ពេលចេញបង្ក្រាបការតវ៉ាម្តងៗ ក្រុមសន្តិសុខទាំងនោះតែងបិទម៉ាស់ ឬពាក់មួកសុវត្ថិភាព ដោយកាន់ដំបងគ្រប់ដៃ ហើយពេលខ្លះ ថែមទាំងប្រើហិង្សាលើក្រុមបាតុករទៀតផង។ តើការងារពិតប្រាកដរបស់សន្តិសុខសាលារាជធានីភ្នំពេញ គឺជាអ្វី?
«សំឡេងបង្ក្រាប»៖ នេះជាសំឡេងរបស់ក្រុមសន្តិសុខសាលារាជធានីភ្នំពេញ ដែលបានចុះបង្ក្រាបបាតុកម្មគណបក្សសង្គ្រោះជាតិ កាលពីថ្ងៃទី៤ ខែមករា នៅទីលានប្រជាធិបតេយ្យ។
មន្ត្រីសាលារាជធានីភ្នំពេញ ប្រាប់ថា ការបង្ក្រាបនេះធ្វើឡើងតាមសេចក្ដីជូនដំណឹងរបស់សាលារាជធានីភ្នំពេញ ដែលព្រមានមេបក្សប្រឆាំងនៅថ្ងៃដំណាលគ្នានឹងការចុះបង្ក្រាបនោះ។ ក្រុមមន្ត្រីអះអាងថា កម្លាំងសន្តិសុខរបស់សាលាខណ្ឌនីមួយៗ មានភារកិច្ចចម្បង គឺជាជំនួយសមត្ថកិច្ចនគរបាលក្នុងការរក្សាសន្តិសុខសណ្ដាប់ធ្នាប់សាធារណៈ ការរក្សាអនាម័យទីសាធារណៈជាដើម។ ក៏ប៉ុន្តែនៅពេលដែលមានការតវ៉ាម្ដងៗ អាជ្ញាធររាជធានីភ្នំពេញ បានប្រើប្រាស់កម្លាំងសន្តិសុខឯកជនទាំងនេះ ដើម្បីទប់ទល់នឹងការបង្ក្រាបក្រុមបាតុករ ហើយពេលខ្លះ សន្តិសុខឯកជនទាំងនេះវាយបាតុករទៀតផង។
តំណាងអ្នកភូមិបឹងកក់ លោកស្រី ទេព វន្នី រំលឹកថា អ្នកភូមិបឹងបក់ ដែលចេញតវ៉ាក្នុងរឿងទំនាស់ដីធ្លី សុទ្ធតែធ្លាប់បានភ្លក់រស់ជាតិដំបង កណ្តាប់ដៃ និងទម្ងន់ជើងរបស់សន្តិសុខខណ្ឌដូនពេញ និងសន្តិសុខសាលារាជធានីភ្នំពេញ។ លោកស្រីបន្តថា អាជ្ញាធរបានប្រើប្រាស់កម្លាំងសន្តិសុខឯកជនទាំងនោះ ដើម្បីពន្យុះឲ្យមានការប្រទូសរ៉ាយដោយពាក្យសម្ដី និងឈានដល់ការប្រើហិង្សាបំបែកការតវ៉ា។ លោកស្រី ទេព វន្នី បញ្ជាក់ថា បញ្ហាដែលឈឺចាប់បំផុតនោះ គឺសមត្ថកិច្ចឈរការពារសន្តិសុខឯកជនដែលប្រើប្រាស់ហិង្សាលើពលរដ្ឋ៖ «គេចង់ធ្វើអីដែលគេចង់បាន ទោះបីជារឿងហ្នឹងអយុត្តិធម៌យ៉ាងណាក៏ដោយ គេត្រូវតែរើសកម្លាំងសន្តិសុខបន្ថែមដើម្បីបង្ក្រាបពលរដ្ឋ»។
