សំណុំរឿងព្រំដែនកម្ពុជា និងវៀតណាម ចាប់ផ្ដើមកក្រើកជាថ្មីក្នុងគំនិតរបស់ស្រទាប់យុវជនខ្មែរ។ យុវជនមួយចំនួន រួមទាំងយុវជនបក្សប្រឆាំងផងនោះ ធ្វើយុទ្ធនាការបន្តបន្ទាប់គ្នា ដើម្បីបង្ហាញពីទស្សនៈរបស់ខ្លួនជុំវិញបញ្ហាព្រំដែនកម្ពុជា និងវៀតណាម។
ប៉ុន្តែយុទ្ធនាការទាំងនោះ តែងត្រូវរារាំងដោយកម្លាំងសមត្ថកិច្ចរបស់រាជរដ្ឋាភិបាលកម្ពុជា ដែលដឹកនាំដោយសម្ព័ន្ធមិត្តវៀតណាម គឺគណបក្សប្រជាជនកម្ពុជា។ ទោះជាបែបណា ក្រុមយុវជនទាំងនោះប្ដេជ្ញាចិត្តថា នឹងមិនរាថយនោះឡើយ។
បណ្ដាញយុវជនឯករាជ្យ ប្រកាសថានឹងរៀបចំយុទ្ធនាការដាក់ញត្តិតាមបណ្ដាស្ថានទូតមហាអំណាចនានា នៅថ្ងៃទី២១ ខែកក្កដា ខាងមុខ ដើម្បីបង្ខំឲ្យវៀតណាម ទទួលស្គាល់ប្រវត្តិសាស្ត្រខ្មែរក្រោម។
ការសម្រេចនេះ ធ្វើឡើងបន្ទាប់ពីពួកគេបានចុះទៅមើលបង្គោលព្រំដែនកម្ពុជាវៀតណាម នៅភូមិសាស្ត្រស្រុកកោះធំ ខេត្តកណ្ដាល កាលពីថ្ងៃទី១១ ខែកក្កដា។ ហើយដំណើរទស្សនកិច្ចសិក្សាដោយភ្នែកទទេនោះ ត្រូវបានហាមឃាត់ពីកម្លាំងអាជ្ញាធរមូលដ្ឋាន ក្រោមហេតុផលថា មិនមានបញ្ជាពីថ្នាក់លើ បើទោះជារដ្ឋធម្មនុញ្ញកម្ពុជា ចែងច្បាស់ថា ពលរដ្ឋគ្រប់រូបមានសិទ្ធិសេរីភាពពេញលេញក្នុងការដើរហើរក៏ដោយចុះ។
សមាជិកសមាគមនិស្សិតបញ្ញវន្តកម្ពុជា យុវជន ទីប ទាវ នៅថ្ងៃទី១២ ខែកក្កដា មានប្រសាសន៍ថា ក្រុមយុវជនជាច្រើនក្រុម នឹងរួមគ្នាជាធ្លុងមួយ ដើម្បីបើកយុទ្ធនាការដាក់ញត្តិទៅកាន់ស្ថានទូតមហាអំណាចនានា ក្នុងបំណងបង្ហាញពិភពលោកថា រាស្ត្រខ្មែរមិនដែលភ្លេចប្រវត្តិសាស្ត្រឡើយ។ លោកបន្តថា ដោយសារតែរដ្ឋាភិបាលព្យាយាមលាក់បាំងព័ត៌មានគ្រប់បែបយ៉ាង ទើបធ្វើឲ្យយុវជនទាំងអស់មិនបានដឹងថា រដ្ឋាភិបាលកម្ពុជា កំពុងគិតអ្វីធ្វើអ្វីនោះឡើយ ខណៈដែលអ្នកការទូតវៀតណាម មើលងាយរាស្ត្រខ្មែរបែបនេះនោះ។
ទោះជាបែបណាក្តី ក្រុមយុវជនទាំងនោះមិនទាន់បានដាក់លិខិតជូនដំណឹងទៅកាន់សាលារាជធានីភ្នំពេញនៅឡើយទេ។
