គោលនយោបាយរបស់គណបក្សនីមួយៗ និងការបោះឆ្នោត គឺជាបញ្ហាដែលប្រជាពលរដ្ឋទូទៅកំពុងតែចាប់អារម្មណ៍ និងតាមដាន។ ស្របពេលជាមួយគ្នានេះ យុវជនភាគច្រើនបានបង្ហាញពីចំណាប់អារម្មណ៍ខុសៗគ្នារបស់ខ្លួន ទាក់ទងនឹងសារៈសំខាន់របស់គណបក្សនយោបាយក្នុងពេលយុទ្ធនាការឃោសនាបោះឆ្នោតនេះ។
យុវជនទាំងនោះបានបញ្ចេញទស្សនៈថា ក្នុងនាមជាយុវជន និងជាពលរដ្ឋខ្មែរម្នាក់ ការបោះឆ្នោតគឺជាកាតព្វកិច្ចដែលតម្រូវឲ្យគ្រប់ប្រជាពលរដ្ឋត្រូវអនុវត្ត ដើម្បីជ្រើសរើសអ្នកតំណាងដែលខ្លួនពេញចិត្ត។
កម្មការិនីរោងចក្រម្នាក់នៅម្តុំស្ទឹងមានជ័យ អ្នកស្រី សោភា បានបញ្ជាក់ថា ការបោះឆ្នោតមានសារៈសំខាន់ណាស់ក្នុងការជ្រើសរើសមេដឹកនាំដែលខ្លួនរំពឹងថានឹងអាចជឿទុកចិត្តបាន៖ «ខ្ញុំគិតថា ការបោះឆ្នោតសំខាន់ណាស់ មិនសំខាន់យ៉ាងម៉េច? បើបោះឲ្យតំណាងរាស្ត្រដើម្បីគ្រប់គ្រងយើង»។
យុវជន គឺជាកម្លាំងពលករយ៉ាងសំខាន់ក្នុងការធ្វើឲ្យមានការផ្លាស់ប្ដូរសង្គម និងជាអ្នកចូលរួមក្នុងការអភិវឌ្ឍប្រទេសតាមរយៈសកម្មភាពផ្សេងៗ។ នៅត្រង់ចំណុចនេះ យុវជនត្រូវការដឹងអំពីគោលនយោបាយច្បាស់លាស់របស់គណបក្សនីមួយៗ ដើម្បីធ្វើការសម្រេចចិត្តចុងក្រោយនៅថ្ងៃបោះឆ្នោត ថាតើគណបក្សណាមួយដែលពួកគាត់គិតថា អាចជួយអភិវឌ្ឍធនធានយុវជនឲ្យបានកាន់តែច្រើនថែមទៀតនោះ?
ប៉ុន្តែ ទោះបីជាការប្រកួតប្រជែងគ្នារបស់គណបក្សនយោបាយបានមកដល់ហើយក្ដី តែគណបក្សនយោបាយទាំងនោះហាក់មិនបង្ហាញអំពីគោលនយោបាយឲ្យបានច្បាស់លាស់ដល់យុវជននៅឡើយទេ។ ទាក់ទងនឹងបញ្ហានេះ និស្សិតឆ្នាំទី១ ពីសាកលវិទ្យាល័យឯកទេសនៃកម្ពុជា (CUS) ឈ្មោះ តារា បានប្រាប់ស្រដៀងគ្នាទាក់ទងនឹងបញ្ហានេះថា ការបោះឆ្នោតជារឿងសំខាន់ដើម្បីឲ្យមានការផ្លាស់ប្ដូរ តែលោកបញ្ជាក់ថា លោកនៅតែមិនទាន់បានដឹងអំពីគោលនយោបាយរបស់គណបក្សនីមួយៗច្បាស់លាស់នៅឡើយទេ ទោះបីជាគណបក្សនីមួយៗកំពុងធ្វើសកម្មភាពឃោសនាខ្លាំងក្លាហើយក្ដី៖ «ពិបាកចាំដែរ ព្រោះអីគោលនយោបាយច្រើនពេក»។