ស្ត្រីបឹងកក់ដែលធ្លាប់ត្រូវសន្តិសុខសាលារាជធានីភ្នំពេញ វាយបង្ក្រាបពេលតវ៉ានោះ រួមមានស្ត្រីវ័យ ៧៤ឆ្នាំ ឈ្មោះ ង៉ែត ឃុន ត្រូវបានសន្តិសុខវាយបែកក្បាល និងចាប់បោះឡើងលើឡាន និងស្ត្រីមួយចំនួនទៀតបានរលូតកូនក្នុងពេលប៉ះទង្គិចជាមួយក្រុមសន្តិសុខទាំងនោះ។ ម្ដាយរបស់លោកស្រី ទេព វន្នី ត្រូវកម្លាំងសន្តិសុខយកចម្ពាមកៅស៊ូបាញ់បែកចិញ្ចើមពេលចូលរួមធ្វើពិធីបួងសួងនៅបរិវេណវត្តភ្នំ កាលពីខែកញ្ញា ឆ្នាំ២០១២។
ក្នុងពេលចុះបណ្ដេញបាតុករនៅទីលានប្រជាធិបតេយ្យកាលពីថ្ងៃទី៤ ខែមករា ក្រុមសន្តិសុខសាលារាជធានីភ្នំពេញ រាប់រយនាក់ ប្រដាប់ដោយដំបងដែក បំពង់ទីបប៉ុនៗកដៃ ដោយមានចងក្រណាត់ពណ៌ក្រហមនៅដៃខាងឆ្វេងផង ខ្លះទៀតពាក់វ៉ែនតាខ្មៅ និងមួកសុវត្ថិភាពដើម្បីលាក់បាំងអត្តសញ្ញាណ។ មុននឹងបង្ក្រាប ក្រុមសន្តិសុខទាំងនោះបានជួបប្រជុំគ្នាជាមុន ហើយបានចូលមកទីលាន ស្រែកសន្ធប់ទៅលើបាតុករ ដៃកាន់ដំបងដែក ចង្អុលឆ្វេងស្ដាំ វាយបំបែកសម្ភារៈនៅលើទីលានកម្ទេចទីតាំងសក្ការៈរបស់បាតុករ រុះរើអីវ៉ាន់របស់បាតុករ រុះរើវេទិការបស់គណបក្សប្រឆាំង និងដណ្ដើមយកគ្រឿងឧបភោគបរិភោគរបស់ក្រុមបាតុករជាដើម។
អ្នកណាក៏ដោយ ឲ្យតែនៅទើសមុខសន្តិសុខ ពួកគេបានយកដំបងចង្អុលមុខ ហើយស្រែកបញ្ជាឲ្យជៀសផ្លូវ។ ក្នុងនោះ អ្នកយកព័ត៌មាន ទូរទស្សន៍បាយ័នម្នាក់ ក៏ត្រូវបានកម្លាំងសន្តិសុខសាលារាជធានីភ្នំពេញ វាយនឹងដំបង បណ្ដាលឲ្យត្រូវរបួសដៃ និងខូចខាតអាយផេត (iPad) មួយគ្រឿង អ្នកថតរូបជនជាតិបរទេសម្នាក់ក៏ត្រូវសន្តិសុខគំរាមវាយក្បាលដែរ។ នៅយប់ថ្ងៃទី៤ ខែមករា កម្លាំងសន្តិសុខខណ្ឌដូនពេញ ក៏បានវាយដណ្ដើមយកម៉ាស៊ីនថតរូបរបស់អ្នកកាសែតព្រៃនគរ លោក ស៊ីន ចែងចើន ក្នុងពេលដែលលោកចុះបំពេញបេសកកម្មនៅជិតទីលានប្រជាធិបតេយ្យដែរ។
ទាក់ទងនឹងបញ្ហានេះ ប្រធានផ្នែកបច្ចេកទេស អង្កេតរបស់អង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា សន្តិសុខសាលារាជធានីភ្នំពេញ មិនត្រឹមតែធ្វើលើសភារកិច្ចទេ ប៉ុន្តែថែមទាំងធ្វើល្មើសច្បាប់ថែមទៀត។
