អ្នកស្រី យូ អយ មានប្រសាសន៍ថា អ្នកស្រីបានស្រាវជ្រាវរកព័ត៌មាននៃការចាប់ខ្លួននេះភ្លាមៗ តែមកទល់ពេលនេះ អាជ្ញាធរថៃ ប្រាប់ថា ពុំមានករណីចាប់ខ្លួននេះទេ៖ «ព័ត៌មាននេះ ខ្ញុំយកចិត្តទុកដាក់ណាស់! ខ្ញុំបានជួបប៉ូលិសទាំងអស់ ម្យ៉ាងទៀត នៅថៃនេះ ខាងក្រសួងការបរទេសគេឲ្យស្ថានទូតទាំងអស់ទាក់ទង ដើម្បីសួរនាំទាក់ទងនឹងសន្តិសុខផ្សេងៗ ហើយរឿងនេះ ខ្ញុំបានសួររកទៅខាងនគរបាលថៃ ថា គ្មានការចាប់ខ្លួនខ្មែរទេ»។
អ្នកយកព័ត៌មានវិទ្យុអាស៊ីសេរី ប្រចាំនៅទីក្រុងបាងកក បានឲ្យដឹងថា កាលពីព្រឹកថ្ងៃទី២ ធ្នូ ទូរទស្សន៍ថៃ ប៉ុស្តិ៍លេខ៣ បានចាក់ផ្សាយការចាប់ខ្លួនជនជាតិខ្មែរពីរនាក់នោះ ដោយចាប់ដាក់រថយន្ត ដោយចោទជនជាតិខ្មែរពីរនាក់នោះថា បានព្យាយាមលួចជ្រៀតចូលកន្លែងធ្វើបាតុកម្ម និងស្វែងយល់ពីស្ថានភាពបាតុកម្មជាក់ស្ដែង ហើយមានបំណងបំផ្លាញពួកបាតុករថៃ។
អ្នកស្រី យូ អយ បន្តថា អ្នកស្រីនឹងទាក់ទងទៅក្រសួងការបរទេសថៃ ដើម្បីសុំទាក់ទងទៅអ្នកដឹកនាំធ្វើបាតុកម្មប្រឆាំងរដ្ឋាភិបាលថៃ សួរព័ត៌មានច្បាស់លាស់បន្ថែមទៀត អំពីករណីចាប់ខ្លួនជនជាតិខ្មែរពីរនាក់នោះឬយ៉ាងណា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។