ក្នុងសេចក្តីប្រកាសព័ត៌មាន ដែលវិទ្យុអាស៊ីសេរី ទទួលបាននៅថ្ងៃច័ន្ទ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានឲ្យដឹងថា គេនឹងដឹកនាំប្រជាពលរដ្ឋនៅតំបន់ប៉ោយប៉ែត ដែលមានកម្មករអូសរទេះ អ្នករត់ម៉ូតូឌុប អ្នកបើកបរតាក់ស៊ី អាជីវករ គ្រូបង្រៀន និង ប្រជាពលរដ្ឋសាមញ្ញ ប្រមាណ ៥០០នាក់ ដើម្បីអំពាវនាវសុំឲ្យរាជរដ្ឋភិបាលជួយពួកគេលើបញ្ហា ៥ ប្រការ គឺ ៖ សុំឲ្យបញ្ចុះតម្លៃទំនិញគ្រប់មុខលើទីផ្សារ, បញ្ចុះតម្លៃប្រេងសាំង, សុំឲ្យដំឡើងប្រាក់ខែជូនមន្រ្តីរាជការឲ្យបានសមរម្យ, សុំឲ្យគយប្រចាំច្រកទ្វារអន្តរជាតិនៅប៉ោយប៉ែត បង្កលក្ខណៈងាយស្រួលដល់អ្នករកទទួលទានឆ្លងដែន តាមរយៈការកំណត់ពន្ធដារឲ្យបានច្បាស់លាស់ ហើយនិងសុំឲ្យតម្រួតអន្តោប្រវេសន៍ច្រកប៉ោយប៉ែត ឈប់ជំរិតយកលុយពីពលករ អាជីវករខ្មែរ ដែលវិលពីប្រទេសថៃវិញនោះ ៕