លើសពីនេះទៀត អ្វីដែលគួរឲ្យកត់សម្គាល់នោះ ភាគច្រើននៃយុវជនមិនសូវជាខ្វាយខ្វល់នឹងសកម្មភាពរបស់អ្នកនយោបាយ និងគោលនយោបាយរបស់គណបក្សនីមួយៗឲ្យបានច្បាស់លាស់ មុននឹងការបោះឆ្នោតដែលឈានមកដល់ពេលខាងមុខនោះឡើយ ដោយសារតែពួកគាត់យល់ថា ស្ថានភាពនៅកម្ពុជា មិនសូវជាអំណោយផល និងសុវត្ថិភាពសម្រាប់អ្នកដែលដឹងរឿងរ៉ាវនយោបាយច្រើនពេក។
និស្សិតនៃសាកលវិទ្យាល័យន័រតុន (Norton) ឈ្មោះ សំណាង បានបញ្ជាក់ប្រាប់វិទ្យុអាស៊ីសេរី ថា មានហេតុផលមួយដែលធ្វើឲ្យយុវជនមិនសូវចាប់អារម្មណ៍នឹងគណបក្សនយោបាយ ឬគោលនយោបាយរបស់គណបក្សនោះ គឺការគិតពីបញ្ហាសុវត្ថិភាពជាចម្បង៖ «ខ្ញុំមិនសូវចាប់អារម្មណ៍រឿងនយោបាយទេ ព្រោះថានយោបាយនៅស្រុកខ្មែរមិនសូវមានស្ថិរភាពដូចនយោបាយស្រុកក្រៅនោះទេ»។
ការលើកឡើងរបស់ក្រុមយុវជនអំពីសុវត្ថិភាពនេះ ព្រោះកម្ពុជា មានបទពិសោធន៍ជាច្រើនកន្លងមកទាក់ទងនឹងរឿងនយោបាយ ដូចជាសកម្មជនគណបក្សនយោបាយត្រូវបានគេគំរាមកំហែង និងសម្លាប់ជាដើម។ ម្យ៉ាងទៀត ក្រុមសិទ្ធិមនុស្សបានអះអាងថា ថ្វីត្បិតតែកម្ពុជា ជាប្រទេសប្រកាន់នូវរបបលទ្ធិប្រជាធិបតេយ្យ សេរីពហុបក្សក្ដី តែសេរីភាពក្នុងការបញ្ចេញមតិ និងការសម្ដែងចេញនូវការគាំទ្រគណបក្សនយោបាយ ពិសេសគណបក្សប្រឆាំង ជារឿយៗអ្នកគាំទ្រនោះទទួលរងនូវការគំរាមកំហែង។
ទន្ទឹមនឹងនេះ កម្មកររោងចក្រម្នាក់ឈ្មោះ ប៊ួយ ឆាយ៉ា បានបញ្ចេញទស្សនៈថា លោកមិនដឹងពីគោលនយោបាយរបស់គណបក្សនីមួយៗនោះទេ ពីព្រោះលោករវល់នឹងការងារ គ្មានពេលតាមដានគោលនយោបាយរបស់គណបក្សនានាដែលកំពុងធ្វើយុទ្ធនាការឃោសនាបោះឆ្នោតនោះឡើយ៖ «មិនសូវបានតាមដានរឿងនយោបាយខាងនយោបាយទេ ព្រោះរវល់ធ្វើការពេក»។
មានអ្នកខ្លះបានបញ្ចេញនូវទស្សនៈយល់ឃើញផ្សេងពីយុវជនខាងលើ ដោយនិយាយថា ក្នុងនាមជាយុវជន ចាំបាច់ត្រូវតែដឹងរឿងនយោបាយ ជាពិសេសជាងនេះទៅទៀត យុវជនគ្រប់រូបគួរតែដឹង និងតាមដានអោយបានជាក់លាក់នូវរាល់គោលនយោបាយរបស់គណបក្សនានា មុននឹងធ្វើការសម្រេចចិត្តបោះឆ្នោត។ ចំណែកឯយុវជនមួយចំនួនទៀត បានសម្ដែងការគាំទ្រ និងលើកទឹកចិត្តឲ្យយុវជនគ្រប់រូបគួរតែតាមដាន