អង្គការធ្វើការទាក់ទងនឹងយុវជនចំនួន៦ បានយកញត្តិប្រគល់ជូនគណបក្សជាប់ឆ្នោតចំនួនពីរ គឺគណបក្សសង្គ្រោះជាតិ និងគណបក្សប្រជាជនកម្ពុជា ដើម្បីជំរុញឲ្យគណបក្សទាំងពីរនេះដាក់បញ្ចូលឈ្មោះយុវជន ឲ្យឈរលំដាប់លេខរៀងដែលអាចជាប់សម្រាប់ការបោះឆ្នោតជ្រើសក្រុមប្រឹក្សាថ្នាក់ក្រោមជាតិ ឆ្នាំ២០១៤ និងជំរុញឲ្យមានការផ្លាស់ប្ដូរបោះឆ្នោតពីអសកល ទៅសកល សម្រាប់អាណត្តិក្រោយ។
ញត្តិដែលមានអ្នកគាំទ្រជិត ៣ម៉ឺនសំឡេង ត្រូវបានក្រុមយុវជនប្រគល់ជូនតំណាងគណបក្សជាប់ឆ្នោតទាំងពីរ នៅក្នុងសន្និសីទសារព័ត៌មានមួយស្ដីពី ការជំរុញឲ្យគណបក្សនយោបាយដាក់បញ្ចូលយុវជនជាបេក្ខជនឈរឈ្មោះ សម្រាប់ការបោះឆ្នោតជ្រើសរើសក្រុមប្រឹក្សារាជធានីខេត្ត ក្រុង ស្រុក ខណ្ឌ។
នៅក្នុងសន្និសីទសារព័ត៌មាន ដែលមានយុវជនចូលរួមជាង ១០០នាក់ នៅសាកលវិទ្យាល័យ ខេមរៈ នាព្រឹកថ្ងៃទី១៩ កុម្ភៈ នេះ ក្រុមយុវជនបានលើកពីកង្វល់ដែលគណបក្សនយោបាយកន្លងមក បានដាក់បញ្ចូលយុវជននៅចំនួនតិចនៅឡើយ សម្រាប់ការបោះឆ្នោតជ្រើសរើសក្រុមប្រឹក្សាថ្នាក់ក្រោមជាតិ។
មន្ត្រីតស៊ូមតិនៃក្រុមប្រឹក្សាយុវជនកម្ពុជា លោក ផា ស៊ីណា និងជាអ្នករៀបចំកម្មវិធី មានប្រសាសន៍ថា គណបក្សនយោបាយដាក់បញ្ចូលយុវជនជាបេក្ខជនឈរឈ្មោះ សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ នេះជាការសំខាន់ណាស់សម្រាប់ឲ្យយុវជនមានឱកាសចូលរួមក្នុងការសម្រេចចិត្ត ក្នុងការអភិវឌ្ឍថ្នាក់ក្រោមជាតិ។
«សំឡេង»
នៅក្នុងសន្និសីទនេះ អ្នករៀបចំកម្មវិធីបានអញ្ជើញតំណាងគណបក្សសង្គ្រោះជាតិ និងតំណាងគណបក្សប្រជាជនកម្ពុជា ចូលរួម ដើម្បីឆ្លើយនឹងសំណួររបស់យុវជន។ ក៏ប៉ុន្តែ គណបក្សប្រជាជនកម្ពុជា មិនបានបញ្ជូនតំណាងមកចូលរួមនោះទេ។
ក្រុមយុវជនគ្រោងនឹងយកញត្តិទៅដាក់នៅទីស្នាក់ការគណបក្សប្រជាជនកម្ពុជា នៅខណ្ឌចម្ការមន តែត្រូវបានតំណាងគណបក្សប្រជាជនកម្ពុជា មកទទួលយកញត្តិនៅកន្លែងធ្វើសន្និសីទកាសែត តែមិនបានធ្វើជាវាគ្មិនទេ។ នៅក្នុងសន្និសីទនេះ មានយុវជនជាច្រើនបានលើកជាសំណួរទៅកាន់តំណាងគណបក្សនយោបាយ អំពីការដាក់បញ្ចូលយុវជនក្នុងគណបក្សរបស់ខ្លួននោះ។
