អភិបាលស្រុកភ្នំក្រវាញ លោក ទូច សំបូរ មានប្រសាសន៍ប្រាប់វិទ្យុអាស៊ីសេរីនៅព្រឹក ថ្ងៃទី១១ តុលាថា ក្នុងស្រុកភ្នំក្រវាញ មានរមណីយដ្ឋាន ៤កន្លែង និងតំបន់កម្សាន្តនានាជាច្រើនកន្លែងទៀត ដែលមានប្រជាពលរដ្ឋទៅលេងកម្សាន្ត។ លោកបន្តថា សម្រាប់ឆ្នាំនេះចាប់តាំងពីថ្ងៃបិណ្ឌ១ ដល់ថ្ងៃភ្ជុំ និងរហូតមកដល់ថ្ងៃនេះ ពុំមានឧប្បត្តិហេតុអ្វីធំដុំកើតមានឡើយ។ សន្តិសុខ និងសណ្ដាប់ធ្នាប់សង្គមនៅរមណីយដ្ឋាន និងតំបន់កម្សាន្តទាំងនោះ មានលក្ខណៈល្អប្រសើរ ៖ «នៅទំនប់ឈើតោកយើងដាក់កម្លាំងប៉ូលិស ៤០នាក់។ ហើយយើងដាក់ជារង្វង់មួយក្រុមៗ ៣នាក់ ជុំវិញទាំងអស់គឺថា ធានាសុវត្ថិភាពជូនបងប្អូន។ យើងមិនព្រួយបារម្ភក្មេងក្មាងវាយតប់គ្នា គឺអត់មានទេ»។
អធិការនគរបាលស្រុកបាកាន លោក ប៉ែន ទុង ពន្យល់ចំពោះស្ថានភាពសន្តិសុខ និងសណ្ដាប់ធ្នាប់សង្គមនៅទូទាំងស្រុកបាកាន ដែលជាស្រុកមួយមានវិសាលភាពធំជាងគេ បើប្រៀបធៀបនឹងបណ្ដាស្រុកទាំងអស់ក្នុងខេត្តពោធិ៍សាត់នោះថា ៖ «ដោយសារមុននេះយើងបានធ្វើការផ្សព្វផ្សាយពីភូមិឃុំសុវត្ថិភាព ដោយយើងធ្វើជាខិត្តប័ណ្ណឲ្យអាចារ្យគណៈកម្មការវត្ត និងសាលារៀនជួយផ្សព្វផ្សាយដល់អ៊ីចឹងទៅគាត់មានការយល់ដឹងច្រើន។ ដល់អ៊ីចឹងទៅវាដំណើរការល្អ គ្មានកើតរឿងអីគួរឲ្យចាប់អារម្មណ៍ទេ»។
ស្ថានភាពប្រហាក់ប្រហែលគ្នាចំពោះបញ្ហាសន្តិសុខ និងសុវត្ថិភាពសង្គមនៅឯស្រុកកណ្ដៀង។ លោក ឈន រិទ្ធិ អធិការនគរបាលស្រុកកណ្ដៀងមានប្រសាសន៍ប្រាប់វិទ្យុអាស៊ីសេរីថា ការឈ្លោះប្រកែកគ្នានៃក្រុមក្មេងទំនើង និងក្រុមបងតូចបងធំ ក៏មានការថយចុះយ៉ាងខ្លាំងផងដែរ ៖ «បើយើងប្រៀបធៀបឆ្នាំមុនៗ ឃើញថាឆ្នាំនេះល្អជាង។ ព្រោះឆ្នាំមុនៗ មានចោរលួចចោរឆក់ខ្លះៗ ឆ្នាំនេះគឺគ្មានសោះតែម្ដង។ រឿងវាយតប់គ្នាបងធំបងតូចក៏គ្មានដែរ...»។
ប្រធានការិយាល័យនគរបាលចរាចរជើងគោកខេត្តពោធិ៍សាត់លោក រស់ ចំរើន មានប្រសាសន៍ថា គិតចាប់តាំងពីចាប់ផ្ដើមកាន់បិណ្ឌ រហូតមកទល់ថ្ងៃ១១ តុលានេះ ពុំមានករណីគ្រោះថ្នាក់ចរាចរធ្ងន់ធ្ងរណាមួយកើតឡើង ដែលបណ្ដាលឲ្យមនុស្សរងរបួសធ្ងន់ ឬស្លាប់នោះទេ។
ទោះបីជាយ៉ាងនេះក្តី មន្ត្រីនៃស្នងការនគរបាលខេត្តពោធិ៍សាត់បានឲ្យដឹងថា ថ្វីបើបញ្ហាសន្តិសុខ និងសណ្ដាប់ធ្នាប់សង្គមមានលក្ខណៈល្អជាងបើប្រៀបធៀបនឹងឆ្នាំកន្លងទៅ តែគេសង្កេតឃើញថា ចំនួនអ្នកដើរលេងតាមតំបន់រមណីយដ្ឋានគ្រប់កន្លែង បែរជាមានការថយចុះគួរឲ្យកត់សម្គាល់៕