អ្នក​ភូមិ​៤​គ្រួសារ​ចោទ​ប្រធាន​សមាគមន៍​អភិវឌ្ឍន៍​យុទ្ធជន​ថា​លួច​លក់​ដី​ពួក​គាត់

អ្នក​ភូមិ ៤ គ្រួសារ ដែល​មាន​ទំនាស់​ដី​ធ្លី​ទំហំ ២០ ហិកតារ ជា​មួយ​សមាគមន៍​អភិវឌ្ឍន៍​យុទ្ធជន​កម្ពុជា​ខេត្ត​កំពង់ចាម ដាក់​ពាក្យ​បណ្ដឹង​ទៅ​សមាគម អាដហុក នៅ​ថ្ងៃ​ទី​២៤ ខែ​ឧសភា ដោយ​ចោទ​ប្រកាន់​ប្រធាន​សមាគមន៍​នោះ​ថា បាន​លួច​លក់​ដី​រួម​របស់​ពួក​គាត់។
ដោយ ទេព សុរ៉ាវី
2012-05-24
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

សមាគមន៍​អភិវឌ្ឍន៍​យុទ្ធជន​កម្ពុជា បាន​ស្នើ​សុំ​ដី​សម្បទាន​សង្គម​កិច្ច​ចំនួន ៨០៣ ហិកតារ ស្ថិត​នៅ​ភូមិ ព្រែក​តូច ឃុំ​ជីរោទី១ ស្រុក​ត្បូងឃុំ សម្រាប់​ចែក​ជូន​ប្រជាពលរដ្ឋ​ក្រីក្រ យោធិន​ពិការ យោធិន​រំសាយ​ចំនួន ៣៣០ គ្រួសារ។ លោក ហ៊ុន ណេង អភិបាល​ខេត្ត​កំពង់ចាម បាន​ចុះ​ហត្ថលេខា យល់​ព្រម​តាម​សំណើ កាល​ពី​ខែ​ឧសភា ឆ្នាំ​២០០៩ ក្នុង​លក្ខខណ្ឌ បើ​ដី​តំបន់​នោះ​ពុំ​មាន​ប៉ះ​ពាល់​អ្វី​ទេ​នោះ។

យោង​តាម​លិខិត​មួយ​ទៀត​របស់ លោក ស៊ុន សុខលី អតីត​អភិបាល​ស្រុក​ត្បូងឃុំ ដាក់​ជូន​ទៅ​អភិបាល​ខេត្ត​កំពង់ចាម ឲ្យ​ដឹង​ដែរ​ថា មាន​ប្រជាពលរដ្ឋ​ក្រីក្រ​ចំនួន ១០៥​គ្រួសារ រស់​នៅ​ក្នុង​តំបន់​ដី សំណើ​សុំ​របស់​សមាគមន៍ តែ​ពួក​គេ​ត្រូវ​បាន​បញ្ចូល​ឈ្មោះ ក្នុង​បញ្ជី​សុំ​ដី​សម្បទាន សង្គម​កិច្ច​រួច​ហើយ តាំង​ពី​ឆ្នាំ​២០០៩។ តាម​គោលការណ៍​របស់​អាជ្ញាធរ​ស្រុក​ត្បូងឃុំ អ្នក​ភូមិ​ទាំង​នោះ ត្រូវ​ទទួល​បាន​ដី​ភូមិ​ទំហំ ៣០ គុណ ៥០ ម៉ែត្រ និង​ដី​ធ្វើ​ស្រែ​ចំការ​ទំហំ ២ ហិកតារ ក្នុង​មួយ​គ្រួសារ។

អ្នក​ស្រី ផាត សុខា អ្នក​ភូមិ​ម្នាក់​ក្នុង​ចំណោម ៤ នាក់ ដែល​បាន​ដាក់​ពាក្យ​បណ្ដឹង​ទៅ​អង្គការ អាដហុក ឲ្យ​ដឹង​នៅ​ថ្ងៃ​ទី​២៤ ខែ​ឧសភា ថា ប្រជាពលរដ្ឋ ១០៥​គ្រួសារ រួម​ទាំង​អ្នក​ស្រី ដែល​បាន​ចុះ​បញ្ជី​ទទួល​ដី​សម្បទាន​សង្គម​កិច្ច​ពី​សមាគមន៍ នៅ​មិន​ទាន់​ទទួល​ចំណែក​ដី​នៅ​ឡើយ​ទេ។ ផ្ទុយ​ទៅ​វិញ សមាគមន៍​នោះ​បាន​លួច​លក់​ដី ទំហំ ៨០៣ ហិកតារ ទៅ​ឲ្យ​ឈ្មួញ​វិនិយោគ តាំង​ពី​ចុង​ឆ្នាំ​២០០៩។

