សហគមន៍ខ្មែរ-អាមេរិកាំង ជំរុញឲ្យក្រសួងការបរទេសសហរដ្ឋអាមេរិក និងសភាសហរដ្ឋអាមេរិកអន្តរាគមន៍ជាបន្ទាន់ ករណីការធ្វើទុក្ខបុកម្នេញរបស់រដ្ឋាភិបាលទីក្រុងភ្នំពេញ មកលើពលរដ្ឋខ្មែរ-អាមេរិកាំង។ ប៉ុន្តែមន្ត្រីគណបក្សប្រជាជនកម្ពុជា ដែលកាន់អំណាចអះអាងថា កម្ពុជាគឺជាប្រទេសមិនចំណុះបរទេស។
ក្រុមអ្នកតស៊ូមតិសម្រាប់ផលប្រយោជន៍ខ្មែរ-អាមេរិកាំង ដែលមានមូលដ្ឋានក្នុងសហរដ្ឋអាមេរិក ជំរុញឲ្យរដ្ឋាភិបាលក្រុងវ៉ាស៊ីនតុន (Washington) បន្ថែមការយកចិត្តទុកដាក់ទៅលើកិច្ចការពារសិទ្ធិសេរីភាព និងសុវត្ថិភាពរបស់ពលរដ្ឋខ្មែរ-អាមេរិកាំង ដែលកំពុងមានវត្តមាននៅកម្ពុជា។
ប្រធានអង្គការសម្ព័ន្ធមិត្តខ្មែរ-អាមេរិកាំង លោក ទូច វិបុល បានប្រាប់វិទ្យុអាស៊ីសេរី តាមទូរស័ព្ទកាលពីថ្ងៃពុធ ទី១៣ មេសា ថា ពលរដ្ឋខ្មែរ-អាមេរិកាំង កំពុងស្ថិតក្រោមការគំរាមកំហែងរបស់រដ្ឋាភិបាលលោក ហ៊ុន សែន ដូចជាករណីលោក មាជ សុវណ្ណារ៉ា និងករណីចាប់ខ្លួនលោក អ៊ុំ សំអាន កាលពីដើមសប្ដាហ៍នេះ។
លោក ទូច វិបុល ជំរុញឲ្យក្រសួងការបរទេស និងក្រុមសភាតំណាងរាស្ត្រសហរដ្ឋអាមេរិក ស្វែងរកយុត្តិធម៌ និងដោះលែងពលរដ្ឋខ្មែរ-អាមេរិកាំង ទាំងពីរនាក់ឲ្យមានសេរីភាពឡើងវិញ៖ «ក្នុងនាមយើងជាអង្គការសម្ព័ន្ធមិត្តខ្មែរ-អាមេរិកាំង យើងទៅដើម្បីបង្ហាញឲ្យឃើញថា ក្នុងនាមយើងជាពលរដ្ឋខ្មែរ-អាមេរិកាំង យើងនឹងពាំនាំនូវសេចក្ដីកង្វល់របស់ពលរដ្ឋខ្មែរអាមេរិកាំងហ្នឹង ទៅប្រាប់គេដើម្បីដាក់សម្ពាធមួយទៅលើការសម្រេចចិត្តរបស់គេឲ្យមានការពន្លឿនការសម្រេចចិត្តរបស់ពួកគេក្នុងការរកដំណោះស្រាយនានា រកយុត្តិធម៌ជូនពលរដ្ឋខ្មែរអាមេរិកាំង ដែលកំពុងរងការគំរាមកំហែងរបស់លោកនាយករដ្ឋមន្ត្រី ហ៊ុន សែន»។
យ៉ាងហោចណាស់មានអ្នកទោសនយោបាយចំនួន ១៦នាក់ ហើយដែលកំពុងស្ថិតក្នុងការឃុំឃាំងរបស់រដ្ឋាភិបាលទីក្រុងភ្នំពេញ។ ក្នុងចំណោមអ្នកទាំង ១៦នោះ មានពលរដ្ឋខ្មែរ-អាមេរិកាំង ពីរនាក់គឺលោក អ៊ុំ សំអាន និងលោក មាជ សុវណ្ណរ៉ា ដែលជាមន្ត្រីរបស់គណបក្សសង្គ្រោះជាតិ ដែលក្រុមសង្គមស៊ីវិលអះអាងថា អ្នកទាំងពីរជាអ្នកទោសមនសិការ។
លោក ទូច វិបុល អំពាវនាវឲ្យពលរដ្ឋខ្មែរ-អាមេរិកាំង ទាំងអស់ចូលរួមបង្កើនការជំរុញ និងការដាក់សម្ពាធទៅលើរដ្ឋាភិបាលអាមេរិក ដើម្បីស្វែងរកការដោះលែងពលរដ្ឋខ្មែរ-អាមេរិកាំង ពីរនាក់កំពុងជាប់ឃុំឃាំងក្នុងទីក្រុងភ្នំពេញ។
វិទ្យុអាស៊ីសេរី នៅមិនទាន់អាចសុំសេចក្ដីអត្ថាធិប្បាយពីមន្ត្រីក្រសួងការបរទេសសហរដ្ឋអាមេរិក ក្នុងក្រុងវ៉ាស៊ីនតុន បានទេ កាលពីថ្ងៃពុធ ទី១៣ ខែមេសា។
ពាក់ព័ន្ធនឹងបញ្ហានេះ មន្ត្រីជាន់ខ្ពស់នៃគណបក្សប្រជាជនកម្ពុជា និងជាសមាជិករដ្ឋសភា លោក ឈាង វុន បានឆ្លើយយ៉ាងខ្លីថា លោកមិនចាប់អារម្មណ៍ទៅនឹងបញ្ហានេះហើយថា កម្ពុជាប្រទេសជាប្រទេសឯករាជ្យ។
