អ្នកស្លាប់នោះមិនមែនជាមនុស្សរស់នៅក្នុងខេត្តស្វាយរៀងដូចជាការសន្និដ្ឋានជំហានដំបូងរបស់សមត្ថកិច្ចឡើយ ពោលគឺមកពីខេត្តកំពង់ចាម។
លោក ថៃ ចន្ទធី មេប៉ុស្តិ៍នគរបាលឃុំជ្រៃធំ មានប្រសាសន៍ឲ្យវិទ្យុអាស៊ីសេរីដឹងថា ជនរងគ្រោះដែលត្រូវឃាតករសម្លាប់មានឈ្មោះ វង កន មានរបរជាអ្នករត់ម៉ូតូឌុប រស់នៅភូមិត្រពាំងព្រីង ឃុំត្រពាំងផ្លុង ស្រុកពញាក្រែក ខេត្តកំពង់ចាម ។ លោកបន្តថា មុនពេលកើតហេតុជនរងគ្រោះបានឌុបជនល្មើសមកពីខេត្តកំពង់ចាម ឆ្ពោះមកឃុំដងក្តា ស្ថិតក្នុងស្រុករមាសហែក ខេត្តស្វាយរៀង។
លោកមេប៉ុស្តិ៍បញ្ជាក់ថា តាមការរៀបរាប់ពីគ្រួសារជនរងគ្រោះ ជនសង្ស័យដែលបានសម្លាប់ជនរងគ្រោះ គឺជាមិត្តភ័ក្តិនឹងគ្នា មានស្រុកកំណើតនៅឃុំដងក្តា ស្រុករមាសហែក ខេត្តស្វាយរៀង ហើយបានទៅជួលផ្ទះប្រកបរបរទទួលទាននៅជិតផ្ទះជនរងគ្រោះនាខេត្តកំពង់ចាម ហើយថា ជនរងគ្រោះត្រូវបានជនសង្ស័យពឹងពាក់ឲ្យជូនមកលេងស្រុកកំណើតនៅស្រុករមាសហែក ខេត្តស្វាយរៀង ជាទីដែលជនរងគ្រោះត្រូវបានឃាតករសម្លាប់។
លោក ថៃ ចន្ទធី បានបញ្ជាក់ថា ៖ «វង កន ភូមិត្រពាំងព្រីង ឃុំត្រពាំងផ្លុង ស្រុកពញាក្រែក ខេត្តកំពង់ចាម។ ជនរងគ្រោះមកពីក្រៅ ឌុបគេមក។ គេជួលឌុប អ្នកឌុបនៅស្រុកហ្នឹង...»។
គ្រួសារជនរងគ្រោះឈ្មោះ វង កន ដែលត្រូវឃាតករសម្លាប់បានធ្វើសំណូមពរទៅដល់សមត្ថកិច្ចពាក់ព័ន្ធខេត្តស្វាយរៀង ធ្វើយ៉ាងណាវែករកមុខជនដៃដល់ក្នុងអំពើឃាតកម្មយកមកផ្តន្ទាទោសតាមច្បាប់ឲ្យបានឆាប់ ដើម្បីផ្តល់យុត្តិធម៌ជូនដល់ជនរងគ្រោះ។
មេប៉ុស្តិ៍ឃុំជ្រៃធំ លោក ថៃ ចន្ទធី បញ្ជាក់ឲ្យដឹងថា បន្ទាប់ពីសមត្ថកិច្ចពាក់ព័ន្ធខេត្តស្វាយរៀងបើកការស៊ើបអង្កេត និងដោយមានការចង្អុលបង្ហាញពីក្រុមគ្រួសារជនរងគ្រោះរួចមក ។ បច្ចុប្បន្នសមត្ថកិច្ចបានកំណត់មុខសញ្ញាជនសង្ស័យនៃឃាតកម្មប្លន់យកម៉ូតូទៅលើជនរងគ្រោះឈ្មោះ វង កន បាន ១០០% និងកំពុងស្វែងរកចាប់ខ្លួន។
លោក ថៃ ចន្ទធី បានមានប្រសាសន៍ថា ៖ «កំណត់មុខសញ្ញាបាន ១០០%... កំណត់បានហើយ ព្រោះអីប្រពន្ធកូនគេ មកហ្នឹង ប្រពន្ធគេដឹងដែរ ព្រោះមុននឹងចេញមកហ្នឹងប្រពន្ធគេដាំបាយហូប មានដោយទាំងមិត្តភ័ក្តិនៅស្រុកហ្នឹង។ វាទៅជួលផ្ទះគេនៅក្បែរគ្នាហ្នឹងណា៎! ធ្វើមិត្តភ័ក្តិគ្នា ឃាតករឈ្មោះ ថន យុត។ គេកំពុងតែដុតដៃដុតជើង កំពុងតែព្យាយាមស្វែងរក»។
មន្ត្រីអង្គការសង្គមស៊ីវិល និងសមត្ថកិច្ច បានអំពាវនាវទៅដល់បងប្អូនប្រជាពលរដ្ឋនៅទូទាំងប្រទេសសូមឲ្យប្រុងប្រយ័ត្ន និងកុំឆាប់ជឿទុកចិត្តមនុស្សទើបស្គាល់គ្នាថ្មីៗ ដែលមិនស្គាល់ប្រវត្តិច្បាស់លាស់ដើម្បីចៀសវាងគ្រោះថ្នាក់កើតឡើង។
សមត្ថកិច្ចឲ្យដឹងថា ជនរងគ្រោះឈ្មោះ វង កន រស់នៅឃុំត្រពាំងផ្លុង ស្រុកពញាក្រែក ខេត្តកំពង់ចាម ត្រូវបានឃាតករសម្លាប់ដោយកាប់ចំនួនបីពូថៅទៅលើក្បាលផ្នែកខាងក្រោយ រួចយកទៅទម្លាក់ក្នុងព្រែកជីក នាឃុំជ្រៃធំ ជាប់ព្រំប្រទល់ឃុំដងក្តា ស្ថិតក្នុងស្រុករមាសហែក ខេត្តស្វាយរៀង កាលពីរសៀលថ្ងៃទី៤ ខែមីនា ឆ្នាំ២០១០កន្លងទៅថ្មីៗនេះ៕