ផ្សារស្រូវរបស់កសិករត្រូវបានបង្កើតនៅខេត្តតាកែវ

ដោយ សាន សុវិទ្យ

2008-05-05

កាសែតសំណេរថ្មី បានរាយការណ៍ឲ្យដឹងថា អង្គការសេដាក ឬ មជ្ឈមណ្ឌលសិក្សានិងអភិវឌ្ឍកសិកម្មកម្ពុជា បានរៀបចំឲ្យមានផ្សារស្រូវរបស់កសិករជាលើកដំបូងនៅស្រុកត្រាំកក់ ខេត្តតាកែវ ដើម្បីជាជំនួយស្មារតីឲ្យកសិករខ្មែរកាន់តែយល់ដឹងអំពីវិធីលក់ដូរស្រូវអង្ករ និងការពារកុំឲ្យមានការនាំស្រូវដែលមិនទាន់កិន ចេញទៅលក់នៅក្រៅប្រទេស ។

ប្រធានអង្គការសេដាក បណ្ឌិតយ៉ង់សាំងកុមារ បានមានប្រសាសន៍ថាមជ្ឈមណ្ឌលប្រាថ្នាចង់ឲ្យកសិករបានយល់ដឹងថាតើគេគួរធ្វើអាជីវកម្មជាមួយនឹងអតិថិជនរបស់គេដោយវិធីណា ។

លោកចង់ឲ្យកសិករបានឃើញថា តើគេគួរតែផលិតស្បៀងដោយវិធីណាទើបល្អ ។ លោកថា កាលណាកសិករបានឃើញសក្តានុពលនៃផ្សារក្នុងប្រទេសហើយ ពួកគាត់នឹងគិតគូរពីការរក្សាស្រូវទុកក្នុងជង្រុក និងការកិនស្រូវដោយខ្លួនឯងដើម្បីបញ្ចេញលក់នៅក្នុងស្រុកជាជាងនាំចេញទៅបរទេស ។

សេដាក នឹងបន្តបើកផ្សារស្រូវរបៀបនេះ នៅទូទាំងកម្ពុជាក្នុងរយៈពេល ២ឆ្នាំ ទៅមុខនេះ ៕

បោះពុម្ព អ៊ីម៉េល