សំណុំរឿងរបស់កម្មករកម្ពុជា ទាំង ១៦នាក់ បានបញ្ជូនដល់ដៃតុលាការថៃហើយ នៅពេលនេះ។ អភិបាលខេត្តបន្ទាយមានជ័យ ឲ្យដឹងថា នៅក្នុងជំនួបចរចាដែលធ្វើឡើងនៅច្រកប៉ោយប៉ែតនោះ ភាគីថៃបានបដិសេធចំពោះសំណើរបស់កម្ពុជា ដែលស្នើសុំឲ្យដោះលែងអ្នកទាំង ១៦នាក់នោះមកវិញ។ ចំណែកតំណាងកម្មករព្រមានថា បើអ្នកទាំង ១៦ នោះមិនត្រូវបានភាគីថៃ ដោះលែងវិញទេ ច្រកទ្វារប៉ោយប៉ែតនេះ អាចនឹងបិទជាថ្មីទៀត។
មន្ត្រីជាន់ខ្ពស់ខេត្តបន្ទាយមានជ័យ ថ្លែងថា កម្មករទាំង ១៦នាក់ ដែលតម្រួតថៃចាប់ខ្លួនក្នុងទឹកដីថៃនោះ អាចនឹងត្រូវដោះលែងក្នុងសប្ដាហ៍ខាងមុខទៀតនេះ បន្ទាប់សំណុំរឿងនេះឆ្លងកាត់តុលាការរួច។
អភិបាលខេត្តបន្ទាយមានជ័យ លោក គោ ស៊ុំសារឿត ឲ្យដឹងកាលពីល្ងាចថ្ងៃទី១៦ សីហា ថា កម្មករដែលត្រូវបានភាគីថៃ ចាប់ខ្លួន កាលពី២ថ្ងៃមុននេះ អាចនឹងដឹងពីជោគវាសនានៅដើមសប្ដាហ៍ខាងមុខទៀតនេះ។ លោកថ្លែងបន្តថា នៅក្នុងជំនួបទ្វេភាគីជាមួយអភិបាលខេត្តស្រះកែវ ខាងភាគីថៃ និយាយថា ដើម្បីបញ្ចប់វិវាទនៅចក្រទ្វារប៉ោយប៉ែតនេះ សមភាគីថៃថ្លែងថា គេមិនអាចអនុវត្តបានភ្លាមៗ តាមសំណើរបស់កម្ពុជាទេ ដោយហេតុថា សំណុំរឿងរបស់កម្មករទាំង ១៦នាក់នោះ បានបញ្ជូនដល់ដៃតុលាការរួចហើយ។ បើទោះជាយ៉ាងនេះក៏ដោយចុះ នៅក្នុងជំនួបនោះលោក គោ ស៊ុំសារឿត ស្នើសុំឲ្យភាគីថៃ ទម្លាក់ចោលបទចោទទាំងឡាយណាប្រឆាំងកម្មករកម្ពុជា ដោយសារពួកគេគឺគ្រាន់តែជាអ្នកស៊ីឈ្នួលដឹកឥវ៉ាន់ចូលទៅក្នុងទឹកដីថៃប៉ុណ្ណោះ។ ហេតុនេះ កម្មករទាំងនោះគប្បីត្រូវទទួលបានសិទ្ធិសេរីភាពឡើងវិញ។
លោកបន្តថា៖ «ឯកឧត្ដមអភិបាលខេត្តស្រះកែវហ្នឹង គាត់នឹងខិតខំដោះស្រាយតាមនីតិវិធីច្បាប់ផ្សេងៗហ្នឹងឲ្យបានឆាប់។ គាត់សន្យាជាមួយយើងថា យូរបំផុតព្រឹកថ្ងៃច័ន្ទ ឬក៏ព្រឹកថ្ងៃអង្គារ»។
បើទោះជាមានបញ្ហាផ្លូវច្បាប់នៅបន្តតានតឹង តែថាច្រកទ្វារអន្តរជាតិប៉ោយប៉ែត បានបើកឲ្យដំណើរការវិញហើយនៅពេលនេះ។ ស្ថានភាពបានវិលមករកភាពប្រក្រតីឡើងវិញនេះ កើតមានឡើងបន្ទាប់ពីត្រូវបិទបណ្ដោះអាសន្ន ក្នុងរយៈពេលខ្លីមិនឲ្យមនុស្សធ្វើដំណើរ និងដឹកជញ្ជូនទំនិញឆ្លងកាត់ ដោយការខឹងសម្បារបស់ក្រុមកម្មករដែលពិបាកដឹកឥវ៉ាន់ចូលក្នុងទឹកដីថៃមិនបាន។
