរកផលប្រយោជន៍ពីការនាំចូលពលករកម្ពុជា ចូលប្រទេសថៃ ខុសច្បាប់ ដើម្បីការពារបញ្ហាកេងប្រវ័ញ្ចកម្លាំងពលកម្ម និងការជួញដូរមនុស្ស។ ជាងនេះ បើសិនជានៅថ្ងៃអនាគត ពលករកម្ពុជា ដែលវិលត្រឡប់មកកម្ពុជា មានបំណងវិលត្រឡប់ទៅរកការងារធ្វើនៅប្រទេសថៃ វិញ ក្រសួងការបរទេសថៃ ណែនាំអោយពលករកម្ពុជា ទាំងអស់ ត្រូវបង្ហាញបំណងតាមរយៈបែបបទការជួលពលករ និងធ្វើដំណើរចូលមកប្រទេសថៃ ឲ្យបានត្រឹមត្រូវ និងស្របច្បាប់។
បញ្ហានេះដែរ គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា ឬហៅកាត់ជាភាសាអង់គ្លេស ច្រាក់ (CHRAC) ដែលជាសម្ព័ន្ធអង្គការសមាគមមិនមែនរដ្ឋាភិបាលក្នុងស្រុកចំនួន២១ បានថ្កោលទោសរដ្ឋាភិបាលយោធាថៃ ដែលបណ្ដេញពលករចំណាកស្រុកកម្ពុជា ដ៏សម្បើម និងស្នើឲ្យភាគីថៃ ត្រូវគិតដល់ការគោរពសិទ្ធិមនុស្ស។
សេចក្តីថ្លែងការណ៍ចុះថ្ងៃទី១២ ខែមិថុនា បានអំពាវនាវចំពោះរដ្ឋាភិបាលថៃ ត្រូវប្រព្រឹត្តមកលើពលករចំណាកស្រុកកម្ពុជា ប្រកបដោយមនុស្សធម៌ ព្រមទាំងគោរពសិទ្ធិ និងសេចក្តីថ្លៃថ្នូររបស់ពួកគេ។ សេចក្តីថ្លែងការណ៍ដដែលកត់សម្គាល់ថា ចាប់តាំងពីថ្ងៃទី០១ ខែមិថុនា មក មានពលករកម្ពុជា ប្រហែល ៤ម៉ឺននាក់ បានចាកចេញដោយខ្លួនឯង ឬត្រូវបណ្ដេញចេញដោយបង្ខំពីប្រទេសថៃ ដោយរដ្ឋាភិបាលយោធាថៃ។
ជាងនេះ មន្ត្រីស៊ើបអង្កេតនៃសមាគមអាដហុក (adhoc) ខេត្តបន្ទាយមានជ័យ បានទទួលសាក្សីដែលគួរជឿបានថា មានពលករចំណាកស្រុក ៩នាក់ ត្រូវថៃ បាញ់សម្លាប់ ឬវាយដំពីកម្លាំងប្រដាប់អាវុធយោធាថៃ ថែមទៀត។
បន្ថែមលើសេចក្តីថ្លែងការណ៍ លោក សួន ប៊ុនស័ក្តិ ប្រធានលេខាធិការដ្ឋានគណៈកម្មាធិការប្រព្រឹត្តិកម្ម បានស្នើឲ្យប្រទេសថៃ គោរពច្បាប់ និងសេចក្តីថ្លៃថ្នូររបស់មនុស្ស។ លោកថា សេចក្តីថ្លៃថ្នូររបស់មនុស្ស គឺជាសិទ្ធិមូលដ្ឋានមានចែងក្នុងមាត្រា១ នៃសេចក្តីប្រកាសជាសកលស្ដីពីសិទ្ធិមនុស្ស (UNDHR) ដែលទាំងប្រទេសថៃ និងកម្ពុជា ជាប្រទេសហត្ថលេខី៖ «ខ្ញុំគិតថាអ្វីដែលជាទង្វើរបស់រដ្ឋាភិបាលថៃ បច្ចុប្បន្ន ធ្វើចំពោះពលករចំណាកស្រុកកម្ពុជា ហ្នឹង គឺជ្រុលដៃ ហើយសាហាវ និងអមនុស្សធម៌ហើយ។ រឿងនេះ គឺបំពារបំពានទៅលើសិទ្ធិមនុស្ស