អាជ្ញាធរនគរបាលខេត្តក្រចេះ បញ្ចប់ការស៊ើបអង្កេតរបស់ខ្លួនក្នុងករណីបាញ់សម្លាប់អ្នកយកព័ត៌មានឲ្យកាសែត "ថ្ងៃនេះ"ហើយ ដោយសម្រេចឃុំខ្លួនមនុស្ស ៣ នាក់ ដែលជាជនសង្ស័យ។ ព័ត៌មានអំពីការចាប់ខ្លួននេះ ត្រូវបានស្នងការរងខេត្តក្រចេះបង្ហាញក្នុងសន្និសីទកាសែតមួយ នៅរសៀលថ្ងៃទី ១៣ តុលា។
អាជ្ញាធរនគរបាលខេត្តក្រចេះ ស៊ើបអង្កេតរកឃើញថាមនុស្ស ៣ នាក់ ដែលកំពុងជាប់ឃុំនៅស្នងការដ្ឋាននគរបាល គឺជាជនសង្ស័យក្នុងករណីបាញ់សម្លាប់ លោក តាំង ទ្រី ជាអ្នកយកពត៌មានឲ្យកាសែត "ថ្ងៃនេះ" កាលពីយប់ថ្ងៃទី ១១ ឆ្លងចូលថ្ងៃទី ១២តុលា ។
ស្នងការរងខេត្តក្រចេះ ទទួលបន្ទុកផ្នែកព្រហ្មទណ្ឌ លោក អ៊ុំ ភី មានប្រសាសន៍ថា ក្រោយបញ្ចប់ការស៊ើបអង្កេត ជនសង្ស័យមានតែ ៣ នាក់ទេ ដែលសុទ្ធតែជាអ្នករកស៊ីឈើ៖ « អ្នកពាក់ព័ន្ធក្នុងរឿងហ្នឹង គឺមាន ៣ នាក់ ម្នាក់ធ្វើសកម្មភាពដោយផ្ទាល់ ម្នាក់ទៀតរួមដំណើរ ម្នាក់ទៀតម្ចាស់អាវុធ។ អ៊ីចឹងរឿងហ្នឹងយើងបានបញ្ចប់ហើយ យើងបានស្រាវជ្រាវអស់ហើយ អត់មាននរណាផ្សេងក្រៅអំពីពាក់ព័ន្ធតែប៉ុណ្ណឹងនាក់ទេ ហើយអាវុធក៏យើងយកបានហើយដែរ ( គឺ ) អាវុធខ្លីធុន កា៥៩ (K-59)» ។
លោក អ៊ុំ ភី បញ្ជាក់ថា អ្នកទាំង៣នាក់នោះ គឺជាមិត្តភក្តិដែលរកស៊ីឈើជាមួយគ្នា។
មន្ត្រីអង្គការការពារសិទ្ធិមនុស្ស អាដហុក ប្រចាំខេត្តក្រចេះ កញ្ញា ហ៊ាន ជាវគណ មានប្រសាសន៍ថា រហូតមកដល់ថ្ងៃទី ១៣ តុលានេះអង្គការនេះនៅមិនទាន់បញ្ចប់ការស៊ើបអង្កេតរបស់ខ្លួននៅឡើយទេ៖ « ដំណាក់កាលនេះ អ្វីដែលសំខាន់ គឺទាក់ទងនឹងករណីឈើ ប៉ុន្តែយើងកំពុងជួបជនរងគ្រោះម្នាក់ទៀត ដែលជាអ្នកនៅក្នុងហេតុការណ៍ហ្នឹង។ ប៉ុន្តែ រហូតមកដល់ពេលនេះ អត់ទាន់បានទទួលព័ត៌មានអីច្បាស់នៅឡើយទេ។ អ្វីដែលសំខាន់ គឺយើងចង់ឱ្យស្ថាប័នមានសមត្ថកិច្ចហ្នឹង បង្កើនសកម្មភាពធានាសុវត្ថិភាព ដល់អ្នកសារព័ត៌មាន ក៏ដូចជាអង្គការក្រៅរដ្ឋាភិបាល ក៏ដូចជាករណីប្រជាពលរដ្ឋដែរ » ។
លោក តាំង ទ្រី ជាអ្នកយកព័ត៌មានក្នុងស្រុក ឈ្មោះថា កាសែតថ្ងៃនេះ ត្រូវជនសង្ស័យបាញ់សម្លាប់កាលពីរំលងអាធ្រាត្រថ្ងៃទី ១១ ឈានចូលថ្ងទី ១២ តុលា នៅភូមិទួលពន្លៃ ឃុំឃ្សឹម ស្រុកស្នួល ខេត្តក្រចេះ។ ការស្លាប់នេះ គឺបន្ទាប់ពីអ្នកកាសែតរូបនេះ និងមិត្តរួមការងារ ចុះទៅយកព័ត៌មានទាក់ទងការដឹកឈើប្រណិតឆ្លងកាត់ឃុំឃ្សឹម ស្រុកស្នួល ខេត្តក្រចេះនោះ។ មានសេចក្ដីរាយការណ៍ឱ្យដឹងថា លោក តាំង ទ្រី ត្រូវបានបាញ់សម្លាប់ក្នុងពេល ដែលឡានរបស់លោកជាប់ផុង។
ក្រុមប្រឹក្សាសារព័ត៌មានកម្ពុជា ដែលមានបណ្ដុំអង្គការសមាគមសារព័ត៌មានជាង ១០ បានចេញសេចក្ដីថ្លែងការណ៍ថ្កោលទោសករណីបាញ់សម្លាប់អ្នកកាសែតរូបនេះ។ ក្រុមប្រឹក្សាសារព័ត៌មានកម្ពុជា ចាត់ទុកករណីនេះថា ជាអំពើដ៏ព្រៃផ្សៃ ដែលប្រព្រឹត្តលើអ្នកកាសែត ហើយស្នើសុំឱ្យមានការផ្ដន្ទាទោសជនល្មើសតាមច្បាប់ឱ្យបានធ្ងន់ធ្ងរ។ សហព័ន្ធអ្នកកាសែតអន្តរជាតិ ហៅកាត់ថា អាយ.អេហ្វ.ហ្សេ (IFJ) ក៏បានចេញសេចក្ដីថ្លែងការណ៍ថ្កោលទោស ចំពោះការបាញ់សម្លាប់នេះដែរ។
ស្នងការរងខេត្តក្រចេះ ទទួលបន្ទុកផ្នែកព្រហ្មទណ្ឌ លោក អ៊ុំ ភី ថ្លែងថាដោយសារខាងនគរបាលមិនទាន់បញ្ចប់នីតិវិធីមួយចំនួន ទើបឃុំខ្លួនជនសង្ស័យទាំង ៣ នាក់នៅស្នងការដ្ឋានជាបណ្ដោះអាសន្នសិន ខាងលោកនឹងបញ្ជូនជនសង្ស័យទាំង ៣ នាក់ទៅតុលាការនៅថ្ងៃទី ១៤ តុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។