លោកបន្តថា អំពើហិង្សាពីសំណាក់សន្តិសុខទៅលើប្រជាពលរដ្ឋ ត្រូវតែមានអ្នកទទួលខុសត្រូវ ហើយអ្នកទទួលខុសត្រូវនោះមិនមានអ្នកណាក្រៅពីអភិបាលរាជធានីភ្នំពេញឡើយ៖ «ពួកអ្នកប្រើប្រាស់កម្លាំងសន្តិសុខនោះ សន្តិសុខមិនដឹងច្បាប់ទេ គាត់គោរពតាមមេ តាមបញ្ជា ថ្ងៃក្រោយគាត់នឹងទទួលវិប្បដិសារី និងទទួលខុសផ្នែកផ្លូវច្បាប់ដោយខ្លួនឯង»។
ទោះជាបែបណាក្តី មន្ត្រីអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ពន្យល់ថា សន្តិសុខរបស់សាលារាជធានី គឺធ្វើការងារតាមការបញ្ជារបស់គណៈអភិបាលរាជធានីដែលគ្រប់គ្រងកម្លាំងទាំងនោះ។ លោកបន្តថា សន្តិសុខសាលាក្រុងធ្វើការងារដើម្បីរក្សាសណ្ដាប់ធ្នាប់ និងមិនមានបញ្ជាឲ្យប្រើហិង្សាទេ។
ចំពោះការកាន់ដំបងពេលបង្ក្រាបបាតុកម្មនៅទីលានប្រជាធិបតេយ្យនោះ ត្រូវបានលោក ឡុង ឌីម៉ង់ ប្រាប់ថា ជាការការពារខ្លួនប៉ុណ្ណោះ៖ «បងប្អូនត្រូវតែមានតួនាទីការពារសណ្ដាប់ធ្នាប់អ៊ីចឹងហើយ រឿងដំបងដែក សម្រាប់ការពារខ្លួននៅស្រុកណាក៏មានដែរ ដូចជានៅស្រុកបារាំង អាមេរិក អង់គ្លេស ជប៉ុន សុទ្ធតែប្រើប្រដាប់ការពារខ្លួនអ៊ីចឹងហើយ»។
មន្ត្រីជាន់ខ្ពស់សាលារាជធានីភ្នំពេញ បញ្ជាក់ថា សន្តិសុខរបស់សាលារាជធានីភ្នំពេញ មានចំនួនក្នុង ១ខណ្ឌៗ ៥០នាក់ ឬលើសពីនេះ។ សន្តិសុខទាំងនោះត្រូវបានជ្រើសតាំងបន្ថែមតាមបញ្ជារបស់លោកអភិបាលរាជធានីភ្នំពេញ លោក ប៉ា សុជាតិវង្ស តាំងពីលោកចូលកាន់តំណែងដំបូងមកម្ល៉េះ។
នៅថ្ងៃទី១៤ ខែមករា ពេលដែលមេដឹកនាំគណបក្សប្រឆាំងលោក សម រង្ស៉ី និងលោក កឹម សុខា ព្រមទាំងលោក រ៉ុង ឈុន ចូលខ្លួនបំភ្លឺនៅតុលាការក្រុងភ្នំពេញ សាលាក្រុងបានដាក់ពង្រាយក្រុមសន្តិសុខជាច្រើននាក់រង់ចាំឃ្លាំមើលអ្នកគាំទ្របក្សប្រឆាំង។ ក្រុមសន្តិសុខទាំងនោះ ពាក់មួកសុវត្ថិភាពបាំងមុខជិត ប្រដាប់ដោយដំបងឆក់ និងឈរយ៉ាងប្រុងប្រយ័ត្ន។
