ខេត្តព្រះវិហារ ដែលស្ថិតនៅចម្ងាយប្រហែល ៣០០គីឡូម៉ែត្រ ភាគខាងជើងឆៀងខាងលិចពីទីក្រុងភ្នំពេញ ក៏ជាខេត្តមួយដែលសំបូរប្រាសាទ និងវត្ថុបូរាណសេសសល់នៅកប់តាមព្រៃជាច្រើនកន្លែងដូចខេត្តសៀមរាប និងកំពង់ធំ ដែរ។
ប្រជាពលរដ្ឋខ្លះនៅស្រុករវៀង នៃខេត្តនេះបានចោទប្រកាន់ថា មានក្រុមហ៊ុនរុករករ៉ែឯកជនមួយបានយកបដិមាថ្មបូរាណមួយទៅបាត់ កាលពី២សប្ដាហ៍មុន ដោយអាជ្ញាធរមូលដ្ឋានមិនធ្វើដឹងឮក្នុងរឿងនេះទេ។
ក្រុមអ្នកភូមិដីក្រហម ឃុំរំដោះ ស្រុករវៀង កំពុងពឹងពាក់អង្គការក្រៅរដ្ឋាភិបាល និងមន្ត្រីពាក់ព័ន្ធខ្លះទៀតនៅខេត្តព្រះវិហារ ឱ្យជួយធ្វើអន្តរាគមន៍ដើម្បីដកហូតយករូបចម្លាក់ថ្មបូរាណដ៏ធំ១ផ្ទាំងពីក្រុមហ៊ុនឯកជនមកវិញ។
ការស្វែងរកអន្តរាគមន៍ពីច្រើនផ្នែកនេះ ដោយសារអ្នកភូមិចោទប្រកាន់ថា ក្រុមហ៊ុនឯកជនមួយដែលមានស្ត្រីជនជាតិខ្មែរជានាយិកាបានទៅរុករករ៉ែនៅតំបន់ពួកគេ ហើយបានយកបដិមាថ្មបូរាណមួយដែលពួកគេធ្លាប់តែគោរពបូជាដាក់លើរថយន្តទៅបាត់។
តំណាងអ្នកភូមិដីក្រហម គឺលោក ជ្រឹង ស៊ឹមថន។ លោកមានប្រសាសន៍កាលពីល្ងាចថ្ងៃច័ន្ទ ទី១៥ ខែកញ្ញាថា ជាច្រើនឆ្នាំមកហើយនៅក្បែរភូមិរបស់គាត់ គឺមានបដិមាថ្មបុរាណធំ១ ដែលគេឆ្លាក់ផុសជាប់នឹងផ្ទាំងថ្ម។ អ្នកភូមិតែងទៅគោរពនិងបន់ស្រន់នៅកន្លែងដែលមានរូបបុរាណនោះ ក៏ប៉ុន្តែកាលពី២សប្ដាហ៍មុន ក្រុមហ៊ុនរុករករ៉ែឈ្មោះ ធី.ភី.ប៊ី.ធី.វី ឌីវឺឡុបមែន (TPBTV Development) បានទៅលើកយកបដិមានោះ។
លោក ជ្រឹង ស៊ឹមថន៖ «រូបធំណាស់ បើនិយាយគ្នា ៥-៦នាក់អីសែងមិនរួចទេ។ ជនជាតិភាគតិចគេហៅអ្នកតាលឿងអ៊ីចឹង។ សម័យដែលគេលួចយកទៅលក់ គេដាប់មុខមួយចំហៀង ហើយនៅទាំងអស់ ទាំងធ្នល់ ប៉ុន្តែទើបតែក្រុមហ៊ុនគេមកឃើញគឺគេដឹកយកទៅ»។
ក្រុមអ្នកភូមិអះអាងថា ចាប់តាំងពីក្រុមហ៊ុនដឹកយកបដិមាបុរាណនោះទៅ គឺពួកគេបាននាំគ្នាទៅប្រាប់មន្ត្រីឃុំ និងប៉ូលិសប៉ុស្តិ៍ឱ្យទៅយកមកវិញ ក៏ប៉ុន្តែមន្ត្រីទាំងនោះមិនយកចិត្តទុកដាក់ទេ ទើបពួកគេនាំគ្នាប្ដឹងទៅសមាគមការពារសិទ្ធិមនុស្សអាដហុក ខេត្តព្រះវិហារ ឱ្យជួយចាត់វិធានការជុំវិញរឿងនោះ។
អ្នកភូមិឱ្យដឹងថា រូបបដិមាថ្មបុរាណនេះ គឺនៅភាគខាងជើងប្រហែល ៣គីឡូម៉ែត្រ ពីប្រាសាទបុរាណដែលគេហៅឈ្មោះ ក្រពុំឈូក។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ មានប្រសាសន៍ថា លោកពិតជាបានទទួលពាក្យបណ្ដឹងរបស់អ្នកភូមិដីក្រហមដែលពឹងពាក់ឱ្យជួយអន្តរាគមន៍ក្នុងរឿងក្រុមហ៊ុនដឹកយកបដិមាថ្មបុរាណនោះមែន៖ «គាត់ស្នើសុំឱ្យអាដហុកជួយអន្តរាគមន៍ ទៅយកក្បាលអ្នកតាដាក់ចូលជាសម្បត្តិរដ្ឋ គាត់មិនចង់យកឯកជនទេ តែគាត់ស្ដាយ ព្រោះជាវត្ថុបុរាណ»។
ចំណែកអនុប្រធានមន្ទីរវប្បធម៌និងវិចិត្រសិល្បៈខេត្តព្រះវិហារ លោក គល់ វិរៈ មានប្រសាសន៍ថា លោកទើបតែទទួលព័ត៌មាននេះពីអង្គការអាដហុក។ លោកបញ្ជាក់ថា ក្រុមហ៊ុនមិនមានសិទ្ធិយកវត្ថុបុរាណដូច្នេះទេ បើសិនជាក្រុមហ៊ុនធ្វើវិនិយោគហើយប៉ះចំវត្ថុបុរាណដូច្នេះមែន ត្រូវតែរាយការណ៍ប្រាប់អាជ្ញាធរ ឬក៏មន្ទីរជំនាញ។ ក្នុងរឿងនេះ មន្ទីរវប្បធម៌និងវិចិត្រសិល្បៈកំពុងបញ្ជូនក្រុមអ្នកអភិរក្សប្រាសាទបុរាណនៅក្បែរនោះមួយក្រុមឱ្យចូលទៅស្រាវជ្រាវ៖ «ក្រុមអភិរក្សហ្នឹងសុំការអនុញ្ញាតដើម្បីចូលទៅតាមស្រាវជ្រាវមើលរូបដែលប្រជាពលរដ្ឋបានឃើញនោះ។ មិនទាន់បានទទួលដំណឹងទេ ចាំមើលប្រហែលស្អែក ខានស្អែក ពីព្រោះគេកំពុងចុះទៅពិនិត្យ»។
មន្ត្រីមន្ទីរវប្បធម៌និងវិចិត្រសិល្បៈសង្ស័យថា រូបបដិមាថ្មបុរាណនោះ ទំនងជាក្រុមអ្នកជួញដូរវត្ថុបូរាណយកចេញពីប្រាសាទក្រពុំឈូកកាលពីអំឡុងសង្គ្រាម ហើយលាក់ទុកសិន បានជាបច្ចុប្បន្ននៅឆ្ងាយពីប្រាសាទបុរាណប្រមាណ ៣គីឡូម៉ែត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។