បុគ្គលិក និងកម្មករបម្រើការងារនៅក្រុមហ៊ុន ឡេហ្សាដាំង ឌុយ បាសាក់ (Les Jarding Du Bassac) ប្រមាណ ៥០នាក់ យល់ព្រមឈប់ធ្វើកូដកម្ម និងគ្រោងចូលធ្វើការជាធម្មតាឡើងវិញនៅថ្ងៃទី២១ ខែឧសភា ស្អែកនេះ។
ការយល់ព្រមនេះ បន្ទាប់ពីពួកគេនាំគ្នាធ្វើកូដកម្មអស់រយៈពេលមួយថ្ងៃកន្លះ និងមានការចរចាដោះស្រាយបញ្ហារវាងភាគីខាងក្រុមហ៊ុន និងតំណាងរបស់បុគ្គលិក ដោយមានការចូលរួមពីមន្ត្រីអធិការកិច្ច និងវិវាទការងារនៃមន្ទីរការងារ និងបណ្ដុះបណ្ដាលវិជ្ជាជីវៈ រាជធានីភ្នំពេញ ផង នៅថ្ងៃទី២០ ខែឧសភា។
ចំណុចដែលព្រមព្រៀងគ្នានោះរួមមាន ក្រុមហ៊ុនយល់ព្រមអនុវត្តតាមច្បាប់ការងារនៅពេលបញ្ឈប់បុគ្គលិក និងកិច្ចសន្យាផ្សេងៗ និងយល់ព្រមឲ្យតំណាងបុគ្គលិក ៣នាក់ដែលក្រុមហ៊ុនបានបញ្ឈប់កាលពីថ្ងៃទី១៨ ខែឧសភា នោះ ចូលធ្វើការវិញដោយគ្មានការគាបសង្កត់។ ចំណែកចំណុចដែលនៅសេសសល់មួយចំនួនទៀត ពួកគេយល់ព្រមបញ្ជូនទៅក្រុមប្រឹក្សាអាជ្ញាកណ្ដាលនៃក្រសួងការងារដោះស្រាយបន្តទៀតទៅតាមច្បាប់។
ក្រុមបុគ្គលិក និងកម្មករបម្រើការងារនៅក្រុមហ៊ុន ឡេហ្សាដាំង ឌុយ បាសាក់ ប្រមាណ ៥០នាក់ បានសម្រេចចិត្តឈប់ធ្វើការព្រមគ្នា កាលពីថ្ងៃទី១៩ ខែឧសភា ហើយមកអង្គុយតវ៉ានៅមុខកន្លែងធ្វើការស្ថិតនៅក្នុងសង្កាត់ទន្លេបាសាក់ ខណ្ឌចំការមន រហូតមានដំណោះស្រាយយុត្តិធម៌។ ក្រុមអ្នកតវ៉ាចោទអ្នកគ្រប់គ្រងពួកគេថា មិនគោរពសិទ្ធិបុគ្គលិក និងកម្មករដោយបញ្ឈប់បុគ្គលិកដោយសេរី ដោយមិនបង្ហាញពីទោសកំហុសណាមួយច្បាស់លាស់ និងមិនផ្ដល់ប្រាក់អតីតភាពការងារតាមច្បាប់ការងារឡើយ។ ក្រុមអ្នកតវ៉ាទាមទារសុំឲ្យតំណាងពួកគាត់ដែលអ្នកគ្របគ្រងបញ្ឈប់ពីការងារថ្មីៗនេះចំនួនបីនាក់ឲ្យចូលធ្វើការវិញ និងទាមទារឲ្យផ្ដល់ប្រាក់អតីតភាពការងារជូនអ្នកដែលក្រុមហ៊ុនបានបញ្ឈប់កាលពីពេលមុនៗ ជាពិសេសទាមទារឲ្យក្រុមហ៊ុនគោរពច្បាប់ការឲ្យបានត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។