ក៏ដូចជាសេចក្តីថ្លៃថ្នូររបស់មនុស្ស ដូចមានចែងនៅក្នុងសេចក្តីថ្លែងការណ៍ជាសកលអង្គការសហប្រជាជាតិ ដែលមនុស្សជាតិជាទូទៅនៅលើសកលលោក បានទទួលស្គាល់តម្លៃមនុស្សជាតិទាំងអស់គ្នាហ្នឹង។ ដូច្នេះរដ្ឋាភិបាលថៃ ក្នុងឋានៈជារដ្ឋមួយដែលមានអរិយធម៌ខ្ពង់ខ្ពស់គួរសមដែរ គឺមិនគួរណាប្រព្រឹត្តទៅលើជនកម្ពុជា យ៉ាងដូច្នេះទេ»។
លោក សួន ប៊ុនសក្តិ ក្នុងនាមអង្គការការពារសិទ្ធិមនុស្សក្រៅរដ្ឋាភិបាលនៅកម្ពុជា នៅតែចាត់ទុករដ្ឋាភិបាលយោធាថៃ ថាបានបណ្ដេញពលករខ្មែរទាំងបង្ខំ ដោយការដាក់ពួកគេក្នុងឡានទ្រុងណែនតាន់តាប់ដូចសត្វធាតុ។
ដូចគ្នាដែរសម្រាប់ លោក សម រង្ស៊ី ប្រធានគណបក្សសង្គ្រោះជាតិ នៅក្នុងសន្និសីទកាសែត ព្រឹកថ្ងៃទី១៣ ខែមិថុនា បានចាត់ទុកការបញ្ជូនពលករខ្មែររបស់អាជ្ញាធរថៃ ថាជារឿងធ្ងន់ធ្ងរមួយសម្រាប់កម្ពុជា។ ករណីនេះ លោក សម រង្ស៊ី បានស្នើឲ្យ លោក ប្រាយុទ្ធ ចាន់អូចា នាយករដ្ឋមន្ត្រីថៃ ត្រូវឲ្យមានមនុស្សធម៌ដល់ប្រជាពលរដ្ឋខ្មែរ និងស្នើឲ្យអនុវត្តច្បាប់គោលការណ៍មនុស្សធម៌សម្រាប់ពលករខ្មែរគ្រប់ៗរូប។
ក្រសួងការងារនឹងរៀបចំផ្ដល់សេវាការងារ និងបណ្ដុះបណ្ដាលជំនាញដល់ពលករខ្មែរដែលត្រូវថៃ បញ្ជូនមកកម្ពុជា
ទាក់ទងនឹងការបញ្ជូនពលករខ្មែរពីប្រទេសថៃ មកកម្ពុជា វិញនេះ ក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី១៣ ខែមិថុនា បានចេញសេចក្តីប្រកាសជូនដំណឹងថា ក្រសួងនឹងរៀបចំការផ្តល់សេវាការងារ និងការបណ្តុះបណ្តាលជំនាញ បច្ចេកទេស និងវិជ្ជាជីវៈ ជូនដល់ពលករខ្មែរដែលត្រូវថៃ បញ្ជូនមកកម្ពុជា វិញ។
សេចក្តីជូនដំណឹងដដែលបន្តថា វគ្គបណ្តុះបណ្តាលបច្ចេកទេសទាំងនោះរួមមាន ជំនាញផ្នែកឧស្សាហកម្ម បច្ចេកទេស សិប្បកម្ម សេវាកម្ម ទេសចរណ៍ និងកសិកម្ម ដែលមានរយៈពី១សប្ដាហ៍ដល់ ៤ខែ។ ចំពោះព័ត៌មានបន្ថែម ពលករអាចទៅសាកសួរនៅស្តង់ចល័តរបស់ទីភ្នាក់ងារជាតិមុខរបរ និងការងារ ឬទំនាក់ទំនងទៅកាន់មជ្ឈមណ្ឌលការងាររបស់ក្រសួង នៅតាមបណ្ដារាជធានី ខេត្តទាំង៣៨ ឬទូរស័ព្ទមកកាន់លេខ ០១២ ៦៧២ ៦៤៤ ឬ ០១២ ២២៣ ១៨៩ ឬ ០១៧ ៨៥៥ ១៤៨៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។