ព្រះចៅអធិការស្ដីទីវត្តសាមគ្គីរង្សី អំពាវនាវអោយរដ្ឋាភិបាលដោះលែងព្រះសង្ឃខ្មែរក្រោម ២អង្គ ដែលត្រូវចាប់ឃុំព្រះកាយក្នុងពន្ធនាគារព្រៃស ព្រមទាំងបានព្រមានថា នឹងស្វែងរកកិច្ចអន្តរាគមន៍ពីអន្តរជាតិពាក់ព័ន្ធ និងអាចឈានដល់ការប្រមូលផ្ដុំធ្វើបាតុកម្ម និងការទាមទារក្រោមរូបភាពផ្សេងៗទៀត។
ព្រះសង្ឃខ្មែរក្រោម ២អង្គ ព្រះនាម ដាវ ទេព្យ និង ជា វណ្ណដា ត្រូវបានអាជ្ញាធរខណ្ឌពោធិ៍សែនជ័យ ចាប់ព្រះកាយ រួចផ្សឹកកាលពីថ្ងៃទី១ ខែសីហា ហើយតុលាការបញ្ជូនទៅឃុំបណ្ដោះអាសន្ននៅពន្ធនាគារព្រៃស នៅថ្ងៃបន្ទាប់។
ព្រះចៅអធិការស្ដីទីវត្តសាមគ្គីរង្សី ព្រះតេជព្រះគុណ ថាច់ ហាសំអាង មានថេរដីកានៅក្នុងសន្និសីទសារព័ត៌មាននៅព្រឹកថ្ងៃទី១៤ ខែសីហា ថា ព្រះសង្ឃខ្មែរក្រោមទាំង ២អង្គនោះរងនូវការចោទប្រកាន់ដោយអយុត្តិធម៌។ ព្រះអង្គចាត់ទុកការចាប់ព្រះកាយព្រះសង្ឃទាំង ២អង្គថា ជារឿងនយោបាយ ជាការគំរាមកំហែងដល់ព្រះសង្ឃខ្មែរក្រោមដទៃទៀតមិនអោយចេញមុខតវ៉ា ឬចូលរួមសកម្មភាពសង្គមផ្សេងៗ៖ «»។
ព្រះសង្ឃទាំង ២អង្គ ត្រូវបានតុលាការចោទប្រកាន់ពីបទគំរាមសម្លាប់ ការរក្សាទុកគ្រឿងញៀន និងការប្រើប្រាស់លិខិតក្លែងក្លាយ បន្ទាប់ពីអាជ្ញាធរបានឆែកឆេរកុដិរកឃើញម្សៅគ្រាប់ពណ៌សមួយកញ្ចប់ កាំបិតផ្គាក់១ ដាវ១ ដំបង១ ខោទ្រនាប់ប្រុសមិនទាន់ប្រើ២ ខោទ្រនាប់ប្រុសប្រើហើយ ២ និងខោក្នុងរបស់ស្រី១ ស្រោមអនាម័យ១ បៀ១ហ៊ូ ក្រដាសកន្ទុយឆ្នោត ២សន្លឹក ឌីស ២សន្លឹក ទូរស័ព្ទដៃ ៣គ្រឿង និងព្រះឆាយាគណៈមហានិកាយចំនួន១។
ក្រុមអង្គការសិទ្ធិមនុស្សសង្ស័យថា ករណីព្រះសង្ឃទាំង ២អង្គនេះ អាចទាក់ទងនឹងការចូលរួមរបស់ព្រះសង្ឃក្នុងការតវ៉ាទាមទារនៅមុខស្ថានទូតវៀតណាម ប្រចាំកម្ពុជា និងក្នុងសកម្មភាពចុះពិនិត្យបង្គោលព្រំដែនរបស់ព្រះអង្គក្នុងពេលកន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។