កាលពីព្រឹកថ្ងៃទី១២ ខែតុលា ពលរដ្ឋវៀតណាម ៨នាក់ បើកទូក ៤គ្រឿង ចូលមកផ្ទះពលរដ្ឋកម្ពុជា ក្នុងភូមិបន្ទាយស្លឹក ដែលនៅខាងចុងភូមដាច់ឆ្ងាយពីគេ បម្រុងលួចយកលបធំៗ ដែលប្រជាពលរដ្ឋទុកនៅក្នុងផ្ទះ។ ប៉ុន្តែម្ចាស់ផ្ទះដឹងទាន់ ជនជាតិវៀតណាម បានបើកទូករត់។ អ្នកភូមិលើកគ្នាតាមចាប់បាន ៤នាក់ ហើយយកទៅដោះស្រាយនៅផ្ទះមេភូមិ។
យ៉ាងហោចណាស់ជនជាតិវៀតណាម ចំនួន ៤នាក់ ក្នុងចំណោម ៨នាក់ និងទូក ២គ្រឿង ត្រូវប្រជាពលរដ្ឋនៅឃុំជ័យជោគ ស្រុកបូរីជលសារ ខេត្តតាកែវ ព័ទ្ធចាប់ ហើយបញ្ជូនទៅផ្ទះមេភូមិបន្ទាយស្លឹក ខណៈក្រុមជនជាតិវៀតណាម បើកទូក ៤គ្រឿង ចូលមកប្លន់យកលបដាក់ត្រីនៅផ្ទះលោក ស ឫទ្ធី ដែលជាសកម្មជនគណបក្សសង្គ្រោះជាតិ។
រឿងហេតុនេះបានកើតឡើងកាលពីព្រឹកថ្ងៃ១២ ខែតុលា ក្រោយជនជាតិវៀតណាម ៨នាក់ ជិះទូក ៤គ្រឿង ចូលមកក្នុងទឹកដីកម្ពុជា ប្រមាណ ១០គីឡូម៉ែត្រ ដើម្បីមកដកយកលបពីផ្ទះសកម្មជនគណបក្សសង្គ្រោះជាតិម្នាក់ ឈ្មោះ ស ឫទ្ធី ដែលគាត់បានទុកដាក់នៅក្នុងផ្ទះ។
លោក ស ឫទ្ធី ឲ្យដឹងថា កាលពីម៉ោង ៨កន្លះ ព្រឹកថ្ងៃសៅរ៍ ជនជាតិវៀតណាម ៨នាក់ បានបើកទូក ៤គ្រឿង មកបំបុកផ្ទះគាត់។ ក្រោយពីឮសន្ធឹកទូក គាត់និងអ្នកភូមិចេញមកមើល ឃើញជនជាតិវៀតណាម កំពុងលើកលបរបស់គាត់។ គាត់បានសាកសួរ ស្រាប់តែពួកគេបើកទូករត់ ទើបអ្នកភូមិស្កាត់ចាប់បានទាំងទូក ទាំងមនុស្ស។ អ្នកភូមិចាប់ពួកនោះបញ្ជូនទៅផ្ទះមេភូមិបន្ទាយស្លឹក ដើម្បីដោះស្រាយ។
លោក ស ឫទ្ធី៖ «វាបានសម្រុកចូលទាំង ៤ទូកមែន តែក្នុងគោលបំណង វាបាត់លបរបស់វា ហើយមានអ្នករាយការណ៍ថាខ្ញុំលួច។ តែពេលវាមកដល់ផ្ទះខ្ញុំ របស់ដែលវាឃើញគឺមិនមែន។ អ៊ីចឹងគឺវាបានសារភាពថា វាបានសម្រុកចូលផ្ទះខ្ញុំមែន ហើយរបស់ដែលបានមើលនោះ មិនមែនជារបស់វាទេ។ ឥឡូវវាបានសុំទោស ហើយវាបានសុំឲ្យអាជ្ញាធរជួយសម្រុះសម្រួល។ ខាងថ្នាក់ឃុំនិងភូមិ គាត់ថាឥឡូវបើវាសារភាពហើយ មិនបាច់ដាក់បណ្ដឹងទៅណាទេ គាត់សម្រុះសម្រួលឲ្យតែសុំឲ្យខាងភាគីវៀតណាម សងជំងឺចិត្ត ការដែលវាចោទខ្ញុំថាចោរ»។
