សិស្សស្រីចំនួន ៥នាក់នៃវិទ្យាល័យ ជា ស៊ីម ត្បែងមានជ័យ ក្នុងទីរួមខេត្តព្រះវិហារ បានសន្លប់បន្តបន្ទាប់គ្នានៅព្រឹកថ្ងៃពុធ ទី៣ ខែកុម្ភៈ ដោយសារតែភ័យតក់ស្លុតនឹងសំឡេងផាវប្រភេទធំផ្ទុះលាន់ឮខ្លាំង ដែលក្រុមក្មេងស្ទាវបានដុតនៅក្បែរនោះ។
អ្នកសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ គឺលោក ឡោ ចាន់។ លោកមានប្រសាសន៍នៅព្រឹកថ្ងៃពុធ ទី៣ ខែកុម្ភៈ ថា សិស្សស្រីចំនួន ៥នាក់នៃវិទ្យាល័យ ជា ស៊ីម ត្បែងមានជ័យ បានសន្លប់បន្តបន្ទាប់គ្នា ហើយត្រូវបញ្ជូនទៅកាន់មន្ទីរពេទ្យដើម្បីជួយសង្គ្រោះបន្ទាន់ ដោយសារតែភ័យតក់ស្លុតនឹងសំឡេងផាវផ្ទុះលាន់ឮខ្លាំង។
លោក ឡោ ចាន់ បញ្ជាក់ថា បន្ទាប់ពីមានហេតុការណ៍សិស្សស្រីសន្លប់ គឺប៉ូលិសនៃស្នងការដ្ឋាននគរបាលខេត្តព្រះវិហារ បានចាប់ខ្លួនយុវជន ២នាក់ជាអ្នកដុតផាវធុនធំបង្កឲ្យផ្ទុះខ្លាំងនោះ យកទៅសាកសួរ។
ប៉ូលិសបានប្រមូលយកបំពង់ផាវធំៗដែលសេសសល់ពីការផ្ទុះឆេះ យកទៅជាមួយផងក្នុងពេលចាប់ខ្លួនយុវជនទាំងពីរនាក់នោះ ក៏ប៉ុន្តែរហូតមកដល់ពេលនេះ គេនៅមិនទាន់ដឹងថា តើប៉ូលិសនឹងចោទប្រកាន់យុវជនដែលជាអ្នកដុតផាវឲ្យផ្ទុះលាន់ឮខ្លាំងដែរ ឬក៏យ៉ាងណាទេ?៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។