លោកស្រីមានប្រសាសន៍នេះទៅលើករណីជនចំណាស់ម្នាក់ ប្រើអំណាចរំលោភកុមារីអាយុ ៦ឆ្នាំ រស់នៅភូមិរ៉ាថ្មី ឃុំត្នោតជុំ ស្រុកក្រគរ ខេត្តពោធិ៍សាត់ កាលពីល្ងាចថ្ងៃទី២៩ ខែសីហា ឆ្នាំ២០១០។
លោកស្រីបានបន្តថា បញ្ហារំលោភផ្លូវភេទគ្មានច្បាប់ឲ្យសម្រុះសម្រួលក្រៅប្រព័ន្ធតុលាការឡើយ។ ក្រុមគ្រួសាររងគ្រោះ និងអាជ្ញាធរមូលដ្ឋានមានសិទ្ធិដាក់ពាក្យប្ដឹងទៅតុលាការ ដើម្បីឲ្យមានការផ្ដន្ទាទោសជនប្រព្រឹត្តល្មើស។
លោកស្រី ជូ ប៊ុនអេង មានប្រសាសន៍ដូច្នេះ ៖ «បើតាមផ្លូវច្បាប់ លុយនៅតែបង់ ប៉ុន្តែទោសមិនរួចទេ ពីព្រោះករណីអនីតិជន គឺគ្មានករណីលើកលែងទេ។ ចំពោះបញ្ហាថា មានបង់ប្រាក់អីយ៉ាងណានោះ ចាំខ្ញុំឲ្យសមត្ថកិច្ចនៅខាងនេះស៊ើបមើល៍ ថាតើវាមានរឿងអីកើតឡើងនៅទីនោះ?»។
ឪពុកកុមារីរងគ្រោះឈ្មោះ សុច ខៃ រស់នៅភូមិរ៉ាថ្មី ឃុំត្នោតជុំ ស្រុកក្រគរ ឲ្យដឹងថា កូនស្រីគាត់ទើបមានអាយុ ៦ឆ្នាំ ត្រូវម្ដាយយកទៅជាមួយ ដើម្បីស៊ីឈ្នួលដកសំណាបឲ្យគេ។ នៅពេលម្ដាយរវល់ការងារ មានបុរសម្នាក់ឈ្មោះ ផេង អាយុ ៤៨ឆ្នាំ រស់នៅភូមិឃុំជាមួយគាត់ បានចាប់កូនស្រីគាត់យកទៅរំលោភនៅម៉ោងប្រមាណ ៤ល្ងាច ថ្ងៃ២៩ ខែសីហា។ គាត់បានយកកូនទៅពិនិត្យសុខភាព គ្រូពេទ្យបានឲ្យដឹងថា កូនគាត់មានរបួសប្រដាប់ភេទដោយសារការរំលោភ។
លោកថា ប៉ូលិសជួញដូរភេទ និងការពារអនីតិជនបានជួយកសាងសំណុំរឿងប្ដឹងទៅតុលាការ។ ប៉ុន្តែប៉ូលិសប៉ុស្តិ៍ឃុំត្នោតជុំ បានសម្រុះសម្រួលរឿងនោះ និងសុំឲ្យគាត់ដកពាក្យបណ្ដឹងពីតុលាការកាលពីថ្ងៃអង្គារ ទី៣១ ខែសីហា ជាថ្នូរនឹងប្រាក់ ៥លានរៀលដែលជនល្មើសឈ្មោះ ផេង បង់ឲ្យគាត់។ លោកថា ប្រាក់នោះ ប៉ូលិសប៉ុស្តិ៍បានកាត់ដកយកអស់មួយចំនួន ឲ្យមកគ្រួសារគាត់តែ ១លាន៨០ម៉ឺនរៀលទេសម្រាប់ព្យាបាលកូនស្រី។
លោក សុច ខៃ រៀបរាប់ដូច្នេះ ៖ «កូនខ្ញុំរងគ្រោះ គេមិនគិតពីការរងគ្រោះ គេគិតតែពីផលប្រយោជន៍គេជាងខ្ញុំទៅទៀត ពីព្រោះអ្នកល្មើសនោះបង់ ៥លាន ប៉ុន្តែបានមកខ្ញុំតែ ២លាន។ បានទៅខាងប៉ុស្តិ៍ ហើយនិងខាងខេត្តហ្នឹងទាំងអស់វា ៣លាន ហើយលុយខ្ញុំ ២លាន គេដកយក ២០ម៉ឺនទៀត ខាងតុលាការគេយក ១០ម៉ឺន ហើយខាងប៉ូលិសប៉ុស្តិ៍គេយក ១០ម៉ឺនទៀត ខ្ញុំសល់តែ ១លាន៨០ម៉ឺន»។
សមត្ថកិច្ចផ្នែកការពារអនីតិជន លោក ចំរើន មានប្រសាសន៍ជុំវិញករណីរំលោភកុមារីអាយុ ៦ឆ្នាំ នៅភូមិរ៉ាថ្មី ឃុំត្នោតជុំ ដែលប្រព្រឹត្តដោយបុរសឈ្មោះ ផេង នោះថា ៖ «ចម្លើយរបស់ក្មេង ហើយនិងការសារភាពរបស់ជនសង្ស័យនោះ គឺវាជាករណីបៀតបៀនកេរ្តិ៍ខ្មាស។ ខ្ញុំបានបញ្ជូនទៅតុលាការអស់ហើយ»។
វិទ្យុអាស៊ីសេរីមិនអាចទាក់ទងនាយប៉ុស្តិ៍រដ្ឋបាលឃុំត្នោតជុំបានទេនៅថ្ងៃនោះ ដោយលោកមិនលើកទូរស័ព្ទ។
មន្ត្រីការពារសិទ្ធិមនុស្សអាដហុក ខេត្តពោធិ៍សាត់ អ្នកស្រី ង៉ែត ធាវី បានឲ្យដឹងថា អំពើរំលោភសេពសន្ថវៈទៅលើអនីតិជននៅក្នុងខែសីហា មាន ៣ករណី គឺកើនឡើងបើធៀបនឹងខែកក្កដាកន្លងទៅ។
អ្នកស្រី ង៉ែត ធាវី បន្តថា ករណីរំលោភផ្លូវភេទលើអនីតិជន តាមច្បាប់ក្រមព្រហ្មទណ្ឌថ្មីបានចែងថា ជនប្រព្រឹត្តល្មើសត្រូវទទួលទោសពី ១៥ឆ្នាំ ទៅ ២០ឆ្នាំ តាមបទល្មើសដែលបានប្រព្រឹត្ត និងពិន័យជាប្រាក់ច្រើនលានរៀលទៀតផង។
រដ្ឋលេខាធិការក្រសួងមហាផ្ទៃ លោកស្រី ជូ ប៊ុនអេង មានប្រសាសន៍ថា អាជ្ញាធរមូលដ្ឋានត្រូវតែលើកទឹកចិត្តឲ្យគ្រួសារជនរងគ្រោះរងនូវការរំលោភផ្លូវភេទលើអនីតិជននោះ ដាក់ពាក្យប្ដឹងទៅតុលាការ ដើម្បីឲ្យតុលាការកាត់ទោសទៅតាមច្បាប់ ធ្វើឲ្យជនល្មើសរាងចាល។ ជាមួយគ្នានោះ ការដាក់ទោសនឹងធ្វើជាគំរូដល់ជនដទៃទៀត មិនហ៊ានប្រព្រឹត្តល្មើសបែបនេះតទៅទៀត៕