មន្ត្រីសិទ្ធិមនុស្សខេត្តកំពង់ចាមបានបញ្ជាក់ថា ការបង្ករបួសស្នាម គឺជាករណីព្រហ្មទណ្ឌដែលមិនអាចសម្រុះសម្រួលតាមរដ្ឋប្បវេណីទៅរំលត់បានឡើយ។
លោក អ៊ូ ស៊ីម នៅភូមិទន្លេស ឃុំត្រពាំងព្រះ ស្រុកព្រៃឈរ បានឲ្យដឹងកាលពីថ្ងៃទី៣ កុម្ភះថា កូនរបស់លោក ឈ្មោះ តឹក សាក់ អាយុ ២៤ឆ្នាំ ត្រូវបានក្មេងទំនើងមួយក្រុមព្រួតគ្នាវាយឲ្យរងរបួសជាទម្ងន់រួមទាំងបានវាយឲ្យងាប់សេះអស់មួយក្បាលទៀតផងកាលពីថ្ងៃទី២៨ ខែធ្នូ ដោយមកពីម្ចាស់ដើមការប្រញាប់បញ្ចប់ការរាំរែកពេក។
តឹក សាក់ មានប្រសាន៍ថា ៖ «វាមិនវ៉ៃនៅរោងការទេ វ៉ៃនៅខាងត្បូងផ្ទះ។ ដល់វ៉ៃសេះងាប់បានវាវ៉ៃកូន។ កូនហ្នឹងបែកក្បាល និងត្រូវស្មា ដល់ខ្ញុំយកទៅថតទៅឃើញប្រេះឆ្អឹង។ ខ្ញុំយកតែ ៥លាន(រៀល) ទេគ្រាន់មើលជម្ងឺ។ ពីរនាក់ហ្នឹងព្រមដែរតែនៅចាំមើលគេមកទៀត បើជុំគ្នាអាចសម្រេចបានហើយ»។
លោក អ៊ូ ស៊ីម បន្ថែមថា ជនល្មើសបួននាក់ដែលស្គាល់មុខត្រូវបានលោកធ្វើពាក្យប្តឹងដាក់ជូនប៉ូលិសពេលព្រឹក បន្ទាប់ពីយប់កើតហេតុ តែពុំឃើញមានការតាមចាប់ឃាត់ខ្លួនជនល្មើសឡើយ មានការកោះអញ្ជើញឲ្យចូលជួបដោះស្រាយរួមទាំងឪពុកម្តាយខាងជនល្មើសតែពីរនាក់បានចូលខ្លួនមកដោះស្រាយ។
លោក នាង សាវាត មន្ត្រីសិទ្ធិមនុស្សនៃសមាគម អាដហុក បានលើកឡើងថា ប៉ូលិសគួរតែតាមរកជនល្មើសមកផ្តន្ទាទោសដោយពុំគួររង់ចាំការដោះស្រាយតាមបែបរដ្ឋប្បវេណីឡើយ។
លោក នាង សាវាត ថ្លែងថា ៖ «ពេលប្រមុខរដ្ឋាភិបាលប្រកាសខ្លាំងៗ បញ្ហាក្មេងទំនើងភាគច្រើនត្រូវបានអនុវត្ត ហើយភាគច្រើនបញ្ជូនទៅតុលាការកាត់ទោស។ នៅពេលដែលបញ្ហាហ្នឹងយូរទៅៗ ភាគច្រើនគឺសម្របសម្រួល ប៉ុន្តែតាមច្បាប់ការវ៉ៃទាត់ធាក់រហូតដល់មានរបួសស្នាមរហូតដល់ងាប់គោងាប់ក្របីវាជាករណីធ្ងន់ធ្ងរ។ ប៉ូលិសអត់រង់ចាំការដោះស្រាយសំណងតាមរដ្ឋប្បវេណីទេ ព្រោះសំណងរដ្ឋប្បវេណីអាចមានតែជាការស្ម័គ្រចិត្តរបស់ជនរងគ្រោះ និងអាណាព្យាបាលជនល្មើស។ តែរឿងព្រហ្មទណ្ឌវានៅតែព្រហ្មទណ្ឌដែលគេត្រូវតែធ្វើ»។
អធិការស្រុកព្រៃឈរ គឺលោក នួន សាម៉ន បានបិទទូរស័ព្ទជាបន្ទាន់បន្ទាប់ពីបានប្រាប់ពីអត្តសញ្ញាណ ប៉ុន្តែ លោក នួន សាមិន ស្នងការខេត្តបានទទួលស្គាល់ការលើកឡើងរបស់មន្ត្រីសង្គមស៊ីវិលនេះ ប៉ុន្តែលោកថា គួរមើលសភាពជាក់ស្តែងផង។
លោក នួន សាមិន បញ្ជាក់ ៖ «ទំនាស់ហ្នឹងយូរហើយ កើតទៅជាជម្លោះមួយទន្ទឹមគ្នាពិធីមង្គលការ។ តែម្ចាស់សេះរបួសដៃស្រាលទេ មិនបានទៅដេកពេទ្យកាល់ម៉ែតអីទេ។ ជាការផ្សះផ្សាគ្នារវាងម្ចាស់សេះ និងឪពុកម្តាយក្មេងៗ មិនមែនប៉ូលិសហៅមកផ្សះផ្សាអីទេ។ ឥឡូវនេះយើងគ្រប់គ្រងបានមុខសញ្ញាបាន ៨ នាក់ហើយ ខាងសម្ថកិច្ចប៉ូលិសកំពុងប្រមូលព័ត៌មានដែលនាំឲ្យកើតហេតុការណ៍នឹងឡើង ក្នុងកិច្ចប្រតិបត្តិការណ៍របស់យើង យើងចង់រកភាពជាក់លាក់របស់វា»។
លោក នួន សាមិន បន្ថែមថា ករណីធ្ងន់ធ្ងរមួយទៀតដែលសមត្ថកិច្ចកំពុងប្រមូលភស្តុតាងដើម្បីតាមចាប់ជនល្មើសដែលបង្ករបួសស្នាមជាទម្ងន់ដល់ប្រជាពលរដ្ឋនៅឃុំមួយទៀតកាលពីថ្ងៃទី២ កុម្ភះ។
លោក នាង សាវាត ទទួលស្គាល់ថា សកម្មភាពក្មេងទំនើងដែលត្រូវបានគេសង្កេតឃើញមានការវាយតប់គ្នាតាមដងផ្លូវ និងតាមទីសាធារណៈនានាត្រូវថយចុះបន្ទាប់ពីមានការផ្សព្វផ្សាយអប់រំច្បាប់ និងការបង្ក្រាបជាច្រើនមក៕