អ្នក​ស្រី ផាត សុខា៖ «ខុស​ច្បាប់ ហើយ​លក់​ឲ្យ​ឈ្មួញ​ទៀត ដល់​ពេល​ខ្ញុំ​និយាយ​តវ៉ា​ជា​មួយ​គាត់ គាត់​ថា គាត់​មិន​មែន​លក់​ទេ ជួល​ឲ្យ​គេ ១០​ឆ្នាំ។ ខ្ញុំ​ថា ជួល​ក៏​ដូច​លក់ បង​ឯង​បាន​លុយ ខ្ញុំ​អត់​បាន​លុយ​ផង​ហ្នឹង ខ្ញុំ​ម្ចាស់​ដី​អត់​មាន​សិទ្ធ​ទេ​អញ្ចឹង? បង​ឯង​អញ្ចឹង ដូច​ប្លន់​ខ្ញុំ​ទទេ ទាំង​រស់​ស្រស់ៗ»

អ្នកស្រី ផាត សុខា បាន​ទិញ​ដី​ពី​អ្នក​ភូមិ​ជីរោទី១ តាំង​ពី​ឆ្នាំ ២០០៧ ទំហំ ៤ ហិកតារ តែ​ដី​នោះ​ត្រូវ​បាន​អាជ្ញាធរ​ខេត្ត​កាត់​ទៅ​ជា​ដី​សម្បទាន​សង្គមកិច្ច គ្រប់​គ្រង​ដោយ​សមាគមន៍​អភិវឌ្ឍន៍​យុទ្ធជន​កម្ពុជា។ អ្នក​ស្រី​ស្នើ​សុំ​ឲ្យ​អង្គការ អាដហុក ជួយ​អន្តរាគមន៍​លើ​ករណី​នេះ​ដើម្បី​យក​ដី​មក​គ្រប់​គ្រង​វិញ ខណៈ​ដែល​សមាគមន៍​អភិវឌ្ឍន៍​យុទ្ធជន​កម្ពុជា ធ្វើ​ខុស​ពី​គោលការណ៍ ដែល​បាន​ស្នើ​សុំ​ទៅ​អាជ្ញាធរ​ខេត្ត ថា​ទុក​ដី​នោះ​បែង​ចែក​ឲ្យ​ប្រជាពលរដ្ឋ​ក្រីក្រ យោធិន​ពិការ និង​យោធិន​រំសាយ។

លោក ជាប ឈាងលី អ្នក​ភូមិ​ម្នាក់​ទៀត មាន​ដី​ទំនាស់​ទំហំ ៥ ហិកតារ ក៏​ស្នើ​សុំ​ដូច​គ្នា​នេះ​ដែរ។ លោក​បន្ត​ថា សមាគមន៍​តែង​សន្យា​ថា នឹង​គិត​គូរ​ដោះ​ដូរ​លុយ​កាក់​ជូន​អ្នក​ភូមិ​ដែល​មាន​ដី​នៅ​តំបន់​នោះ។ មាន​ប្រជាពលរដ្ឋ​ខ្លះ​ប៉ុណ្ណោះ ដែល​ទទួល​សំណង​តិច​តួច ពី​ប្រធាន​សមាគមន៍ ហើយ​ខ្លះ​ទៀត​មិន​ទទួល​បាន​អ្វី​ទាំង​អស់។

លោក ជាប ឈាងលី៖ «យើង​ត្រូវ​សម្រុះ​សម្រួល​ជា​មួយ​ប្រជាជន បើ​ចង់​បាន យើង​ទិញ​ដូរ​ពី​ប្រជាជន ចង់​លក់​ឲ្យ​នរណា​ក៏​លក់​ទៅ តែ​ឥឡូវ​វា​ខុស​ច្បាប់។ ដំណាក់​កាល​នេះ​ហើយ ខ្ញុំ​អត់​ចង់​បាន​លុយ​ទេ ខ្ញុំ​ចង់​បាន​ដី​ខ្ញុំ​មក​វិញ ព្រោះ​ដី​ខ្ញុំ​នៅ​ចំ​ផ្លូវ​ធំ​តែ​ម្តង»

