ក្រៅពីមន្ត្រីរាជការដែលធ្វើការនៅតាមក្រសួងស្ថាប័ននានា ចេញលិខិតចូលរួមមរណទុក្ខជាមួយគ្រួសារសពលោកឧបនាយករដ្ឋមន្ត្រី សុខ អាន ប្រជាពលរដ្ឋសាមញ្ញនៅរាជធានីភ្នំពេញមួយចំនួន ក៏បង្ហាញការសោកស្ដាយចំពោះមរណភាពលោកដែរ។ ប៉ុន្តែពួកគាត់ភាគច្រើនបានឮឈ្មោះ និងឃើញរូបលោកតាមរយៈសារព័ត៌មានប៉ុណ្ណោះ។
ប្រជាពលរដ្ឋជាច្រើននាក់បង្ហាញអារម្មណ៍ប្លែកៗគ្នាចំពោះមរណភាពរបស់លោក សុខ អាន។ អ្នកខ្លះបង្ហាញភាពសោកស្ដាយ ឯអ្នកខ្លះទៀតថ្លែងថាមិនសូវចាប់អារម្មណ៍។
អ្នករត់រ៉ឺម៉កម៉ូតូនៅផ្សារស្ទឹងមានជ័យម្នាក់ គឺលោក ហួត គីមឆាយ ថ្លែងថា លោកសោកស្ដាយពេលដែលឮអំពីមរណភាពរបស់លោក សុខ អាន ដោយសារតែលោកធ្លាប់បានឃើញ និងស្គាល់លោក សុខ អាន យូរហើយ៖ « ស្គាល់គាត់ពេលគាត់នៅកាន់តំណែង ឃើញមុខគាត់តាមទូរទស្សន៍រាល់ថ្ងៃ។ ខ្ញុំសោកស្ដាយដែរ ដែលគាត់បានទទួលមរណភាពទៅ។ គាត់បានធ្វើការងាររដ្ឋជួយប្រទេសជាតិ។ សោកស្ដាយដល់ពេលគាត់ស្លាប់ទៅ។ ឥឡូវគាត់អស់បានការងារនេះទៀតហើយ ព្រោះគាត់ស្លាប់ទៅហើយ ទុកឲ្យអ្នកជំនាន់ក្រោយៗតពីគាត់។ គាត់បានបម្រើប្រទេសជាតិយូរហើយ »។
ទន្ទឹមគ្នានេះ អ្នកលក់ដំឡូងចៀនម្នាក់ គឺលោកស្រី ឆឹង ចាន់លី មានប្រសាសន៍ថា មិនដែលឃើញរូបលោក សុខ អាន ទេ គឺឮតែសំឡេង និងឈ្មោះតាមវិទ្យុ៖ « គាត់ជួយប្រជាជនសព្វបែបយ៉ាង។ ខ្ញុំដឹងប៉ុណ្ណឹង »។
រីឯនិស្សិតច្បាប់នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច លោក សូណា បញ្ញាពុទ្ធិរាជ បញ្ជាក់ថា លោកស្គាល់លោកឧបនាយករដ្ឋមន្ត្រី សុខ អាន តាមរយៈបណ្ដាញហ្វេសប៊ុក (facebook)។ លោក បញ្ញាពុទ្ធិរាជ ចាត់ទុកមរណភាពលោក សុខ អាន ថាជាការបាត់បង់អ្នកស្នេហាជាតិម្នាក់៖ « ខ្ញុំមានអារម្មណ៍គួរឲ្យសោកស្ដាយមែនទែន ដែលបាត់បង់នូវអ្នកដែលមានស្នាដៃជួយជាតិ ដែលមានការទាមទារនូវបេតិកភណ្ឌប្រាសាទព្រះវិហារជូនមកខ្មែរ។ និយាយរួម សោកស្ដាយមែនទែនចំពោះការបាត់បង់អ្នកស្នេហាជាតិចំពោះកម្ពុជា បែបហ្នឹង »។
និស្សិតពេទ្យឆ្នាំទី៣ នៃសាកលវិទ្យាល័យវិទ្យាសាស្ត្រសុខាភិបាល លោក គី គឹមហាប់ ចាត់ទុកលោក សុខ អាន ជាវីរបុរសមួយរូប៖ « គាត់ជាវីរបុរសដ៏ឆ្នើមមួយរូបដែលជួយប្រជាពលរដ្ឋខ្មែររបស់យើងជាជនក្រីក្រ ជួយសាងសង់សាលារៀន ជួយកុមារកំព្រា និងជួយគ្រប់វិស័យទាំងអស់ដែលគាត់អាចធ្វើបាន »។
និស្សិតពេទ្យវ័យ ២០ឆ្នាំម្នាក់ទៀត គឺលោក លន់ ផានុ បន្ទរថា លោកស្គាល់លោក សុខ អាន តាំងពីលោកធំដឹងក្ដី៖ « ច្បាស់ជាងគេតាមរយៈលោកបានចេញតាមទូរទស្សន៍ពេលលោកបានជួយកសាងសាលាអី ដូចជាចាប់អារម្មណ៍ជាងគេទៅលើគាត់ជួយសាងសង់សាលា ចែកអំណោយឲ្យប្រជាជន។ ខ្ញុំមានអារម្មណ៍ថា អត់គួរឲ្យជឿ មានអារម្មណ៍ថាវាលឿនពេក ហើយមើលឃើញគាត់នៅសុខភាពល្អធម្មតា មិនគួរឲ្យជឿថាកើតមានរឿងបែបហ្នឹង ហើយក៏ចូលរួមសោកស្ដាយចំពោះរឿងបែបហ្នឹង »។
ដោយឡែកអ្នករត់រ៉ឺម៉កនៅផ្សារស្ទឹងមានជ័យម្នាក់ទៀត គឺលោក ហាស់ សុធិ មានប្រសាសន៍ថា លោកស្គាល់លោក សុខ អាន តែតាមរយៈទូរទស្សន៍យូរមកហើយ ប៉ុន្តែលោកមិនសូវមានចំណាប់អារម្មណ៍អ្វីច្រើនទេចំពោះមរណភាពរបស់លោក៖ « មុខមាត់ធ្លាប់តែក្នុងទូរទស្សន៍ទូអីហ្នឹង។ ជួបមុខផ្ទាល់អត់ដែលផង។ ឮឈ្មោះគាត់យូរហើយ គាត់ជាឧបនាយករដ្ឋមន្ត្រី ហើយឮថាតួនាទីគាត់ច្រើនដែរ។ ឮតែប៉ុស្តិ៍គេផ្សាយដែរ តាមរយៈព័ត៌មានទូរទស្សន៍ អាស៊ីសេរីអី ខ្ញុំឧស្សាហ៍ស្ដាប់ដែរ។ ខ្ញុំគ្មានអារម្មណ៍អីទេ។ ខ្ញុំមិនសូវស្គាល់គាត់ដែរ។ គាត់គ្រាន់តែជាថ្នាក់ដឹកនាំអីម្នាក់ដែរ។ ឮតែតាមព័ត៌មាន គ្មានអារម្មណ៍អីប្លែកទេ »។
ស្របពេលដែលប្រជាពលរដ្ឋទាំងនេះបង្ហាញចំណាប់អារម្មណ៍ចម្រុះគ្នាបែបនេះក្ដី ក៏មានពលរដ្ឋ និងមន្ត្រីរាជការខ្លះស្ទាក់ស្ទើរ និងមិនហ៊ានបញ្ចេញយោបល់យ៉ាងណាទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។