និងដឹងឲ្យបានច្បាស់លាស់អំពីបញ្ហានយោបាយនៅកម្ពុជា ជាពិសេសគោលនយោបាយគ្រប់គណបក្សឲ្យបានច្បាស់ មុននឹងធ្វើការសម្រេចចិត្តបោះឆ្នោតជ្រើសរើសមេដឹកនាំក្នុងនីតិកាលទី៥ ខាងមុខនេះ៖ «ខ្ញុំគិតថា យុវជនទាំងអស់គួរតែយល់ដឹងពីបញ្ហានយោបាយ ព្រោះថាបញ្ហានយោបាយ គឺជាបញ្ហាចម្បងសំខាន់សម្រាប់យុវជន»។
ចំណែកឯលោក ម៉ាក ចំរើន ដែលជាប្រធានសមាគមយុវជនខ្មែរ ហៅកាត់ថា ខេ.វ៉ាយ.អេ (KYA) បានថ្លែងប្រាប់វិទ្យុអាស៊ីសេរី តាមទូរស័ព្ទថា យុវជនគឺជាកម្លាំងស្នូលក្នុងការអភិវឌ្ឍសង្គម ប្រសិនបើយុវជនមិនបានដឹងនូវគោលនយោបាយអោយបានច្បាស់លាស់ ហើយស្ថិតក្រោមគំនាប និងការគំរាមកំហែងក្នុងការសម្រេចចិត្តបោះឆ្នោតឲ្យគណបក្សណាមួយនោះ នឹងអាចធ្វើឲ្យប៉ះពាល់ដល់អនាគតរបស់ពួកគេ៖ «ក្នុងនាមយុវជន ប្រសិនបើគាត់មិនទាន់បានស្វែងយល់ពីគោលនយោបាយរបស់គណបក្សនយោបាយមួយអោយបានច្បាស់លាស់ ហើយគាត់ជឿ ឬស្ថិតក្រោមគំនាបរបស់មនុស្សចាស់ផ្សេងៗនោះ ធ្វើឲ្យការសម្រេចចិត្តរបស់គាត់នោះអាចប៉ះពាល់យ៉ាងខ្លាំងដល់ដំណើរការនៃការអភិវឌ្ឍនៅកម្ពុជា ជាពិសេសយើងឃើញហើយថា ដំណើរនៃការអភិវឌ្ឍលទ្ធិប្រជាធិបតេយ្យ ការគោរពសិទ្ធិមនុស្ស ការដោះស្រាយបញ្ហាប្រជាពលរដ្ឋដែលកំពុងជួបប្រទះនឹងការខ្វះការងារធ្វើ គុណភាពអប់រំ និងការលុបបំបាត់អំពើពុករលួយនៅក្នុងប្រទេសកម្ពុជា នោះ»។
ម្យ៉ាងទៀត របាយការណ៍ស្រាវជ្រាវរបស់ក្រុមលោក កែម ឡី បានបង្ហាញថា សព្វថ្ងៃនេះមានយុវជនជាង ៤លាននាក់ ក្នុងចំណោមយុវជនទាំងនេះមានចន្លោះពី ៥ ទៅ ៦% ទេ ដែលបានចូលរៀននៅថ្នាក់មហាវិទ្យាល័យ។ យុវជនមានអាយុពី ១៥ឆ្នាំ ទៅ ៣០ឆ្នាំ មានចំនួន ២២% គ្មានការងារធ្វើ។ ដោយឡែកយុវជនដែលបញ្ចប់ការសិក្សានៅថ្នាក់មហាវិទ្យាល័យនោះមានតែ ២០% ទេ ដែលមានការងារធ្វើត្រូវនឹងជំនាញរបស់ខ្លួនដែលរៀននោះ និង ៨០% ទៀត ធ្វើការមិនត្រូវនឹងជំនាញរបស់ខ្លួនទេ។ បញ្ហានេះ ដោយសារតែទីផ្សារការងារចង្អៀត និងខ្វះព័ត៌មាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។