រដ្ឋមន្ត្រីការពារជាតិសហរដ្ឋអាមេរិក លោក ឆាក់ ហេហ្គេល (Chuck Hagel) បានថ្លែងបែបនេះនៅក្នុងវេទិកាពិភាក្សាអំពីសន្តិសុខមួយនៅប្រទេសសិង្ហបុរី។ លោក ឆាក់ ហេហ្គេល មានប្រសាសន៍ថា ឆ្លៀតឱកាសនៃកិច្ចប្រជុំនោះ លោកបានអញ្ជើញរដ្ឋមន្ត្រីការពារជាតិអាស៊ានទាំងអស់ដើម្បីទៅជួបពិភាក្សាគ្នានៅឆ្នាំក្រោយនៅកោះហាវ៉ៃ។ លោកបន្តថា លោកជឿជាក់ថា កិច្ចប្រជុំលើកទីមួយដែលរៀបចំដោយសហរដ្ឋអាមេរិកនេះ នឹងអនុញ្ញាតអ្នកមុខអ្នកការទាំងអស់ចែករំលែកអោយគ្នាទៅវិញទៅមកនូវចក្ខុវិស័យរួមមួយសម្រាប់នាំអោយមានអនាគតប្រកបទៅដោយសន្តិភាព និងសន្តិសុខនៅក្នុងតំបន់។
ប្រទេសជាសមាជិកបួនក្នុងចំណោមប្រទេសអាស៊ានទាំង ១០ គឺប្រទេសប្រុយណេ (Brunei) ម៉ាឡេស៊ី (Malaysia) ហ្វីលីពីន (Philippines) និងប្រទេសវៀតណាម (Vietnam) រួមទាំងកោះតៃវ៉ាន់ ផង កំពុងមានទំនាស់ជាមួយប្រទេសចិន ទាក់ទងនឹងទឹកដីនៅក្នុងសមុទ្រចិនខាងត្បូង។
ប្រទេសអាស៊ានតូចៗដទៃទៀត មាន កម្ពុជា និង ឡាវ ជាដើម កំពុងទទួលឥទ្ធិពលចិន ទាំងផ្នែកសេដ្ឋកិច្ចនិងនយោបាយ។ ចំណែកឯសហរដ្ឋអាមេរិកវិញ បានខិតខំរកវិធានការមួយចំនួនដើម្បីទប់ទល់នឹងឥទ្ធិពលរបស់ចិន ទៅលើប្រទេសក្នុងតំបន់អាស៊ីអាគ្នេយ៍។ វិធានការមួយក្នុងចំណោមវិធានការទាំងឡាយ គឺគម្រោងអោយមានកិច្ចសហប្រតិបត្តិការឆ្លងកាត់សមុទ្រប៉ាស៊ីហ្វិក ដោយបូកបញ្ចូលប្រទេសទាំងឡាយនៅអាមេរិកឡាទីន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។