សេចក្តីជូនដំណឹងរបស់ក្រសួងសាធារណការ និងដឹកជញ្ជូន ឲ្យដឹងថា ក្រោយកិច្ចប្រជុំជាមួយក្រុមហ៊ុនដឹកអ្នកដំណើរ និងក្រុមហ៊ុនដឹកជញ្ជូនទំនិញកាលពីពេលថ្មីៗនេះ មានក្រុមហ៊ុនដឹកជញ្ជូនចំនួន១៤ បានសន្យាមិនដំឡើងថ្លៃឈ្នួលពេលបុណ្យភ្ជុំបិណ្ឌ។
សេចក្តីជូនដំណឹងរបស់ក្រសួងសាធារណការ និងដឹកជញ្ជូន ដែលបានផ្សព្វផ្សាយតាមបណ្ដាញសង្គមហ្វេសប៊ុក (facebook) ឲ្យដឹងទៀតថា ក្រុមហ៊ុនទាំង១៤ នោះរួមមាន ក្រុមហ៊ុន ថុង សម្បត្តិ ក្រុមហ៊ុន ម៉ី ហុង ដឹកអ្នកដំណើរ ក្រុមហ៊ុន ផលបូប៉ាន់ ត្រេនស្ព័ត ក្រុមហ៊ុន នាគក្រហម ក្រុមហ៊ុនដឹកអ្នកដំណើរឡារីតា ក្រុមហ៊ុន វ៉ាង រ៉ិច ក្រុមហ៊ុន Giant IBIS Transport ក្រុមហ៊ុនហ្គោលដេនបាយ័ន អេចប្រេស ក្រុមហ៊ុន រិទ្ធិ មុនី ដឹកអ្នកដំណើរ ក្រុមហ៊ុនកាពីតូល ក្រុមហ៊ុនពន្លឺអង្គរខ្មែរដឹកជញ្ជូន ក្រុមហ៊ុនណាហ្គាត្រេនស្ព័ត ក្រុមហ៊ុន វីរៈ ប៊ុនថាំ និងក្រុមហ៊ុន NATTANKAN Cambodia ដឹកជញ្ជូនអ្នកដំណើរឆ្លងដែន។
សេចក្តីជូនដំណឹងដដែលបញ្ជាក់ថា ការសន្យាមិនដំឡើងថ្លៃឈ្នួលដឹកជញ្ជូន ធ្វើឡើងក្រោយរដ្ឋមន្ត្រីក្រសួងសាធារណការ និងដឹកជញ្ជូន បានស្នើឲ្យក្រុមហ៊ុនដឹកជញ្ជូនអ្នកដំណើរទាំងអស់ កុំដំឡើងថ្លៃឈ្នួលដឹកជញ្ជូននៅក្នុងឱកាសពិធីបុណ្យភ្ជុំបិណ្ឌ ដើម្បីលើកកម្ពស់ស្មារតីប្រុងប្រយ័ត្នក្នុងការបើកបរ ព្រមទាំងផ្តល់ភាពងាយស្រួល និងសុវត្ថិភាពជូនប្រជាពលរដ្ឋដែលត្រូវការធ្វើដំណើរច្រើនក្នុងអំឡុងរដូវភ្ជុំបិណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។