មន្ត្រីអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា សាលាក្រុងត្រៀមនឹងពិនិត្យសំណើពីក្រុមយុវជន ប៉ុន្តែគោលការណ៍ដែលអនុញ្ញាត ឬមិនអនុញ្ញាតនោះ ជាសិទ្ធិរបស់សាលាក្រុង។ លោកបន្ថែមថា មិនថាឡើយដើរដាក់ញត្តិ សូម្បីតែទីលានប្រជាធិបតេយ្យ ក៏អាជ្ញាធរមិនទាន់អនុញ្ញាតឲ្យមានការជួបជុំដែរ៖ «កន្លងមកការបង្កភាពអនាធិបតេយ្យ និងបង្កហិង្សាពីមុនមក មិនទាន់ដឹងថា អ្នកណាជាខុសអ្នកត្រូវនោះទេ»។
ទន្ទឹមនឹងគម្រោងរបស់ក្រុមយុវជននេះ សហព័ន្ធខ្មែរកម្ពុជាក្រោម កាលពីថ្ងៃទី១១ ខែកក្កដា ក៏បានចេញសេចក្តីអំពាវនាវមួយ ស្នើឲ្យពលរដ្ឋខ្មែរទាំងអស់ធ្វើបាតុកម្មទូទាំងពិភពលោក។ បាតុកម្មនោះ ដើម្បីបង្ហាញឆន្ទៈថ្កោលទោសមន្ត្រីជាន់ខ្ពស់ស្ថានទូតវៀតណាម ដែលនិយាយថា ទឹកដីកម្ពុជាក្រោម ជាដីកេរដូនតាវៀតណាម នោះ។
ក្រៅពីមានទំនាស់ជាមួយពលរដ្ឋកម្ពុជា រឿងទឹកដីខ្មែរក្រោម ប្រទេសវៀតណាម ក៏មានទំនាស់ជាមួយប្រទេសចិន ក្នុងសំណុំរឿងជម្លោះដែនទឹកនៅសមុទ្រចិនខាងត្បូងដែរ។ រយៈពេល២ខែចុងក្រោយនេះ ពលរដ្ឋវៀតណាម បានធ្វើបាតុកម្មប្រឆាំងចិន ហើយប្រើហិង្សាដុតបំផ្លាញរោងចក្រ និងសម្លាប់អ្នករកស៊ីជាតិចិន អស់ជាច្រើននាក់ទៀតផង។
កាលពីថ្ងៃទី៨ ខែកក្កដា យុវជនជាច្រើននាក់បានធ្វើបាតុកម្មនៅមុខស្ថានទូតវៀតណាម ដើម្បីទាមទារឲ្យអ្នកនាំពាក្យស្ថានទូតវៀតណាម សុំទោសជាសាធារណៈ ប៉ុន្តែបាតុកម្មនោះត្រូវបានអាជ្ញាធររដ្ឋាភិបាល ប្រើកម្លាំងបំបែកក្រោមហេតុផលរក្សារបៀបរៀបរយសង្គម។
មន្ត្រីស្ថានទូតវៀតណាម បានប្រាប់កាសែតក្នុងស្រុកថា ការធ្វើបាតុកម្មប្រឆាំងវៀតណាម ជារឿងខុសច្បាប់។ ហើយវៀតណាម មិនឈឺក្បាលវិលមុខនោះឡើយ។ ចំណែកឯមន្ត្រីក្រសួងការបរទេសកម្ពុជា វិញ បែរជាស្ងាត់មាត់មិនឃើញចេញមុខបំភ្លឺ ឬចេញសេចក្តីថ្លែងការណ៍ជុំវិញរឿងប្រវត្តិសាស្ត្រខ្មែរយួន នោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។