សន្តិសុខខណ្ឌដូនពេញ ឈ្មោះ តារា បានប្រាប់ថា រូបគាត់មិនចង់វាយធ្វើបាបអ្នកតវ៉ានោះទេ ប៉ុន្តែរូបគាត់ត្រូវតែធ្វើតាមបញ្ជារបស់ថ្នាក់លើដែលប្រាប់ឲ្យចាត់ការអ្នកបង្កអសន្តិសុខសង្គម។ លោកបន្តថា ពេលខ្លះអ្នកតវ៉ាបានជេរក្រុមសន្តិសុខ ហើយថែមទាំងចង្អុលមុខបណ្ដាលឲ្យសន្តិសុខខឹងក៏កើតជម្លោះតែម្ដង។ តារាបញ្ជាក់ថា ភាគច្រើននៃអំពើហិង្សាក្នុងពេលតវ៉ាគឺបណ្តាលឲ្យមកពីបទបញ្ជាដែលបញ្ជាដាច់ខាតថា ត្រូវតែបំបែកក្រុមបាតុករប៉ុណ្ណោះ។
ទោះយ៉ាងណាក្តី អនុប្រធានផ្នែកសិទ្ធិមនុស្សសមាគមអាដហុក លោក ចាន់ សុវ៉េត មានប្រសាសន៍ថា កន្លងទៅពលរដ្ឋដែលមានបញ្ហាដីធ្លី ហើយត្រូវសន្តិសុខវាយធ្វើធ្លាប់បានដាក់ពាក្យប្ដឹងរកយុត្តិធម៌ជាច្រើនដងច្រើនសា ប៉ុន្តែមិនមានដំណោះស្រាយនៅឡើយ។ លោកបញ្ជាក់ថា ក្នុងការអនុវត្តច្បាប់អ្នកដែលមានភារកិច្ចអនុវត្ត គឺមានតែមន្ត្រីនគរបាលយុត្តិធម៌តែ ១ម្នាក់ទេ ហើយត្រូវស្ថិតក្រោមការបញ្ជាពីព្រះរាជអាជ្ញា។ លោកបញ្ជាក់ថា បើសិនណាបណ្ដោយឲ្យក្រុមសន្តិសុខបង្ក្រាបអ្នកតវ៉ាតទៅទៀតពិតជាពិបាកជៀសផុតពីការប៉ះទង្គិចគ្នាដោយហិង្សាណាស់ ហើយរដ្ឋាភិបាលក៏មានកេរ្តិ៍ឈ្មោះមិនល្អក្នុងការគោរពច្បាប់ និងគោរពសិទ្ធិមនុស្សដែរ។
លោក ចាន់ សុវ៉េត៖ «ហិង្សារហូតដល់មានមនុស្សស្លាប់និងរបួសក៏មិនងាយរកដែរ អាជ្ញាធរថាអ្នកហ្នឹងមិនមែនជាប៉ូលិសទេ ថាអ្នកហ្នឹងជាអ្នកនេះជាអ្នកនោះ នេះជាហេតុផលមួយដែលយើងគួរឲ្យភ័យខ្លាច ដូចកាលនៅទីលានប្រជាធិបតេយ្យ អ៊ីចឹងឃើញសកម្មភាពដូចជាឃោរឃៅព្រៃផ្សៃណាស់»។
កម្លាំងសន្តិសុខរាជធានីភ្នំពេញ សព្វថ្ងៃជាកម្លាំងដែលជ្រើសរើសតាមឃុំមានសុវត្ថិភាពក្នុងគោលបំណងរក្សាសន្តិសុខមូលដ្ឋាន។ កម្លាំងទាំងនេះ បើកប្រាក់ខែពីសាលារាជធានី ដោយលុយប្រាក់ខែទាំងនោះបានមកពីការអង្គាសប្រាក់របស់ប្រជាពលរដ្ឋ។ ក្រុមសន្តិសុខទាំងនោះជាអ្នកធ្វើការងារស្ម័គ្រចិត្ត និងស្ថិតក្រោមបញ្ជារបស់សាលារាជធានីភ្នំពេញ ក្នុងគោលបំណងរក្សាសណ្ដាប់ធ្នាប់។ តាមច្បាប់បញ្ជាក់ថា ការប្រើប្រាស់អំពើហិង្សាជាទង្វើល្មើសច្បាប់ ទោះបីអ្នកទាំងនោះជាមន្ត្រីរាជការ កងកម្លាំងប្រដាប់អាវុធ កម្លាំងសន្តិសុខ ឬពលរដ្ឋធម្មតាក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។