បុរសចំនួន ១៧នាក់ ត្រូវបានអង្គការសង្គមស៊ីវិល សង្គ្រោះពីប្រទេសថៃ ហើយនាំមកផ្ទះវិញនៅស្រុកមណ្ឌលសីមា ខេត្តកោះកុង នៅថ្ងៃទី២៣ កក្កដា បន្ទាប់ពីត្រូវបានមេខ្យល់លក់ ឱ្យទៅធ្វើនៅលើទូកនេសាទក្នុងប្រទេសថៃ កាលពីដើមខែកក្កដា កន្លងទៅ។
ភាគច្រើននៃអ្នកដែលបានសង្គ្រោះនោះ ជាសាច់ញាតិបងប្អូន ពូក្មួយនឹងគ្នា ហើយសុទ្ធតែជាអ្នកដែលរស់នៅក្នុងទឹកខេត្តកោះកុង ផ្ទាល់ ដែលស្គាល់ភូមិសាស្ត្រនៃប្រទេសថៃ ច្រើន។
បុរសវ័យ ៥៧ឆ្នាំ ដែលត្រូវបានគេជួយសង្គ្រោះដែរនោះ លោក សៅ សំណាង ហៅ គា បាននិយាយប្រាប់ថា ក្រុមលោកបានសម្រេចចិត្តចំណាកស្រុកទៅប្រទេសថៃ ព្រោះសង្ឃឹមថានឹងបានទៅធ្វើការនៅលើទូកប្រេង ដែលរកចំណូលបានប្រហែល ៧ពាន់បាត ឬជាង ២០០ដុល្លារអាមេរិក ក្នុងមួយខែ៖ «សម្រាប់ក្នុងឆាកជីវិតខ្ញុំ ពេលដែលឮកូនប្រសាខ្ញុំប្រាប់ថា ប៉ា! គេលក់យើងហើយ ខ្ញុំអស់សង្ឃឹមក្នុងឆាកជីវិត។ ខ្ញុំហួសចិត្ត។ មនុស្សខ្ញុំចំណាស់នេះ ក្បែរហាហើយ ទីបំផុតឱ្យក្មេងឱ្យមនុស្សចំណាស់ប្រហែលខ្ញុំ មកលក់ខ្ញុំបាន ហើយខ្ញុំក៏ធ្លាប់នៅក្នុងអង្គការមិនតិចឆ្នាំដែរ ខ្ញុំអ្នកការពាររឿងអ៊ីចឹងៗ ទីបំផុតត្រូវគេលក់ទៅវិញ»។
ក្នុងចំណោមបុរសទាំង ១៧នាក់នេះ ក៏មានយុវជនវ័យ ១៩ឆ្នាំម្នាក់ដែរ។
អ្នកដែលបានត្រូវគេជួញដូរម្នាក់ទៀត ឈ្មោះ វ៉ា ជីន អាយុ ៣៤ឆ្នាំ បាននិយាយថា រូបលោកសម្រេចចិត្តទៅធ្វើការនៅប្រទេសថៃ ព្រោះរកនេសាទមិនបាននៅស្រុកខ្មែរ ដូច្នេះសង្ឃឹមថានឹងប្រាក់ខ្លះសម្រាប់ផ្ញើមកផ្ទះ និងប្រពន្ធសម្រាប់សម្រាលកូន៖ «ខ្ញុំគ្រាន់តែសំណូមពរថា កុំឱ្យប្រជាពលរដ្ឋយើងហ្នឹង ឱ្យជម្រាបដល់ភូមិឃុំ (មុននឹងចំណាកស្រុក) កុំឱ្យជឿគេអ៊ីចឹង ហើយសំណូមពរដល់អាជ្ញាធរដែនដី ទៅឃាត់ខ្លួនយាយម៉េះ (មេខ្យល់) មួយដែលនាំពួកខ្ញុំទៅ»។
ពលករទាំង ១៧នាក់នេះ ត្រូវបានលក់ឱ្យទូកនេសាទថៃ ក្នុងខេត្តត្រាត ស្ថិតនៅជាប់ខេត្តកោះកុង។ ពួកគេនិយាយថា បើកាលណាត្រូវបានគេលក់ឱ្យទូកនេសាទហើយ នឹងត្រូវធ្វើការនៅលើទូកអស់មួយជីវិត គ្មានថ្ងៃត្រឡប់មកផ្ទះវិញឡើយ ហើយបើកម្មករណាមិនខំធ្វើការ ឬប្រឆាំងនឹងបញ្ជារបស់ថៅកែទូក នឹងត្រូវគេវ៉ៃទម្លាក់ទឹកមិនខានឡើយ ហេតុនេះទើបពួកលោកសម្រេចចិត្តលួចរត់ពីលើទូក ឆ្លៀតពេលដែលទូកអែបចូលច្រាំង ដោយសារមានបញ្ហាបច្ចេកទេស រហូតដល់បានអង្គការសង្គមស៊ីវិលជួយសង្គ្រោះ។
មន្ត្រីសម្របសម្រួលអង្គការសិទ្ធិមនុស្សអាដហុក (Adhoc) ប្រចាំខេត្តកោះកុង លោក នាង បូរ៉ាទីណូ ដែលកំពុងចុះតាមដាន និងសង្គ្រោះពលករទាំងនេះ យល់ថា ករណីបែបនេះវាកើតឡើងភាគច្រើនចំពោះប្រជាជនដែលរស់នៅខេត្តឆ្ងាយៗ។ តែសម្រាប់ករណីនេះ ជនរងគ្រោះ និងមេខ្យល់សុទ្ធតែរស់នៅក្នុងកោះកុង ដូចគ្នា។ ហេតុនេះ លោកសំណូមពរឱ្យអាជ្ញាធរចាប់មេខ្យល់ក្នុងបទល្មើសនេះ មកផ្ដន្ទាទោសតាមច្បាប់៖ «ដូច្នេះ មានតែសូមឱ្យមានវិធានការបន្ទាន់ ព្រោះថា មេខ្យល់ហ្នឹង គាត់នៅទឹកដីកោះកុង នៅឡើយទេ។ អ៊ីចឹង ប្រសិនបើមានវិធានការបន្ទាន់ នឹងអាចចាប់ខ្លួនជនដែលបានលក់ និងជួញដូរ និងបានទាន់ពេលវេលា។ ប្រសិនបើជាមិនមានវិធានការបន្ទាន់ទេ គាត់ (ជនល្មើស) នឹងរត់គេចខ្លួនដូចករណីដទៃៗទៀតហើយ»។
សមាគមសិទ្ធិមនុស្សអាដហុក បានផ្សព្វផ្សាយរបាយការណ៍កាលពីខែកុម្ភៈ កន្លងទៅ បង្ហាញថា នៅឆ្នាំ២០១២ យ៉ាងហោចណាស់មានពលរដ្ឋកម្ពុជា ៤សែននាក់ បានឆ្លងដែនទៅរកការងារធ្វើនៅក្នុងប្រទេសថៃ។
របាយការណ៍នៃកិច្ចប្រជុំគណៈកម្មការចម្រុះកម្ពុជា-ថៃ លើកទី៨ នៅទីក្រុងបាងកក (Bangkok) កាលពីខែធ្នូ ឆ្នាំ២០១២ បានបង្ហាញថា មានកំណើននៃពលករខ្មែរខុសច្បាប់ដែលចូលទៅធ្វើការក្នុងប្រទេសថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។