រយៈពេល ៥ខែ ដើមឆ្នាំ២០១៥ នេះ ទាហានការពារព្រំដែនថៃ នៃខេត្តស៊ីសាកេត និងខេត្តសុរិន្ទ ដែលជាប់ព្រំដែនគ្នាជាមួយខេត្តឧត្តរមានជ័យ របស់ខ្មែរ បានបន្ថយសកម្មភាពបាញ់សម្លាប់ប្រជាពលរដ្ឋខ្មែរ ដែលឆ្លងដែនទៅកាប់ឈើគ្រញូងខុសច្បាប់។ ចំណែកការចាប់ខ្លួនប្រជាពលរដ្ឋខ្មែរដែលឆ្លងដែនទៅកាប់ឈើខុសច្បាប់ ក៏នៅតែកើតមានជាហូរហែ។
មន្ត្រីទំនាក់ទំនងព្រំដែនកម្ពុជា-ថៃ នៅខេត្តឧត្តរមានជ័យ ឱ្យដឹងថា ពេលបច្ចុប្បន្នថ្វីត្បិតតែព័ត៌មានអំពីការបាញ់សម្លាប់ដោយទាហានថៃ មិនសូវលេចឭក៏ដោយ ក៏ប្រជាពលរដ្ឋខ្មែរខ្លះនៅតែបន្តនាំគ្នាឆ្លងដែនទៅកាប់ឈើគ្រញូង ខុសច្បាប់ក្នុងទឹកដីថៃ ដើម្បីយកមកលក់ដូរនៅឡើយ។ ការអះអាងរបស់មន្ត្រីទំនាក់ទំនងព្រំដែនខ្មែរនេះ ធ្វើឡើងបន្ទាប់ពីទាហានថៃ នៃខេត្តស៊ីសាកេត បានចាប់ខ្លួនប្រជាពលរដ្ឋខ្មែរដែលឆ្លងដែនទៅកាប់ឈើក្នុងទឹកដីថៃ ហើយបញ្ជូនត្រឡប់មកឱ្យអាជ្ញាធរខ្មែរវិញជាបន្តបន្ទាប់។
អនុប្រធានក្រុមការងារទំនាក់ទំនងព្រំដែនកម្ពុជា-ថៃ ប្រចាំច្រកជាំសាង៉ាំ នៃស្រុកអន្លង់វែង ខេត្តឧត្តរមានជ័យ គឺលោកវរសេនីយ៍ទោ តូច រ៉ា។ លោកមានប្រសាសន៍កាលពីរសៀលថ្ងៃច័ន្ទ ទី២៥ ខែឧសភា ថា កាលពីថ្ងៃទី២២ ខែឧសភា កន្លងទៅ អាជ្ញាធរខេត្តស៊ីសាកេត របស់ថៃ បានបញ្ជូនប្រជាពលរដ្ឋខ្មែរចំនួន ១០នាក់ មកឱ្យអាជ្ញាធរខេត្តឧត្តរមានជ័យ វិញ។
លោកបញ្ជាក់ថា ប្រជាពលរដ្ឋខ្មែរទាំងនោះគឺជាអ្នកឆ្លងដែនទៅកាប់ឈើគ្រញូង និងចូលទៅរកការងារធ្វើក្នុងទឹកដីថៃ ដោយខុសច្បាប់។ លោកវរសេនីយ៍ទោ តូច រ៉ា ឱ្យដឹងថា ថ្វីត្បិតតែការឆ្លងដែនទៅកាប់ឈើខុសច្បាប់ក្នុងទឹកដីថៃ គឺប្រថុយនឹងគ្រោះថ្នាក់ក៏ដោយ ក៏បច្ចុប្បន្ន ប្រជាពលរដ្ឋខ្មែរមួយចំនួននៅតែបន្តមុខរបរនេះ៖ «មួយចំនួនតូចក៏នៅតែបន្តទៅរកប៉ុនកំភួនជើង ១-២ដុំស្ពាយមកវិញ អ៊ីចឹងមិនដឹងធ្វើយ៉ាងម៉េច បើហាមឃាត់មិនស្ដាប់»។
ប្រភពព័ត៌មានពីប្រជាពលរដ្ឋដែលរស់នៅភូមិទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ ឱ្យដឹងថា បច្ចុប្បន្នច្រករបៀងព្រំដែនខ្មែរ-ថៃ ចំនួន ៣ គឺច្រកចំបក់កោង ជិតភូមិទំនប់អភិវឌ្ឍន៍ ច្រកអូរខ្សាច់ និងច្រកទឹកជប់ ឃុំអូរស្វាយ ស្រុកត្រពាំងប្រាសាទ នៅតែមានការជួលឱ្យប្រជាពលរដ្ឋខ្មែរឡើងភ្នំទៅកាប់ឈើក្នុងទឹកថៃ យកមកលក់ឱ្យក្រុមឈ្មួញនៅឡើយ។
ស្ត្រីអ្នកភូមិទំនប់ដាច់ ស្រុកត្រពាំងប្រាសាទ ១រូប អះអាងថា ប្អូនប្រុសជីដូនមួយរបស់គាត់ម្នាក់ឈ្មោះ ឆាង ប៊ុនធឿន អាយុ ៤៥ឆ្នាំ ត្រូវទាហានថៃ បាញ់ស្លាប់ កាលពីថ្ងៃទី១៤ ខែឧសភា កន្លងទៅនៅពេលឆ្លងដែនទៅកាប់ឈើគ្រញូង។
ក្រុមគ្រួសាររបស់គាត់កំពុងព្យាយាមលួចចូលទៅក្នុងទឹកដីថៃ ដើម្បីយកសាកសពសាច់ញាតិដែលទាហានថៃ បាញ់ស្លាប់នោះមកធ្វើបុណ្យតាមប្រពៃណី៖ «គេថា សាកសពហ្នឹងនៅលើខ្នងភ្នំក្នុងទឹកដីថៃ នៅឆ្ងាយមែនទែនប្រហែល ៤០គីឡូម៉ែត្រឡើងភ្នំចុះភ្នំ»។
អាជ្ញាធរខេត្តឧត្តរមានជ័យ អះអាងថា រយៈពេល ៥ខែ ដើមឆ្នាំ២០១៥ នេះ ទាហានការពារព្រំដែនថៃ ខេត្តស៊ីសាកេត និងខេត្តសុរិន្ទ បានកាត់បន្ថយការបាញ់សម្លាប់ទៅលើប្រជាពលរដ្ឋខ្មែរ ដែលឆ្លងដែនទៅកាប់ឈើ ក៏ប៉ុន្តែការចាប់ខ្លួនទៅកាត់ទោសនៅតែកើតមានជាហូរហែ។
មន្ត្រីក្រុមការងារទំនាក់ទំនងព្រំដែនកម្ពុជា-ថៃ ច្រកជាំសាង៉ាំ ឱ្យដឹងថា ចាប់តាំងពីអំឡុងខែកុម្ភៈ រហូតដល់ខែឧសភា ឆ្នាំ២០១៥ គឺទាហានថៃ បានបញ្ជូនប្រជាពលរដ្ឋខ្មែរដែលគេចាប់ខ្លួនពីបទឆ្លងដែនទៅកាប់ឈើខុសច្បាប់ ប្រគល់មកឱ្យអាជ្ញាធរខ្មែរវិញចំនួន ៩០នាក់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។