បើទោះជាបែបណា តំណាងកម្មករអូសរទេះប្រចាំនៅច្រកទ្វារអន្តរជាតិប៉ោយប៉ែត លោក ហិន រ៉ា ព្រមានថា ការរំសាយនៅពេលនេះ ពុំមែនបានន័យថា បញ្ឈប់ការទាមទារឡើយ តែថា បើកម្មករជាង ១០នាក់ដែលថៃចាប់ខ្លួននោះ នៅតែពុំព្រមដោះលែងទេ ច្រកទ្វារអន្តរជាតិប៉ោយប៉ែតនេះ នឹងត្រូវបិទឡើងវិញភ្លាមដែរ ប្រឆាំងការឃុំខ្លួនកម្មករខ្មែរដោយអាជ្ញាធរថៃបន្តទៀត៖ «បើ១៦នាក់ហ្នឹងមិនយកចេញមកក្នុងរយៈពេល ២ម៉ោងមិនដោះស្រាយនោះទេ យើងនឹងបិទបន្តទៀត»។
ចំណែកអាជីវករដែលលក់ដូរនៅក្នុងផ្សារឡុងគឿ លោក នួន នីគីដា និយាយថា ការធ្វើបាតុកម្មនេះ គឺទាមទារឲ្យរដ្ឋាភិបាលកម្ពុជា ជំរុញឲ្យភាគីថៃ ជួយសម្រួលការនាំទំនិញពីខ្មែរមិនឲ្យមានភាពតឹងរ៉ឹង និងចំណុចទីពីរ គឺស្នើសុំឲ្យអាជ្ញាធរថៃ ដោះលែងកម្មករអូសរទេះជាង ១០នាក់បានត្រឡប់មកលំនៅឋានវិញ។
អ្នកសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តបន្ទាយមានជ័យ លោក ស៊ុំ ច័ន្ទគា ចាត់ទុកថា នេះគឺជាការទទួលខុសត្រូវពីជំនាញពាក់ព័ន្ធរបស់រដ្ឋាភិបាល។
លោកនិយាយថា ក្នុងករណីវិវាទនេះបន្តរីកសាយភាយ បញ្ហាអាចនឹងជះឥទ្ធិពលដល់ការទំនាក់ទំនងរបស់ប្រទេសទាំងពីរ៖ «អាជ្ញាធរគួរតែចាត់ការទៅតាមនីតិវិធីឲ្យបានឆាប់ក្នុងការទំនាក់ទំនងដោះស្រាយអំពីបញ្ហាជម្លោះរវាងខ្មែរនិងថៃ ទាក់ទងទៅលើការខុសប្លែកគ្នាទៅលើទំនិញ។ ទីពីរគាត់គួរតែធ្វើយ៉ាងណាឲ្យបានឆាប់។ ដោះស្រាយទៅលើបញ្ហាខ្មែរ ១៦នាក់ដែលត្រូវបានថៃចាប់យកទៅ»។
គិតចាប់ពីថ្ងៃទី១៤ សីហា មក តម្រួតរបស់ថៃ បានចាប់ខ្លួនកម្មករខ្មែរដែលស៊ីឈ្នួលអូសរទេះចូលក្នុងទឹកដីថៃ រហូតមកដល់ពេលនេះ មានចំនួន ១៦នាក់ហើយ។ ក្រុមបាតុករនិយាយថា ក្នុងពេលតវ៉ានៅមុខច្រកទ្វារអន្តរជាតិប៉ោយប៉ែត កាលពីព្រឹកថ្ងៃទី១៦ សីហា អ្នកធ្វើបាតុកម្មបានប៉ះទង្គិចគ្នាមួយប្រាវជាមួយកងកងរាជអាវុធហត្ថដែលឈរជើងនៅទីតាំងកើតហេតុនោះ។ ប៉ុន្តែពុំបណ្ដាលឲ្យមានរបួសស្នាមទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។