ក្នុងសុន្ទរកថានៅព្រឹកថ្ងៃទី១៨ ខែសីហា ប្រធានគណបក្សខ្មែរឈប់ក្រលើកឡើងពីក្តីព្រួយបារម្ភជាទូទៅរបស់ប្រជាពលរដ្ឋជុំវិញទង្វើរបស់គណបក្សកាន់អំណាចដែលយកអាវុធយុទ្ធភណ្ឌគ្រប់ប្រភេទចូលក្រុង ដើម្បីត្រៀមទប់ទល់នឹងគម្រោងការមហាបាតុកម្មរបស់គណបក្សសង្គ្រោះជាតិ។
គណបក្សខ្មែរឈប់ក្រ ដែលបានទទួលសន្លឹកឆ្នោតមិនដល់ ៥ម៉ឺនសំឡេងផងនោះ បានចេញមុខព្រមានជាផ្លូវការថា បើសិនជាគណបក្សជាប់ឆ្នោតទាំងពីរមិនអង្គុយតុចរចាទេនោះ ប្រទេសកម្ពុជា នឹងមានមហន្តរាយជាមិនខាន។ គណបក្សខ្មែរឈប់ក្របានដាក់លិខិតអញ្ជើញតំណាងគណបក្សកាន់អំណាច និងគណបក្សប្រឆាំងទៅចូលរួមស្ដាប់បទបង្ហាញស្ដីពីកង្វល់របស់ពលរដ្ឋ ប៉ុន្តែគណបក្សទាំងពីរមិនបានបញ្ជូនតំណាងទៅស្ដាប់ឡើយ។
ប្រធានគណបក្សខ្មែរឈប់ក្រ លោក ក្រវ៉ាញ ដារ៉ន មានប្រសាសន៍ថា គណបក្សនេះនឹងផ្ញើសុន្ទរកថារបស់លោកទៅកាន់គណបក្សជាប់ឆ្នោតនៅដើមសប្ដាហ៍នេះ ហើយសន្ទរកថានោះផ្ដោតសំខាន់លើដំណោះស្រាយពីភាពមិនប្រក្រតីនៃការបោះឆ្នោត និងទស្សនៈវិស័យក្នុងការដោះស្រាយបញ្ហាជាតិ។
លោកបន្តថា គណបក្សខ្មែរឈប់ក្រចាញ់ឆ្នោតមែន តែបក្សនេះបានមើលឃើញថា ពលរដ្ឋកំពុងមានក្តីបារម្ភពីសង្គ្រាម អស្ថិរភាពសង្គម ចលាចលផ្សេងៗ ដូចនេះអ្នកនយោបាយត្រូវតែស្រាយបញ្ហានេះ។ លោកបញ្ជាក់ថា ចំណោទដែលធ្វើឲ្យពលរដ្ឋនិងគណបក្សនយោបាយមិនស្ងប់ចិត្ត គឺគណៈកម្មាធិការជាតិរៀបចំការបោះឆ្នោត អសមត្ថភាពក្នុងការធ្វើការងារ ប្រកបដោយតម្លាភាព៖ «បើគេមិនដោះស្រាយបញ្ហាហ្នឹងឲ្យស្រួលបួលទេ ខ្ញុំមិនចូលរួមទៀតទេ នាំឲ្យខាតលុយ ខាតពេលវេលា និងលះបង់ទឹកចិត្តប្រជាពលរដ្ឋច្រើនណាស់»។
ទាក់ទងនឹងការរក្សាស្ថិរភាពសង្គមនេះ ប្រធានគណបក្សសង្គ្រោះជាតិ លោក សម រង្ស៉ី នៅព្រឹកថ្ងៃទី១៨ ខែសីហា ថ្លែងថា គណបក្សសង្គ្រោះជាតិចង់បានការដោះស្រាយដោយសន្តិវិធីដើម្បីស្វែងរកយុត្តិធម៌ជូនម្ចាស់ឆ្នោត។
លោកបន្តថា គណបក្សប្រជាជនកម្ពុជា ជាអ្នកបង្កបញ្ហាឲ្យប្រជាពលរដ្ឋភ័យខ្លាច ដូចនេះគណបក្សកាន់អំណាចត្រូវតែទទួលខុសត្រូវ និងដោះស្រាយរាល់បញ្ហាដែលកំពុងកើតមាន៖ «យើងព្យាយាមដោះស្រាយដោយសន្តិវិធី ផ្ញើសារទៅគណបក្សប្រជាជនកម្ពុជា ថាបើមិនដោះស្រាយបញ្ហានេះទេ សហគមន៍អន្តរជាតិប្រទេសជាមិត្តគេមិនអាចទទួលស្គាល់លទ្ធផលឆ្នោតបានឡើយ»។
ចំណែកឯលោកនាយករដ្ឋមន្ត្រី ហ៊ុន សែន កាលពីដើមខែនេះ ក៏ធ្លាប់អំពាវនាវឲ្យពលរដ្ឋមានការស្ងប់ស្ងៀមកុំភ័យខ្លាច និងស្នើឲ្យពលរដ្ឋប្រើហិង្សា ព្រោះតែនិន្នាការនយោបាយដែរ។ ប៉ុន្តែមិនដល់ ១ខែផង រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា បានចល័តកងទ័ពរថពាសដែក និងបញ្ជូនទាហានចូលកៀកក្រុងភ្នំពេញ។
សង្គមស៊ីវិលក៏បានចេញសេចក្ដីអំពាវនាវសំដែងក្ដីព្រួយបារម្ភ និងរិះគន់ចំណាត់ការប្រុងជើងការរបស់រដ្ឋាភិបាល លោក ហ៊ុន សែន នេះ។
បច្ចប្បន្ននេះមានទំនាស់រវាងគណបក្សកាន់អំណាច និងគណបក្សប្រឆាំងទាក់ទងនឹងលទ្ធផលបោះឆ្នោត នៅមិនទាន់រកច្រកចេញបាននៅឡើយ។ គណបក្សសង្គ្រោះជាតិនិងសង្គមស៊ីវិលរកឃើញថា គណៈកម្មាធិការជាតិរៀបចំការបោះឆ្នោត មិនមានសមត្ថភាពធ្វើការងារប្រកបដោយតម្លាភាពឡើយ។ គ.ជ.ប ត្រូវបានគេសង្ស័យថា ជាអ្នកជួយបន្លំសន្លឹកឆ្នោតឲ្យគណបក្សប្រជាជនកម្ពុជា ទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។