មន្ត្រីជាន់ខ្ពស់នៃគណបក្សប្រជាជនកម្ពុជា និងគណបក្សសង្គ្រោះជាតិ បញ្ជាក់ថា ភាគីគណបក្សទាំងពីរបានត្រៀមរួចជាស្រេច ក្នុងការចរចាអំពីការកែទម្រង់ប្រព័ន្ធបោះឆ្នោតឲ្យប្រសើរឡើងវិញ។
រដ្ឋលេខាធិការក្រសួងមហាផ្ទៃ លោក ព្រំ សុខា និងជាតំណាងគណបក្សប្រជាជនកម្ពុជា មានប្រសាសន៍នៅថ្ងៃទី៣ ខែវិច្ឆិកា ថា លោកនឹងដឹកនាំក្រុមបច្ចេកទេសមួយក្រុមពីគណបក្សប្រជាជនកម្ពុជា ទៅជួបចរចាជាមួយមន្ត្រីបច្ចេកទេសមកពីគណបក្សសង្គ្រោះជាតិ នៅថ្ងៃទី៥ ខែវិច្ឆិកា។
លោក ព្រំ សុខា បញ្ជាក់ថា សមាសភាព ៥នាក់នោះ រួមមាន លោកជាប្រធានក្រុម និងសមាជិក ៤រូបទៀតមាន លោក សក់ សេដ្ឋា លោក កើត រិទ្ធ លោក សំ សឿន និង លោក ម៉េង លី។
លោកបញ្ជាក់ថា កិច្ចប្រជុំរវាងគណបក្សជាប់ឆ្នោតទាំង២លើកនេះ គឺជាការប្រជុំកម្រិតបច្ចេកទេស មិនមែនជាការប្រជុំថ្នាក់កំពូលនៃគណបក្សទេ។ ប៉ុន្តែ កិច្ចប្រជុំនោះ គឺជាការបើកផ្លូវមួយមុននឹងឈានទៅដល់ការប្រជុំថ្នាក់កំពូល៖ «គណបក្សទាំងពីរក្នុងជំនួបកំពូលថ្ងៃទី១៦ ខែកញ្ញា កន្លងទៅ បានឯកភាពគ្នាចំណុចមួយ គឺបង្កើតយន្តការកំណែទម្រង់ការបោះឆ្នោតនៅពេលខាងមុខ។ យើងបន្តជួបគ្នានេះលើបញ្ហានេះឯង។ មុននឹងក្រុមការងារបច្ចេកទេសជួបនឹងថ្នាក់កំពូលទាំងសងខាង អនុញ្ញាតឲ្យក្រុមការងារបច្ចេកទេសជួបគ្នាដំបូង»។
ទាក់ទិនជំនួបចរចាជាថ្មីនេះ លោក ហូរ វ៉ាន់ តំណាងរាស្ត្រគណបក្សសង្គ្រោះជាតិ និងជាអនុប្រធានគណៈកម្មាធិការវិន័យ មានប្រសាសន៍ថា គណបក្សសង្គ្រោះជាតិ បានកំណត់សមាសភាព ៥រូបរួចហើយមាន លោក សុន ឆ័យ ជាប្រធានក្រុម លោក គួយ ប៊ុនរឿន លោក អេង ឆៃអ៊ាង លោក យឹម សុវណ្ណ និងលោក យ៉ែម បុញ្ញឫទ្ធិ។ លោកបញ្ជាក់ថា សមាសភាពទាំង ៥នាក់នោះជាអ្នកនយោបាយផង និងជាអ្នកបច្ចេកទេសជំនាញផង ហើយពួកគាត់នឹងជជែកសំខាន់អំពីការកែទម្រង់ប្រព័ន្ធបោះឆ្នោត ដោយផ្ដោតទៅលើយន្តការនីតិវិធីការកែទម្រង់ច្បាប់ និងគោលការណ៍ផ្សេងៗនៃការបោះឆ្នោត។
របៀបវារៈ៣ ដែលគណបក្សសង្គ្រោះជាតិ លើកឡើងសម្រាប់ជជែកគ្នាថ្ងៃប្រជុំនោះមាន ទី១ ទាមទារឲ្យធ្វើការស៊ើបអង្កេតភាពមិនប្រក្រតីធ្ងន់ធ្ងរនៃការបោះឆ្នោត កាលពីថ្ងៃទី២៨ ខែកក្កដា។ ទី២ ទាមទារឲ្យមេដឹកនាំកំពូលគណៈកម្មាធិការជាតិរៀបចំការបោះឆ្នោតទាំង ៩នាក់ លាលែងពីតួនាទី និងទី៣ ទាមទារឲ្យមានការកែទម្រង់ដោយយកតាមអនុសាសន៍របស់អង្គការសហប្រជាជាតិ និងអង្គការសង្គមស៊ីវិលជាតិ អន្តរជាតិមួយចំនួន។
លោក ហូរ វ៉ាន់ ព្រមានថា ប្រសិនបើកិច្ចប្រជុំជាមួយគណបក្សប្រជាជនកម្ពុជា មិនបានទទួលលទ្ធផលដូចការរំពឹងទុកទេនោះ គណបក្សសង្គ្រោះជាតិ នឹងប្រកាសធ្វើមហាបាតុកម្មទ្រង់ទ្រាយធំជាងមុន ហើយធ្វើទូទាំងប្រទេស៖ «យើងនឹងធ្វើការតវ៉ាដែលមានរូបភាពច្រើនទៀតតាំងពីការបាតុកម្មកូដកម្ម តាំងពីការអំពាវនាវទូទាំងប្រទេស ឬតាមវិធីពហិការការងារ ឬពហិការសេដ្ឋកិច្ច»។
ថ្មីនេះៗ អនុប្រធានគណបក្សសង្គ្រោះជាតិ លោក កឹម សុខា ថ្លែងក្នុងថ្ងៃសម្ពោធស្នាក់ការគណបក្សសង្គ្រោះជាតិ នៅក្រុងតាខ្មៅ ថា បាតុកម្មលើកក្រោយរបស់គណបក្សប្រឆាំងនឹងធ្វើឡើងនៅក្រុងតាខ្មៅ ខេត្តកណ្ដាល ប៉ុន្តែ មិនទាន់បានកំណត់ថ្ងៃជាក់លាក់នៅឡើយ។
យ៉ាងណា លោក ហូរ វ៉ាន់ បញ្ជាក់ថា ការថ្លែងរបស់ លោក កឹម សុខា ពេលនោះជាការស្ទង់មតិពលរដ្ឋដែលគាំទ្រប៉ុណ្ណោះ។ លោកថា ការធ្វើបាតុកម្មនៅក្រុងតាខ្មៅ ឬនៅកន្លែងណាផ្សេងនោះ មិនទាន់សម្រេចផ្លូវការនៅឡើយទេពេលនេះ។
គណបក្សសង្គ្រោះជាតិ និងគណបក្សប្រជាជនកម្ពុជា បន្តស្វែងរកការបញ្ចប់ភាពជាប់គាំងផ្នែកនយោបាយម្ដងជាពីរដងរួចមកហើយ តែនៅមិនទាន់អាចសម្រេចពីគោលបំណងធំនៅឡើយ។ យ៉ាងណា មន្ត្រីឃ្លាំមើលការបោះឆ្នោតបានលើកឡើងថា ការងាកមករកតុចរចារវាងគណបក្សឈ្នះឆ្នោតទាំងពីរលើកនេះ គឺជាសញ្ញាវិជ្ជមានមួយ បន្ទាប់ពីការជាប់គាំងនយោបាយបានអូសបន្លាយពេលជាង ៣ខែមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។