បុរសម្នាក់ឈ្មោះ លឿង សារឿន អាយុ២៧ឆ្នាំ មានទីលំនៅៗភូមិឈើទាលជ្រុំ ឃុំប្រមោយ ស្រុកវាលវែង ខេត្តពោធិ៍សាត់ បានស្លាប់ដោយការចាក់សាំងដុត។
លឿង សារឿន មុនពេលស្លាប់បានចោទប្រកាន់ចៅហ្វាយគាត់ គឺលោក អ៊ូ ប៊ុនថាន់ ថាបានចាក់សាំងដុតសម្លាប់គាត់ ដោយខឹងសម្បារ ដែលគាត់បានធ្វើឲ្យរួចសត្វពង្រូលទម្ងន់៩គីឡូក្រាម។
តុលាការយោធាដែលមានតែមួយថ្នាក់ នៅឯរាជធានីភ្នំពេញ និងសម្រាប់កាត់ក្តីតែបណ្ដឹងដែលទាក់ទងជាមួយយោធានោះ កាលពីថ្ងៃទី៤ កក្កដា ឆ្នាំ២០០៩ បានចេញដីកានាំខ្លួនអនុសេនីយ៍ឯក អ៊ូ ប៊ុនថាន់ ឲ្យចូលមកបំភ្លឺចំពោះករណីបណ្ដឹងរបស់អ្នកស្រី ឡែត ហ៊ីង ដែលបានប្ដឹងចោទប្រកាន់ថា អនុសេនីយ៍ឯករូបនេះបានចាក់សាំងដុតសម្លាប់ប្តីគាត់។ ចាប់តាំងពីពេលនោះមក ជនជាប់ចោទ អ៊ូ ប៊ុនថាន់ បានគេចលាក់ខ្លួន ហើយទើបតែត្រូវបានកងរាជអាវុធហត្ថពោធិ៍សាត់ចាប់ខ្លួនបាន នៅល្ងាចថ្ងៃទី២ កញ្ញានេះ៕