«សំឡេង»
ឆ្លើយតបនឹងសំណួរនេះ បេក្ខជនតំណាងរាស្ត្រជាប់ឆ្នោតមណ្ឌលភ្នំពេញ លោក ហូរ វ៉ាន់ មានប្រសាសន៍ថា គណបក្សសង្គ្រោះជាតិ បានកែទម្រង់ និងបានដាក់បញ្ចូលយុវជនបានមួយចំនួនហើយ។ លោកបញ្ជាក់ថា នៅខណ្ឌមួយចំនួនក្នុងរាជធានីភ្នំពេញ រកបេក្ខជនឈរឈ្មោះគ្មានផង។
«សំឡេង»
ទោះបីជាយ៉ាងនេះក្ដី ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បានអះអាងថា គណបក្សនីមួយៗមានយុវជនគាំទ្រច្រើន ប៉ុន្តែគណបក្សនយោបាយទាំងនេះមិនទាន់មានយន្តការដាក់បញ្ចូលយុវជន ឲ្យចូលរួមធ្វើការសម្រេចចិត្តនៅថ្នាក់ក្រោមជាតិនៅឡើយ។
ក្រៅពីយុវជនបានទាមទារឲ្យដាក់បញ្ចូលយុវជនឈរឈ្មោះ សម្រាប់ការបោះឆ្នោតថ្នាក់ក្រោមជាតិឆ្នាំ២០១៤ នេះ ក្រុមយុវជនបានទាមទារឲ្យរដ្ឋាភិបាលកែប្រែប្រព័ន្ធបោះឆ្នោតជ្រើសរើសក្រុមប្រឹក្សារាជធានីខេត្ត ក្រុង ស្រុក ខណ្ឌ ពីការបោះឆ្នោតបែបអសកល ឲ្យទៅជាការបោះឆ្នោតសកល ដែលផ្ដល់អំណាចដល់ប្រជាពលរដ្ឋជាអ្នកជ្រើសរើសតំណាងរបស់ខ្លួនដោយផ្ទាល់។
អគ្គលេខាធិការនៃគណៈកម្មាធិការជាតិរៀបចំការបោះឆ្នោត (គ.ជ.ប) លោក ទេព នីថា បានគាំទ្រចំពោះការស្នើឲ្យមានយុវជន ចូលជាបេក្ខជនក្រុមប្រឹក្សាថ្នាក់ក្រោមជាតិនេះ។ លោកបញ្ជាក់ថា មិនចំពោះតែយុវជនទេ គណបក្សនយោបាយត្រូវតែបញ្ចូលស្ត្រីផងដែរ។ ដោយឡែក ចំពោះការបោះឆ្នោតបែបអសកលនេះ គឺ គ.ជ.ប អនុវត្តទៅតាមច្បាប់។
«សំឡេង»
ច្បាប់ស្ដីពីការបោះឆ្នោតថ្នាក់ក្រោមជាតិ ត្រូវបានសភាអនុម័តកាលពីថ្ងៃទី២ ខែមេសា ឆ្នាំ២០០៨។ មាត្រា៤ ចែងថា សមាជិកក្រុមប្រឹក្សាត្រូវបានបោះឆ្នោតជ្រើសរើសដោយការបោះឆ្នោតសេរី យុត្តិធម៌ មិនចំពោះ និងសម្ងាត់។
ការបោះឆ្នោតជ្រើសរើសសមាជិកក្រុមប្រឹក្សារាជធានីខេត្ត ក្រុង ស្រុក ខណ្ឌ នៅថ្ងៃទី១៨ ខែឧសភា ឆ្នាំ២០១៤ ដែលមានមណ្ឌលបោះឆ្នោតមាន ២៥ខេត្ត និងក្រុងស្រុកខណ្ឌ ១៩៧ និង ១៩៧ការិយាល័យបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។