ការប្រឡងសញ្ញាប័ត្រមធ្យមសិក្សាទុតិយភូមិ ឬប្រឡងបាក់ឌុបលើកទី២ ចាប់ផ្ដើមហើយនៅព្រឹក ថ្ងៃទី១៣ តុលា។ ក្រសួងអប់រំយុវជននិងកីឡា វាយតម្លៃថាទិដ្ឋភាពទូទៅ នៃថ្ងៃប្រឡងដំបូង បានប្រព្រឹត្តទៅបានល្អ និងធានាបាននូវសន្តិសុខសណ្ដាប់ធ្នាប់ និងរបៀបរៀបរយល្អ នៅតាមមណ្ឌល ប្រឡងទាំង១១៧ ទូទាំងប្រទេស។
ថ្ងៃដំបូងនៃការប្រឡងបាក់ឌុបលើកទី២ ខាងអង្គភាពប្រឆាំងអំពើពុករលួយ បានឃាត់ខ្លួនមនុស្ស ២នាក់ ពាក់ព័ន្ធនឹងបទល្មើសនៃការប្រឡងបាក់ឌុប។
បណ្ដាញសង្គមហេ្វសបុកផ្លូវការរបស់ក្រសួងអប់រំ យុវជននិងកីឡាដែលដកស្រង់ប្រសាសន៍ របស់លោក រស់ សាលីន ជាអ្នកនាំពាក្យឲ្យដឹងថា អង្គភាពប្រឆាំងអំពើពុករលួយ ឃាត់ខ្លួនមនុស្ស ២នាក់ ដែលបានប្រព្រឹត្តបទល្មើស ខណៈការកំពុងប្រឡងបាក់ឌុបលើកទី២កំពុងប្រព្រឹត្តិទៅ ក្នុងនោះមានស្ត្រីម្នាក់ បានយកសំណៅឯកសារទៅលក់នៅមុខសាលាបាក់ទូក ក្នុងរាជធានីភ្នំពេញ និងម្នាក់ទៀតជា យុវជនដែលជាអ្នកសង្កេតការណ៍។
លោក រស់ សាលីន បន្តថាពួកគេទាំងពីរនាក់ត្រូវបានអង្គភាពប្រឆាំងអំពើពុករលួយ នាំខ្លួនភ្លាមៗ ទៅកាន់អង្គភាពប្រឆាំងអំពើពុករលួយ។
ការឃាត់ខ្លួនយុវជនម្នាក់ជាអ្នកអង្កេតការណ៍នេះ អង្គភាពប្រឆាំងអំពើពុករលួយ ក៏បានចេញសេចក្ដី ប្រកាសព័ត៌មានមួយបន្ទាន់ នៅថ្ងៃទី១៣ តុលា ដោយបញ្ជាក់ថាអង្គភាពនេះ សម្រេចដកប័ណ្ណអ្នកសង្កេតការណ៍ពីយុវជនម្នាក់ ឈ្មោះ នូ សុវណ្ណារ៉ា។
យុវជនរូបនេះមកពីអង្គភាពគ្រូពេទ្យស្ម័គ្រចិត្ត ហើយកាលពីសម័យប្រឡងបាក់ឌុបលើកទីមួយ បានប្រើឋានៈជាមន្ត្រីបម្រើការនៅអង្គការច្បាប់កម្ពុជា។
ក្នុងលិខិតដដែលរបស់អង្គភាពប្រឆាំងអំពើពុករលួយ អះអាងថាយុវជន នូ សុវណ្ណារ៉ា បានបំពាន លើសេចក្ដីណែនាំ ស្ដីពីការងារសង្កេតការណ៍ការប្រឡងបាក់ឌុបឆ្នាំ២០១៣-២០១៤ របស់អង្គភាព ប្រឆាំងអំពើពុករលួយ។ បុគ្គលរូបនោះបានឆ្លៀតយកតួនាទីជាអ្នកសង្កេតការណ៍របស់អង្គភាព ប្រឆាំងអំពើពុករលួយ ទៅប្រើប្រាស់ជាអំណាចផ្ទាល់ខ្លួន បំពានលើដំណើរការប្រឡងនិងបាននាំ អង្គរក្សឆ្វេចឆ្វាច ចូលក្នុងមណ្ឌលប្រឡង និងបានទាមទារឲ្យខាងមណ្ឌលប្រឡងត្រូវរៀបចំឲ្យខ្លួន នូវលក្ខណៈពិសេសផ្តាច់មុខជាច្រើន ដែលខ្លួនមិនមានសិទ្ធិ។
អង្គភាពប្រឆាំងអំពើពុករលួយ គិតថាទង្វើរបស់ឈ្មោះ នូ សុវណ្ណារ៉ា មានចេតនាបំផ្លាញនិងធ្វើឲ្យប៉ះ ពាល់ដល់ដំណើរការល្អនៃការប្រឡងបាក់ឌុប។
