តំណាងប្រជាពលរដ្ឋក្រីក្រទាំង ១៩គ្រួសារ គឺលោកស្រី ខន សាមី បានរៀបរាប់ជុំវិញបញ្ហានេះថា កាលពីថ្ងៃទី១៩ ឧសភា ឆ្នាំ២០១២ ប្រធានសហគមន៍លើកផ្លូវលំភូមិស្វាយខ្នី ឃុំរោងដំរី ស្រុកបាភ្នំ ខេត្តព្រៃវែង គឺលោក ទេព គិមទែ្បក មានតួនាទីដឹកនាំប្រជាពលរដ្ឋ ២៧គ្រួសារ លើកផ្លូវលំមួយខ្សែ ដែលមានបាតផ្លូវកម្ពស់ ០,៧ម៉ែត្រ ទទឹង ៤ម៉ែត្រ និងប្រវែងប្រមាណ ១.៣០០ម៉ែត្រ។ គម្រោងសាងសង់ផ្លូវនោះឧបត្ថម្ភដោយអង្គការស្បៀងអាហារពិភពលោក។
លោកស្រីបន្តទៀតថា ប្រធានសហគមន៍រូបនេះបានសន្យាឲ្យតម្លៃពលកម្ម ១ម៉ែត្រគុបស្មើនិងអង្ករ ៤គីទ្បូក្រាម តែផ្ទុយទៅវិញ គេបែរជាកេងប្រវ័ញ្ចកម្លាំងពលកម្មពីប្រជាពលរដ្ឋ ដោយអ្នកដែលបានលើកផ្លូវខ្លះគ្មានឈ្មោះបើកអង្ករទេ ចំណែកឯអ្នកពុំបានលើកផ្លូវបែរជាមានឈ្មោះទៅបើកអង្ករជំនួសទៅវិញ ៖ «ដល់ពេលខ្ញុំលើកបាន ៦ប្លង់ហ្នឹង គេឲ្យអង្ករអត់គ្រប់ ហើយអង្កាលពីប្រជុំ ថាអង្ករហ្នឹង១រយ ៦០ គេឲ្យថែមអង្ករ ១រយពីលើ ដល់ពេលបើកវាអត់ដូចកាលពីប្រជុំហ្នឹងទេ ថាហ្នឹងនិយាយហ្នឹងកាលហ្នឹងមិនដូចថាហ្នឹងណា ពេលប្រជុំហ្នឹងកាលលើកឲ្យប៉ុណ្ណេះឥឡូវម៉ោកថាប៉ុណ្ណោះដល់ពេលបើកឲ្យអង្កម៉ោកគេសុំអត្តសញ្ញាណប័ណ្ណមើលមិន ឲ្យគេមើលទេហើយខ្ញុំឆ្ងល់ត្រង់ថាលើកដីហ្នឹងហេតុអីក៏អ្នកអត់លើកបានទៅបើកអង្ករដែរ...»។
អ្នកភូមិកំពុងរៀបចំពាក្យបណ្ដឹងតាមរយៈមេភូមិស្វាយខ្នី មេឃុំរោងដំរី និងអភិបាលស្រុកបាភ្នំ ដើម្បីដោះស្រាយ និងទាមទារយកអង្ករថ្លៃឈ្នួលពលកម្មលើកផ្លូវឲ្យបានគ្រប់ចំនួនឡើងវិញ។ តែរហូតមកដល់ពេលនេះបញ្ហានៅមិនទាន់បានដោះស្រាយនៅឡើយទេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។