ហេតុការណ៍លបលួចចូលផ្ទះនេះ បានកើតឡើងនៅភូមិឈើទាល ឃុំផ្ដៅជុំ ស្រុកជើងព្រៃ ខេត្តកំពង់ចាម កាលពីវេលាម៉ោងប្រមាណជា ១១ និង ៣០នាទីយប់ ថ្ងៃទី១៤ កក្កដា ឆ្នាំ២០១៣។ តែអាជ្ញាធរមូលដ្ឋានគិតថា ហេតុការណ៍នេះប្រហែលជាមិនពាក់ព័ន្ធនឹងរឿងនយោបាយទេ។
លោក កើត កាន់ សកម្មជនគណបក្សសង្គ្រោះជាតិ និងជាប្រធានសន្តិសុខភូមិឈើទាល ផងនោះ បានមានប្រសាសន៍នៅថ្ងៃទី១៥ កក្កដា ឆ្នាំ២០១៣ ថា មានជនមិនស្គាល់មុខបានចូលក្នុងបរិវេណផ្ទះរបស់លោក។ លោកមិនដឹងថា មានមនុស្សប៉ុន្មាននាក់បានចូលផ្ទះលោកនោះទេ ព្រោះពេលលោកបើកទ្វារចេញមកមើលជននោះបានរត់ចេញផុតពីរបងផ្ទះរបស់លោកទៅហើយ។
លោកបាននិយាយថា ជនមិនស្គាល់មុខនោះបានប្រើកាំបិតកាប់ឆ្កែរបស់លោកងាប់មួយក្បាល ហើយនៅពេលដែលលោកបើកទ្វារចេញមកមើល ជននោះបានរត់ដល់របងផ្ទះ ហើយយកកាំបិតកាប់មែកឈើនៅមុខផ្ទះរបស់លោកមុននឹងរត់ចេញទៅ។ លោកបន្តថា តាំងពីដើមមក ពុំធ្លាប់មានជនណាចូលផ្ទះរបស់លោកអ៊ីចឹងទេ ហើយលោកក៏គ្មានជម្លោះអ្វីជាមួយអ្នកណាដែរ តែគ្រាន់តែមួយរយៈពេលនេះលោកចូលរួមច្រើនក្នុងសកម្មភាពនយោបាយ៖ «សង្គ្រោះជាតិដាក់ផ្លាកមុខផ្ទះហ្នឹង ម្សិលមិញខ្ញុំដើរជាមួយសកម្មជនគណបក្ស សម រង្ស៉ី ដែរ ហើយកាលពីពេលថ្ងៃ ខ្ញុំទៅធ្វើអ៊ីៗជាមួយបក្សទៀត»។
បន្ទាប់ពីហេតុការណ៍នេះបានកើតឡើង លោក កើត កាន់ បានជូនដំណឹងដល់មេភូមិឈើទាល និងប្រធាននគរបាលប៉ុស្តិ៍រដ្ឋបាលឃុំផ្ដៅជុំ ដើម្បីអោយបានដឹងពីហេតុការណ៍នេះ។ លោកនិយាយថា ប្រធាននគរបាលប៉ុស្តិ៍រដ្ឋបាលឃុំផ្ដៅជុំ លោក ឆៃ កឹមឈុន បានបញ្ជូននគរបាលឃុំមួយចំនួនមកផ្ទះរបស់លោកដើម្បីពិនិត្យមើល៖ «ខ្ញុំប្រាប់អស់ហើយប៉ូលិស មេប៉ុស្តិ៍ប្រាប់ហើយ តែអត់ឃើញគេមកអើពើ គ្រាន់តែបានមកមើលមួយភ្លែតជិះទៅវិញអស់»។
មេភូមិឈើទាល លោក ចក លៀន ដែលបានចុះពិនិត្យមើលផ្ទាល់ដល់កន្លែងកើតហេតុ បានមានប្រសាសន៍ថា លោកក៏មិនដឹងថាមូលហេតុពិតប្រាកដវាយ៉ាងណានោះទេ ហើយលោកក៏មិនហ៊ានសន្និដ្ឋានភ្លាមៗ ថាជារឿងអ្វីអោយពិតប្រាកដដែរ។ តែលោកមានប្រសាសន៍ថា ពីមុនមកលោកក៏មិនដែលឃើញម្ចាស់ផ្ទះលោក កើត កាន់ ធ្លាប់មានជម្លោះជាមួយអ្នកណាទេ៖ «មិនដឹងថាម៉េចអោយត្រូវទេ ថាអត់ត្រូវទេ ថានយោបាយទៅក្រែងលោ ថាខ្ញុំស្អប់បុគ្គលអីទៀត»។
ប្រធាននគរបាលប៉ុស្តិ៍រដ្ឋបាលឃុំផ្ដៅជុំ លោក កឹមឈុន បានមានប្រសាសន៍ថា ពេលនេះលោកមិនអាចឃាត់ខ្លួននរណាម្នាក់បានទេ ព្រោះមិនមានអត្តសញ្ញាណច្បាស់លាស់។ លោកថាលោកនឹងបន្តស៊ើបអង្កេតពីបញ្ហានេះ។ តែលោកសន្និដ្ឋានថា នេះប្រហែលជាមិនជាប់ពាក់ព័ន្ធនឹងរឿងនយោបាយនោះទេ។
លោក ឆៃ កឹមឈុន៖ «រឿងអស់នេះខ្ញុំមើលទៅដូចជាវាមិនមានពាក់ព័ន្ធដល់ខាងអ៊ីចឹង (នយោបាយ) ទេមើលទៅ ព្រោះកន្លងមកវាមានដែររឿងទាក់ឆ្កែ បើវាមិនដែលសោះយើងចាត់ទុកថាវាពាក់ព័ន្ធ តែកន្លងមកវាមាន»។
ដូចគ្នាទៅនឹងមេភូមិឈើទាល លោក ចក លៀន ប្រធាននគរបាលប៉ុស្តិ៍រដ្ឋបាលឃុំផ្ដៅជុំ លោក ឆៃ កឹមឈុន បានមានប្រសាសន៍ថា លោកមិនដែលឃើញសកម្មជនគណបក្សសង្គ្រោះជាតិលោក កើត កាន់ មានបញ្ហាអ្វីជាមួយអ្នកស្រុកអ្នកភូមិពីមុនមកទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។