លោក ជិន សារ៉េន ប្រធាន​សមាគមន៍​អភិវឌ្ឍន៍​អតីត​យុទ្ធជន​កម្ពុជា​ប្រចាំ​សាខា​ខេត្ត​កំពង់ចាម បដិសេធ​ថា លោក មិន​បាន​លក់​ដី​សម្បទាន​សង្គម​កិច្ច​នោះ​ឲ្យ​ទៅ​ក្រុម​វិនិយោគ​ទេ។ តែ​ថា បាន​ដាក់​ជួល​ឲ្យ​ក្រុមហ៊ុន រយៈពេល ២​ឆ្នាំ ដើម្បី​យក​លុយ​មក​ដោះ​ដូរ​ឲ្យ​អ្នក​ភូមិ ១០៥​គ្រួសារ។ លោក​បន្ត​ថា នៅ​សល់​ប្រជាពលរដ្ឋ​ប្រមាណ ២០​គ្រួសារ​ទៀត ក្នុង​ចំណោម ១០៥​គ្រួសារ ដែល​សមាគមន៍​មិន​ទាន់​ដោះស្រាយ​សំណង​ជូន​ពួក​គេ។

លោក ជិន សារ៉េន៖ «ជួល​ឲ្យ​ក្រុមហ៊ុន ២​ឆ្នាំ​ហើយ តែ​ក្រុមហ៊ុន​ទៅ​ធ្វើ​វា​ទាក់​ទាញ​នឹង​ដី​ប្រជាពលរដ្ឋ​នៅ​ក្នុង​នោះ​ធ្វើ​អត់​ចេញ ដី​ប្រជាពលរដ្ឋ ១០៥​គ្រួសារ អត់​លិខិត ស្លាក​ស្នាម ពី​មេឃុំ​អី​ទេ»

អ្នក​ស្រី សិត ណៃសយ អភិបាល​ស្រុក​ត្បូងឃុំ បដិសេធ​មិន​ធ្វើ​ការ​អត្ថាធិប្បាយ​ជុំវិញ​ករណី​ទំនាស់ ដី​ធ្លី​រវាង​អ្នក​ភូមិ​ជា​មួយ​ប្រធាន​សមាគមន៍​អភិវឌ្ឍន៍​យុទ្ធជន​កម្ពុជា​ទេ នៅ​ថ្ងៃ​ទី​២៤ ខែ​ឧសភា។

លោក នាង សុវ៉ាត អ្នក​សម្រប​សម្រួល​អង្គការ អាដហុក ខេត្ត​កំពង់ចាម ឲ្យ​ដឹង​ថា ការ​ទាម​ទារ​របស់ អ្នក​ភូមិ​ត្រូវ​តាម​នីតិវិធី​ច្បាប់។ រីឯ​ប្រធាន​សមាគមន៍​បាន​ធ្វើ​ខុស​ពី​គោលការណ៍ លើ​សំណើ​សុំ​របស់​ខ្លួន ដោយ​បាន​បង្វែរ​ដី​នោះ លក់ ឬ​ជួល​ឲ្យ​ក្រុមហ៊ុន​ឯកជន ដោយ​មិន​បាន​សម្បទាន​ដី សង្គម​កិច្ច​ដល់​ប្រជាពលរដ្ឋ​ក្រីក្រ យោធិន​ពិការ និង​យោធិន​រំសាយ។

លោក នាង សុវ៉ាត៖ «យើង​ពិនិត្យ​មើល​ទៅ​ថា ការ​ទាម​ទារ​របស់​គាត់ វា​ត្រឹម​ត្រូវ ឯ​ខាង​ក្រុមហ៊ុន​ទេ ដែល​យើង​មើល​ទៅ​ឃើញ​ថា ទី១ ការ​ដែល​គាត់​សុំ​ដី​សម្បទាន​ធ្វើ​អ្វី​ទៅ​តាម​ប្រធានបទ​នៃ​ការ​ស្នើ​សុំ​របស់​គាត់ យើង​អត់​ទាន់​ឃើញ​ទេ រហូត​ដល់​ឥឡូវ​នេះ តាម​ស្តាប់​ព័ត៌មាន​ថា គាត់​បាន​លក់​ឲ្យ​គេ​ហើយ ប៉ុន្តែ​អ្វី​ដែល​គាត់​និយាយ​ថា គាត់​ជួល​ឲ្យ​គេ ធ្វើ​អញ្ចឹង​ក៏​ខុស​ដែរ​ព្រោះ​ដំណើរ​ហ្នឹង​វា​ខុស​តាំង​ពី​ដើម​ទី​តែ​ម្តង»

លោក នាង សុវ៉ាត បន្ត​ថា សមាគមន៍ អាដហុក កំពុង​សិក្សា​ស្រាវជ្រាវ​វិវាទ​ដី​ធ្លី​នេះ នឹង​ត្រៀម​ដាក់ លិខិត​អន្តរាគមន៍​ទៅ​អភិបាល​ខេត្ត​ឲ្យ​ជួយ​ដោះស្រាយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល