អ្នកវិភាគនយោបាយ ឃ្លាំមើលស្ថានការណ៍នយោបាយអះអាងថា កិច្ចប្រជុំកំពូលនេះនឹងអាចជាចំណុចផ្ដើមនៃបំបែកភាពទាល់ច្រកក្រោយការបោះឆ្នោត។
មេដឹកនាំកំពូលគណបក្សនយោបាយទាំងពីរ ដែលឈ្នះឆ្នោតកាលពីថ្ងៃទី២៨ ខែកក្កដា ប្រកាសនឹងចូលរួមកិច្ចប្រជុំក្រោមព្រះរាជាធិបតីភាពនៃព្រះមហាក្សត្រនៅចុងសប្ដាហ៍នេះ។
លោកនាយករដ្ឋមន្ត្រី ហ៊ុន សែន ផ្ញើលិខិតថ្វាយព្រះមហាក្សត្រវិញថា លោកនឹងដឹកនាំប្រតិភូពីរនាក់ផ្សេងទៀត ចូលរួមតាមការកោះអញ្ជើញរបស់ព្រះមហាក្សត្រ។ លោក ហ៊ុន សែន មិនបានបញ្ជាក់ពីប្រធានបទដែលលោកគ្រោងនឹងជជែកក្នុងកិច្ចប្រជុំនោះទេ។
ចំណែក លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍ប្រាប់វិទ្យុអាស៊ីសេរី ថា ប្រតិភូគណបក្សសង្គ្រោះជាតិ នឹងចូលរួមកិច្ចប្រជុំក្រោមព្រះរាជាធិបតីភាពនៃព្រះមហាក្សត្រ។ លោក កឹម សុខា បន្តថា គណបក្សសង្គ្រោះជាតិ នឹងស្នើសុំព្រះមហាក្សត្រអន្តរាគមន៍រកយុត្តិធម៌នៃភាពមិនប្រក្រតីនៃការបោះឆ្នោត។
ជំនួបកំពូលរវាងមេដឹកនាំគណបក្សសង្គ្រោះជាតិ និងគណបក្សប្រជាជនកម្ពុជា នេះ គ្រោងធ្វើឡើងមួយថ្ងៃមុនពេលមហាបាតុកម្មគណបក្សសង្គ្រោះជាតិ។ គណបក្សសង្គ្រោះជាតិ នៅថ្ងៃព្រហស្បតិ៍ ចេញសេចក្តីប្រកាសព័ត៌មានធ្វើមហាបាតុកម្ម ទាមទារឲ្យបង្កើតគណៈកម្មការពិសេសឯករាជ្យមួយ ស៊ើបអង្កេតរកការពិត និងយុត្តិធម៌ ពាក់ព័ន្ធនឹងលទ្ធផលបោះឆ្នោត។ មហាបាតុកម្មលើកទីពីរ រយៈពេល ៣ថ្ងៃ ចាប់ពីថ្ងៃទី១៥ ដល់ថ្ងៃទី១៧ ខែកញ្ញា។
ពាក់ព័ន្ធទៅនឹងបាតុកម្មនេះ ក្រសួងមហាផ្ទៃ បានបដិសេធសំណើគណបក្សសង្គ្រោះជាតិ សុំធ្វើមហាបាតុកម្មបីថ្ងៃ។ ក្រសួងមហាផ្ទៃ អនុញ្ញាតឲ្យធ្វើតែមួយថ្ងៃ គឺនៅថ្ងៃទី១៥ កញ្ញា ចាប់ពីម៉ោង ៦ព្រឹក ដល់ម៉ោង ៦ល្ងាច ប៉ុន្តែហាមការប្រមូលផ្តុំ និងការស្នាក់នៅពេលយប់នៅទីលានប្រជាធិបតេយ្យ ដោយលើកហេតុផលថា អាចប៉ះពាល់ដល់សណ្ដាប់ធ្នាប់សង្គម និងសន្តិសុខជាតិ។ ក្រសួងមហាផ្ទៃ ក៏មិនអនុញ្ញាតឲ្យគណបក្សសង្គ្រោះជាតិ ធ្វើបាតុកម្មនៅថ្ងៃទី១៦ និងថ្ងៃទី១៧ ដោយលើកហេតុផលថា ចំថ្ងៃសិស្សប្រឡងសញ្ញាបត្រមធ្យមសិក្សាបឋមភូមិ។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា កិច្ចប្រជុំថ្ងៃសៅរ៍ ទី១៤ កញ្ញា ជាឱកាសមួយអាចឲ្យមេដឹកនាំគណបក្សនយោបាយស្វែងយល់ពីគ្នាទៅវិញទៅមក ដើម្បីរកច្រកចេញនយោបាយមួយ ជាពិសេសបញ្ហាសំខាន់របស់ជាតិ។ លោកបន្តថា បញ្ហាសំខាន់ចំពោះមុខ គឺការដោះស្រាយភាពមិនប្រក្រតីនៃការបោះឆ្នោត និងការធ្វើកំណែទម្រង់មួយចំនួនទៅថ្ងៃអនាគត។
ព្រះមហាក្សត្រ ព្រះបាទ នរោត្តម សីហមុនី កាលពីសប្ដាហ៍មុន គ្រោងនឹងអញ្ជើញបេក្ខជនជាប់ឆ្នោតតំណាងរាស្ត្រនីតិកាលទី៥ ប្រជុំដំបូងនៅថ្ងៃទី២៣ ខែកញ្ញា នៅវិមានរដ្ឋសភា។ លទ្ធផលផ្លូវការ គណៈកម្មាធិការជាតិរៀបចំការបោះឆ្នោត បង្ហាញថា គណបក្សប្រជាជនកម្ពុជា ទទួលបាន ៦៨អាសនៈ ចំណែកគណបក្សសង្គ្រោះជាតិ បាន ៥៥អាសនៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។