ទោះជាយ៉ាងណាក៏ដោយ អ្នកស្រាវជ្រាវអំពីការអភិវឌ្ឍសង្គម លោក កែម ឡី មានប្រសាសន៍ថា ការចាប់បង្កើនចំនួនអ្នកទោសនយោបាយនៅកម្ពុជា កាន់តែធ្វើឲ្យប្រជាប្រិយភាពរបស់គណបក្សកាន់អំណាចមួយនេះថយចុះទៅៗ ហើយដែលជាសញ្ញាមិនល្អសម្រាប់ការបោះឆ្នោតឃុំសង្កាត់នៅឆ្នាំ២០១៧ និងការបោះឆ្នោតជាតិ ឆ្នាំ២០១៨ ខាងមុខ។
លោក កែម ឡី៖ «បើយើងនិយាយអំពីប្រជាប្រិយភាពគឺអត់ចំណេញទេ គឺកាន់តែខាត ព្រោះសាធារណជនឥឡូវទទួលបានព័ត៌មានគ្រប់ជ្រុងជ្រោយ ហើយអំពើប្រព្រឹត្តទាំងឡាយណាដែលវាមិនស្របច្បាប់ មិនមានភាពទន់ភ្លន់ វានឹងបាត់ប្រជាប្រិយភាព។ ប៉ុន្តែទោះបីជាការបាត់បង់ប្រជាប្រិយភាពយ៉ាងណាក៏ដោយ ប្រសិនបើគូប្រកួតនោះដួលមុនប្រកួត បែកបាក់មុនប្រកួត ឬរលាយមុនប្រកួតនោះ វានៅតែឈ្នះអ៊ីចឹង ហើយខ្ញុំមិនមើលឃើញចំណុចណាមួយដែលគណបក្សកាន់អំណាចធ្វើសកម្មភាពមួយដើម្បីប្រជាប្រិយភាពទេ ភាគច្រើនគឺធ្វើសកម្មភាពដើម្បីរំលាយគូប្រកួត»។
លោកបន្តថា ការធ្វើនយោបាយរបស់លោក ហ៊ុន សែន គឺខ្លាចចាញ់ ហួសហេតុដែលនាំឲ្យមានការរំលោភអំណាចហួសពីដែនសមត្ថកិច្ចរបស់ខ្លួន និងការប្រើអំពើហិង្សា។ លោកបន្តថា ការសំដែងមតិអំពីបញ្ហាព្រំដែន បញ្ហាផែនទី និងបញ្ហានយោបាយនានា គឺជាសិទ្ធិរបស់ពលរដ្ឋគ្រប់រូបដែលធានាដោយច្បាប់។ ប៉ុន្តែលោក ហ៊ុន សែន នៅតែព្រមានថា សមត្ថកិច្ចរបស់លោកនឹងចាប់ខ្លួនភ្លាមៗចំពោះជនណាដែលហ៊ានថា រដ្ឋាភិបាលរបស់លោកប្រើប្រាស់ផែនទីក្លែងក្លាយនោះ៖ «ម៉ោងនេះហើយនៅមានផែនទីក្លែងក្លាយ។ ខ្ញុំសូមប្រកាសដាច់ណាត់អ្នកណានិយាយពីផែនទីក្លែងក្លាយ គឺត្រូវចាប់ខ្លួនភ្លាម មិនថាអ្នកហ្នឹងជាអ្នកណាទេ»។
ទោះជាយ៉ាងណាក៏ដោយ នាយកប្រតិបត្តិទទួលបន្ទុកកិច្ចការតំបន់អាស៊ី នៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) កាលពីថ្ងៃអង្គារ ទី១២ ខែមេសា បានហៅការចាប់ខ្លួនលោក អ៊ុំ សំអាន នៅពេលនេះ ថាជាការរំលោភច្បាប់ និងធ្វើឡើងក្រោមហេតុផលនយោបាយ។
លោក អ៊ុំ សំអាន ត្រូវបានសមត្ថកិច្ចខេត្តសៀមរាប ចាប់ខ្លួនកាលពីដើមសប្ដាហ៍នេះ ពីបទប្រើប្រាស់ផែនទីក្លែងក្លាយ និងបទញុះញង់ឲ្យមានការរើសអើងជាតិសាសន៍។ រីឯលោក មាជ សុវណ្ណារ៉ា ត្រូវបានតុលាការផ្ដន្ទាទោសដាក់ពន្ធនាគារ ២០ឆ្នាំ ពីបទដឹកនាំកុបកម្មនាំឲ្យមានអំពើហិង្សានៅស្ពាននាគក្បែរទីលានប្រជាធិបតេយ្យ កាលពីខែកក្កដា ឆ្នាំ២០១៤ កន្លងទៅ។
អង្គការសម្ព័ន្ធមិត្តខ្មែរ-អាមេរិកាំង ក្នុងសហរដ្ឋអាមេរិក ចាត់ទុកការដឹកនាំរបស់លោក ហ៊ុន សែន ថា បានរំលោភធ្ងន់ធ្ងរដល់អនុសញ្ញានានា របស់អង្គការសហប្រជាជាតិ និងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ដោយសារការប្រើប្រាស់ប្រព័ន្ធតុលាការក្នុងការរំលោភសិទ្ធិមនុស្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។