រដ្ឋមន្ត្រីស្ដីទីក្រសួងយុត្តិធម៌ថៃ លោក ចាន់ចាវ ឆៃយ៉ានុគិក (Chanchao Chaiyanukij) ត្រូវបានកាសែតបាងកក ប៉ុស្តិ៍ (Bangkok Post) ស្រង់សម្ដីចុះផ្សាយថ្ងៃទី២ កក្កដា ថា ថៃនឹងដោះលែងអ្នកទោសខ្មែរ ១៤នាក់ ដែលកំពុងជាប់គុកនៅថៃ ហើយកំពុងរង់ចាំមន្ត្រីស្ថានទូតខ្មែរប្រចាំបាងកក បញ្ជូនបញ្ជីឈ្មោះអ្នកទោសទាំង ១៤នាក់នោះ ទៅភាគីថៃ ដើម្បីធ្វើការដោះលែង។ ក៏ប៉ុន្តែលោក ចាន់ចាវ ឆៃយ៉ានុគិក មិនបានបញ្ជាក់កាលបរិច្ឆេទនៃការដោះលែងទេ។
ការអះអាងនេះ ធ្វើឡើងបន្ទាប់ពីភាគីកម្ពុជា បានដោះលែងអ្នកទោសថៃម្នាក់ គឺលោក លោក វីរៈ ស៊ុំក្វាមឃីត (Veera Somkwamkid) កាលពីថ្ងៃទី១ កក្កដា តាមការស្នើសុំរបស់មេដឹកនាំរដ្ឋាភិបាលយោធាថៃ។
ទោះយ៉ាងណា កាសែតថៃ ដដែលបានស្រង់សម្ដីមន្ត្រីថៃ ទទួលបន្ទុកខាងពន្ធនាគារថា ចំនួនអ្នកទោសខ្មែរមានតែ ១៣នាក់ទេ ហើយការដោះលែងអ្នកទោសខ្មែរនេះ ទំនងមិនអាចធ្វើឡើងភ្លាមៗ ដូចដែលភាគីកម្ពុជា ដោះលែងអ្នកទោសថៃ ទេ គឺអាចធ្វើឡើងតាមច្បាប់អន្តរជាតិក្រោមសន្ធិសញ្ញាក្នុងការបញ្ជូនអ្នកទោស។ ក្រៅពីនេះ កាសែតថៃ ដដែលបញ្ជាក់ថា ការដោះលែងអ្នកទោសថៃ លោក វីរៈ ស៊ុំក្វាមឃីត គឺភាគីកម្ពុជា ធ្វើឡើងតាមគម្រោងកម្មវិធីដោះលែងអ្នកទោសតាមកម្មវិធីជាទម្លាប់ធម្មតា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។