មេភូមិបន្ទាយស្លឹក លោក នួន ក្រិល មមាញឹកក្នុងការធ្វើកំណត់ហេតុ និងសម្របសម្រួលរវាងប្រជាពលរដ្ឋក្នុងភូមិ និងជនជាតិវៀតណាម។ លោកមិនមានពេលធ្វើអត្ថាធិប្បាយនៅរសៀលថ្ងៃ១៣ ខែតុលា ទេ៖ «តែឥឡូវហ្នឹងវាដាក់កំហុសវាហើយ»។
ជំទប់ទី២ ឃុំជ័យជោគ លោក កែវ គីម បានថ្លែងថា កន្លងមកជនជាតិវៀតណាម តែងតែបំពានការរស់នៅរបស់ពលរដ្ឋកម្ពុជា និងមករកលួចឧបករណ៍នេសាទរបស់ប្រជាពលរដ្ឋកម្ពុជា ដោយគ្មានញញើតច្បាប់ ទើបអាជ្ញាធរភូមិនិងឃុំ សុំឲ្យជនជាតិវៀតណាមនោះ ទទួលខុសត្រូវមុខច្បាប់នៃប្រទេសកម្ពុជា។ ប៉ុន្តែខាងវៀតណាម នៅតែមិនសារភាព ហើយសុំរួចខ្លួន និងសុំទូកត្រឡប់ទៅប្រទេសគេវិញ ទើបមេភូមិសុំឲ្យអាជ្ញាធរវៀតណាម មកដោះស្រាយ ដោយបានឲ្យស្ត្រីជាភរិយាជនជាតិវៀតណាម ទាំង ៤នាក់ យកទូក ២គ្រឿង ទៅហៅអាជ្ញាធរវៀតណាម និងយកលិខិតបញ្ជាក់សញ្ជាតិ ដើម្បីកត់ក្នុងកំណត់ហេតុ និងដាក់កិច្ចសន្យាហាមគុំកួន៖ «ដើម្បីលែងស្ត្រីដែលជាប្រពន្ធវាមកយកត្រីយកអីហ្នឹងឲ្យទៅនៅ ទុកតែ ៤នាក់ទេ»។
ការដោះស្រាយបញ្ហាកើតឡើងរវាងប្រជាពលរដ្ឋខ្មែរនិងជនជាតិវៀតណាម នៅផ្ទះមេភូមិអស់រយៈពេល ២ថ្ងៃ ទើបជនជាតិវៀតណាម ព្រមសារភាពកំហុស ហើយព្រមបង់ប្រាក់ ១លានរៀលមកអាជ្ញាធរខ្មែរ ដើម្បីសងជំងឺចិត្តដល់លោក ស ឫទ្ធី ដែលជនជាតិវៀតណាម ចូលមករំលោភការរស់នៅរបស់គាត់។
លោក ស ឫទ្ធី ឲ្យដឹងថា បានជាជនជាតិវៀតណាម ចេញចូលមកកម្ពុជា ស្រេចចិត្ត ហើយហ៊ានលុកលុយផ្ទះគាត់ មកពីផ្ទះគាត់នៅដាច់ឆ្ងាយពីគេ និងនៅជិតឡូត៍នេសាទ។ លោកថា ឡូត៍នេសាទដែលនាយករដ្ឋមន្ត្រីបានកាត់មកឲ្យប្រជាពលរដ្ឋខេត្តតាកែវ រកនេសាទ បែរជាអាជ្ញាធរឃុំ ស្រុក បើកដៃឲ្យជនជាតិវៀតណាម ចូលនេសាទត្រីក្នុងឡូត៍ទាំងអស់ស្រេចចិត្តក្នុងទឹកដីកម្ពុជា ហើយមកបង្កជម្លោះជាមួយប្រជាពលរដ្ឋកម្ពុជាថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