យ៉ាងណាក្នុងលិខិតរបស់អង្គភាពប្រឆាំងអំពើពុករលួយ មិនបានបញ្ជាក់ថានឹងចាត់វិធានការផ្លូវ ច្បាប់យ៉ាងណា ចំពោះឈ្មោះ នូ សុវណ្ណារ៉ា ទេក្រៅតែពីការព្រមាន និងដកប័ណ្ណបញ្ឈប់ ឲ្យលែងជាអ្នកអង្កេតការណ៍តទៅទៀត។ ចំពោះស្ត្រីម្នាក់ដែលលក់សំណៅឯកសារនោះ ក៏មិនបានប្រកាសថា នឹងចាត់វិធានការយ៉ាងណាដែរ។
យ៉ាងណា ក្រសួងអប់រំយុវជននិងកីឡា វាយតម្លៃថាទិដ្ឋភាពទូទៅ នៃថ្ងៃប្រឡងដំបូង បានប្រព្រឹត្តទៅប្រកបដោយភាពរលូនតាមការគ្រោងទុក និងធានាបាននូវសន្តិសុខសណ្ដាប់ធ្នាប់ និងរបៀបរៀបរយល្អ នៅតាមមណ្ឌលប្រឡងទាំង១១៧ ទូទាំងប្រទេស។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ឲ្យដឹងថាការប្រឡងបាក់ឌុបលើកទី២ នេះ គឺមិនខុសប្លែកពីការប្រឡងលើកទី១ទេ ដោយបេក្ខជនប្រឡងនៅតែបន្តយកសំណៅ ឯកសារចូល ក្នុងមណ្ឌលប្រឡង តែត្រូវគ្រូអនុរក្សដកហូតអស់ និងគ្មានការសូកប៉ាន់ដល់គ្រូជាថ្នូរ បើកអ៊ុតប្រ៊ុយយ៉ុង៖ «ប៉ុន្តែបើយើងកត់សម្គាល់នឹងវិញ្ញាសា មានលក្ខណៈចេញវិញ្ញាសាស្រួលជាងការប្រឡងលើកទី១ នឹងបើតាមការអះអាងដែលខ្ញុំបានសាកសួរបេក្ខជនប្រឡង»។
ពាក់ព័ន្ធនឹងការប្រឡងនេះ បេក្ខជនប្រឡងនៅវិទ្យាល័យទួលស្វាយព្រៃ កញ្ញា អ៊ី ស្រីវី ឲ្យដឹងថា វិញ្ញាសាប្រឡងនៅថ្ងៃដំបូងនេះ ចេញស្រួលជាងការប្រឡងលើកទី១។ នាងមានសង្ឃឹមច្រើនថាអាចនឹងយកជយលាភីក្នុងការប្រឡងលើកនេះឲ្យបាន៖ «គ្រូបន្តឹងនៅក្នុងថ្នាក់ផងនៅក្រៅផង ដូចការប្រឡងលើកទីមួយដែរ តែវិញ្ញាសាលើកនឹងវាស្រួលជាងលើកមុន»។
បេក្ខជនប្រឡងមួយរូបទៀត គិតផ្ទុយពីនេះ យុវជន អ៊ុក វណ្ណណយ គិតថាការប្រឡងបាក់ឌុប លើកទី២នេះ ហាក់មានការរឹតបន្តឹងខ្លាំងជាមុន ហើយវិញ្ញាសាប្រឡងក៏ពិបាកជាងមុនដែរ៖ «និយាយថាមេរៀនគេដាក់ឲ្យរៀននឹងវាសឹងតែរៀនមួយឆ្នាំឡើងវិញ រៀនក្នុងមួយខែរៀនអត់ទាន់ដល់ពេលក្រដាសចេញប្រឡងមានខ្លះស្ទើរតែយើងអត់ចេះ»។
យ៉ាងណាគ្រូអនុរក្សមណ្ឌលប្រឡងវិទ្យាល័យទួលស្វាយព្រៃ លោកស្រី ស៊ឹម ស្រីពៅ មាន ប្រសាសន៍ថានៅតែមានសិស្សមួយចំនួនធំ មិនអាចឆ្លើយនិងធ្វើលំហាត់បាន ដោយសារតែពួកគេ មិនយកចិត្តទុកដាក់ពេលរៀនបំប៉ន។
បេក្ខជនប្រឡងបាក់ឌុបលើកទី២ មានជិត៧ម៉ឺននាក់ និងមាន១១៧មណ្ឌលនៅទូទាំងប្រទេស។ អ្នកសង្កេតការណ៍ជាតិ និងអន្តរជាតិមានសរុបជាង៣ពាន់នាក់។ លទ្ធផលនៃការប្រឡងលើកនេះ នឹងត្រូវប្រកាសនៅថ្ងៃទី៤ ខែវិច្ឆិកាខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។