មន្ត្រីជាន់ខ្ពស់នៃអគ្គស្នងការដ្ឋាននគរបាលជាតិ នៅថ្ងៃទី១៦ ខែមេសា វាយតម្លៃថា ស្ថានការណ៍សន្តិសុខទូទៅនៅក្នុងអំឡុងបុណ្យចូលឆ្នាំថ្មីប្រពៃណីជាតិ ចាប់ពីថ្ងៃទី១៤ ដល់ថ្ងៃទី១៦ ខែមេសា គឺមានលក្ខណៈល្អប្រសើរជាងឆ្នាំមុន។ ប៉ុន្តែមានករណីគ្រោះថ្នាក់ចរាចរណ៍ខ្លះនៅតាមផ្លូវជាតិលេខ ៥ ដោយសារការបើកល្បឿនលឿន និងបើកប្រជែងគ្នាជាដើម។
អ្នកនាំពាក្យអគ្គស្នងការដ្ឋាននគរបាលជាតិ លោកឧត្ដមសេនីយ៍ឯក គៀត ច័ន្ទថារិទ្ធ បានមានប្រសាសន៍ថា លោកពេញចិត្តនឹងស្ថានការណ៍សន្តិសុខ និងសណ្ដាប់ធ្នាប់សាធារណៈនៅទូទាំងប្រទេសកម្ពុជា នៅក្នុងអំឡុងបុណ្យចូលឆ្នាំថ្មីប្រពៃណីជាតិ នៅឆ្នាំម្សាញ់ ឆ្នាំ២០១៣ នេះ ដោយសារតែពុំមានអំពើប្លន់ ផ្ទុះគ្រាប់បែក ឬអំពើឃាតកម្មណាមួយទេ លើកលែងតែករណីគ្រោះថ្នាក់ចរាចរណ៍នៅតាមផ្លូវជាតិមួយចំនួន ជាពិសេសផ្លូវជាតិលេខ៥។
អគ្គស្នងការដ្ឋាននគរបាលជាតិគ្រោងនឹងបូកសរុបស្ថានការណ៍គ្រោះថ្នាក់ចរាចរណ៍នៅទូទាំងប្រទេស នៅថ្ងៃទី១៧ និងថ្ងៃទី១៨ ខែមេសា ខាងមុខនេះ។
លោកឧត្ដមសេនីយ៍ឯក គៀត ច័ន្ទថារិទ្ធ បានមានប្រសាសន៍ថា ផ្លូវជាតិលេខ៥ មានករណីគ្រោះថ្នាក់ចរាចរណ៍ច្រើនជាងផ្លូវជាតិនានា នៅក្នុងខេត្តពោធិ៍សាត់ និងខេត្តបាត់ដំបង ប៉ុន្តែលោកមិនបានបញ្ជាក់ឲ្យដឹងចំនួនអ្នកស្លាប់ និងអ្នករងរបួសបាននៅឡើយ៖ «គ្រោះថ្នាក់ចរាចរណ៍ក៏ស្រាលដែរ មិនធ្ងន់ធ្ងរទេ។ សប្បាយច្រើនភ្លេចទៅណា... គ្រោះថ្នាក់ចរាចរណ៍គ្រោះថ្នាក់អីឆ្នាំនេះសម្ដេចបានរំលឹកញឹកញាប់ទៅ យើងខាងអាជ្ញាធរនៅគ្រប់ខេត្ត រាជធានី គាត់រំលឹកញឹកញាប់ទៅ អ៊ីចឹងបងប្អូនគាត់មានការប្រយ័ត្នប្រយែង។ សំខាន់ការចូលរួមរបស់ប្រជាពលរដ្ឋ អ្នកប្រើប្រាស់ទ្រូងផ្លូវហ្នឹងឯង ជាបញ្ហា...»។
ប្រជាពលរដ្ឋឈ្មោះ មាស លី នៅឃុំល្វា ស្រុកកោះសូទិន ខេត្តកំពង់ចាម បានមានប្រសាសន៍ថា មានករណីក្មេងទំនើងឈ្លោះប្រកែកគ្នាក្នុងពិធីចាក់ធុងបាសរាំនៅតាមវត្ត ប៉ុន្តែអាជ្ញាធរមូលរដ្ឋានបានចុះមកដោះស្រាយទាន់ពេលវេលា មិនឲ្យមានកាប់ចាក់សម្លាប់គ្នា។
លោកសង្កេតឃើញថា គ្មានបញ្ហាអសន្តិសុខធ្ងន់ធ្ងរទេនៅឆ្នាំនេះ៖ «ឆ្នាំនេះសុវត្ថិភាពល្អគ្រាន់បើឆ្នាំនេះ នៅក្នុងភូមិស្រុកខ្ញុំ។ មានការជួយស្រាយគ្នាទៅ ឬបង្កលក្ខណៈណាមួយឲ្យភ្លឺថ្លាអំពីចរាចរណ៍ហ្នឹង ដោយមានព្រឹទ្ធាចារ្យខ្លះ អ្នកស្រុកខ្លះហ្នឹងជួយជ្រោមជ្រែងគ្នា ដើម្បីកុំឲ្យយកជីវិតដាក់លើផ្លូវជាតិ។ មានល្អណាស់ ខ្ញុំសរសើរនៅក្នុងពិធីចូលឆ្នាំនៅស្រុកកោះសូទិនយើងខ្ញុំ»។
ទាក់ទងនឹងស្ថានការណ៍សន្តិសុខនៅតាមបណ្ដោយព្រំដែនកម្ពុជា-ថៃ អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន និងលោកឧត្ដមសេនីយ៍ឯក គៀត ច័ន្ទថារិទ្ធ បានមានប្រសាសន៍ថា កងទ័ពកម្ពុជា កំពុងតែរក្សាភាពស្ងប់ស្ងាត់ ប៉ុន្តែប្រុងប្រយ័ត្នខ្ពស់ នៅគ្រាដែលតុលាការយុត្តិធម៌អន្តរជាតិ (ICJ= International Court of Justice) កំពុងតែចាប់ផ្ដើមសវនាការបកស្រាយសាលក្រមសំណុំរឿងប្រាសាទព្រះវិហារ ឆ្នាំ១៩៦២ ចាប់ពីថ្ងៃទី១៥ ដល់ថ្ងៃទី១៨ ខែមេសា។
លោកឧត្ដមសេនីយ៍ឯក គៀត ច័ន្ទថារិទ្ធ បានមានប្រសាសន៍ថា កងទ័ពកម្ពុជា មួយចំនួននៅតាមព្រំដែននោះ ក៏បានចូលរួមលេងល្បែងប្រជាប្រិយ និងរាំវង់ដែរ ក្នុងអំឡុងពេលចូលឆ្នាំថ្មីប្រពៃណីជាតិកន្លងមកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។