រដ្ឋាភិបាលឥណ្ឌា បានផ្ដល់ជំនួយទឹកប្រាក់ប្រមាណ ១,៥លានដុល្លារសហរដ្ឋអាមេរិក ដើម្បីសាងសង់សារមន្ទីរវាយនភណ្ឌប្រពៃណីអាស៊ីមួយ នៅខេត្តសៀមរាប។
ការសាងសង់បានចាប់ផ្ដើមឡើងតាំងតែពីអំឡុងខែកញ្ញា ឆ្នាំ២០១០ ដោយចំណាយពេលអស់ជិត ៤ឆ្នាំ។ រហូតមកដល់ពេលនេះ សារមន្ទីរវាយនភណ្ឌប្រពៃណីអាស៊ីបានសាងសង់រួចរាល់ហើយ។
មន្ត្រីជាន់ខ្ពស់របស់ទីស្ដីការគណៈរដ្ឋមន្ត្រី និងអាជ្ញាធរអប្សរា បានចូលរួមទ្វេភាគីជាមួយតំណាងរដ្ឋាភិបាលឥណ្ឌា ដើម្បីបើកសម្ពោធអាគារសារមន្ទីរវាយនភណ្ឌប្រពៃណីអាស៊ី សម្រាប់ធ្វើការតាំងពិព័រណ៍ផលិតផលសូត្រតែមួយគត់នៅក្នុងតំបន់។
ឧបនាយករដ្ឋមន្ត្រី និងជារដ្ឋមន្ត្រីទីស្ដីការគណៈរដ្ឋមន្ត្រី លោក សុខ អាន បានអញ្ជើញចូលធ្វើ ជាគណៈអធិបតីនៃពិធីបើកសម្ពោធសារមន្ទីរនៅក្នុងខេត្តសៀមរាប នៅល្ងាចថ្ងៃច័ន្ទ ទី៧ ខែមេសា។
អ្នកនាំពាក្យអាជ្ញាធរអប្សរា គឺអ្នកស្រី ចៅ ស៊ុន កិរិយា។ អ្នកស្រីបានមានប្រសាសន៍ថា សារមន្ទីរ វាយនភណ្ឌប្រពៃណីអាស៊ីសម្រាប់តាំងពិព័រណ៍ផលិតផលសូត្រពីតាមបណ្ដាប្រទេសទន្លេមេគង្គនេះ គឺជាសារមន្ទីរតែមួយគត់ដែលទើបតែមាននៅក្នុងប្រទេសកម្ពុជា។
អ្នកស្រី ចៅ ស៊ុន កិរិយា បានបញ្ជាក់ថា នៅក្នុងពេលដែលបើកសម្ពោធនេះ គឺប្រទេសចំនួន ៥ នៃកិច្ចសហប្រតិបត្តិការទន្លេមេគង្គ និងទន្លេគង្គា បាននាំយកផលិតផលសូត្រពីប្រទេសរៀងៗខ្លួនមកដាក់តាំងពិព័រណ៍៖ «គឺមានភូមា មានឡាវ វៀតណាម កម្ពុជាយើង ជាមួយឥណ្ឌា ៥ប្រទេស។ គេលើករបស់គេតាំងពេញហ្នឹងហើយ គេដាក់ឱ្យយើងរហូត ពីព្រោះនេះជាសហប្រតិបត្តិការ ទន្លេមេគង្គ-ទន្លេគង្គា។ មានន័យថា ប្រទេសឥណ្ឌា ជាមួយប្រទេសជុំវិញទន្លេមេគង្គ ៥ហ្នឹង។ ថៃមានរឿងស្មុគស្មាញអីគាត់ទេ ប៉ុន្តែគាត់សន្យាថា នឹងចូល ប៉ុន្តែគាត់រវល់»។
អាគារសារមន្ទីរវាយនភណ្ឌប្រពៃណីអាស៊ីនេះ គឺបានទទួលជំនួយជាទឹកប្រាក់ចំនួន ១,៥លានដុល្លារអាមេរិកពីរដ្ឋាភិបាលឥណ្ឌា។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានមានប្រសាសន៍ថា ប្រទេសឥណ្ឌា បានជ្រើសយកអាជ្ញាធរអប្សរាទទួលបន្ទុកការពារប្រាសាទបូរាណនៅខេត្តសៀមរាប ជាដៃគូនៃការសាងសង់សារមន្ទីរវាយនភណ្ឌប្រពៃណីអាស៊ីមួយនេះ ពីព្រោះតែឥណ្ឌា យល់ឃើញថា ខេត្តសៀមរាប គឺជាតំបន់សំបូរប្រាសាទបូរាណ ដែលកំពុងទាក់ទាញអ្នកទេសចរណ៍បរទេសកាន់តែច្រើនឡើងៗ ពីមួយឆ្នាំទៅមួយឆ្នាំ ហើយឥណ្ឌា ចង់ឱ្យពិភពលោកបានឃើញសក្ដានុពលវាយនភណ្ឌរបស់ខ្លួនតាមរយៈអ្នកទេសចរបរទេស។
លោក ផៃ ស៊ីផាន៖ «ជំនួយហ្នឹងរៀបចំសហការជាមួយអាជ្ញាធរអប្សរា ដែលពាក់ព័ន្ធនឹងបេតិកភ័ណ្ឌ។ ដូច្នេះលុយហ្នឹង យើងអត់មានទទួលពីគេទេ គឺគេសាងសង់ខ្លួនគេ ក៏ប៉ុន្តែជាកិច្ចសហការទ្វេភាគីរវាងឥណ្ឌា ជាមួយអាជ្ញាធរអប្សរា ហើយយើងដឹងថា អាជ្ញាធរអប្សរា វាស្ថិតនៅក្នុងការចាត់ចែងរបស់ទីស្ដីការគណៈរដ្ឋមន្ត្រី»។
កាលពីថ្ងៃទី១៦ ខែកញ្ញា ឆ្នាំ២០១០ កន្លងទៅ ប្រធានាធិបតីប្រទេសឥណ្ឌា លោកស្រី ប្រាទីបា ទេវីសិង្ហ ប៉ាទីល (Pratibha Devisingh Patil) ធ្លាប់បានអញ្ជើញជាអធិបតីក្នុងពិធីបញ្ចុះបឋមសិលា នៃការផ្ដើម សាង់សង់សារមន្ទីរវាយនភណ្ឌមួយនេះ។
អាជ្ញាធរអប្សរាបានឲ្យដឹងថា សារមន្ទីរវាយនភណ្ឌប្រពៃណីអាស៊ី ដែលសាងសង់លើផ្ទៃដីទំហំ ១ហិកតារ ត្រូវបានជ្រើសរើសដោយផ្អែកលើទីតាំងដែលមានសក្ដានុពលទេសចរណ៍ ដើម្បីឱ្យយល់ដឹងអំពីបេតិកភណ្ឌពិភពលោកនៃតំបន់អង្គរ សម្រាប់ប្រទេសជាសមាជិកនៃកិច្ចសហប្រតិបត្តិការទន្លេមេគង្គ-គង្គា មានកម្ពុជា ឥណ្ឌា ឡាវ ភូមា ថៃ វៀតណាម និងបណ្ដាប្រទេសពីភូមិភាគអាស៊ីអាគ្នេយ៍មួយចំនួនទៀត មានម៉ាឡេស៊ី ឥណ្ឌូនេស៊ី សិង្ហបុរី និងហ្វីលីពីន ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។