យ៉ាងហោចណាស់ប្រជាពលរដ្ឋ ៥នាក់ បានរងរបួសធ្ងន់ និងស្រាល នៅឯឃុំកំពង់ភ្លុក ស្រុកប្រាសាទបាគង កាលពីព្រឹកព្រលឹមថ្ងៃសៅរ៍ ទី២៧ ខែមិថុនា ដោយសារតែប្រជាពលរដ្ឋ ២ក្រុម បានប៉ះទង្គិចគ្នាក្នុងរឿងដណ្ដើមគ្នាបង្កើតសមាគមកាណូត និងទូកអុំ ដើម្បីលក់សំបុត្រ និងដឹកភ្ញៀវទេសចរទស្សនាបឹងទន្លេសាប។
ការប៉ះទង្គិចគ្នាដោយប្រើដុំឥដ្ឋ និងដាវសាំម៉ូរ៉ៃខ្លះផង បានកើតឡើងនៅពេលដែលអាជ្ញាធរឃុំកំពង់ភ្លុក និងស្រុកប្រាសាទបាគង រៀបចំឱ្យប្រជាពលរដ្ឋក្នុងឃុំកំពង់ភ្លុក និងឃុំមានជ័យ ធ្វើការបោះឆ្នោតជ្រើសរើសតំណាងសហគមន៍កាណូត និងទូកអុំ ដឹកភ្ញៀវទេសចរ ក៏ប៉ុន្តែមានប្រជាពលរដ្ឋចម្រុះប្រមាណ ១០០នាក់ ដែលរស់នៅតំបន់ផ្សេង បានលើកគ្នាទៅអុកឡុកបង្ខំឱ្យលុបចោលការបោះឆ្នោតនោះ។
ក្រុមអ្នកតវ៉ាដែលគេដឹងថា មានមនុស្សនៅពីក្រោយខ្នង ហើយដឹកជញ្ជូនមកពីច្រើនកន្លែងដូចជាមកពីតំបន់ទន្លេសាបចុងឃ្នៀស ក្រុងសៀមរាប ភូមិពាមតាអួ ស្រុកពួក និងឃុំកំពង់ឃ្លាំង ស្រុកសូទ្រនិគម ព្រមទាំងមានអ្នកកំពង់ភ្លុក តិចតួចផង បាននាំគ្នាលើកបដាប្រឆាំង និងអាជ្ញាធរខេត្តសៀមរាប ប្រឆាំង និងអ្នកតំណាងរាស្ត្រសៀងណាំ ព្រមទាំងស្រែកទាមទារឱ្យរំលាយចោលការបោះឆ្នោតជ្រើសរើសតំណាងសហគមន៍ការណូត និងទូកអុំ ដឹកភ្ញៀវទេសចរទស្សនាទន្លេសាបនៅឃុំកំពង់ភ្លុក នោះវិញ។
សំឡេងស្រែកតវ៉ារួម៖ «រំលាយការបោះឆ្នោតចោល ព្រោះតែច្បាប់មិនមានប្រសិទ្ធភាព បក្សពួកនិយម អត់មានការយល់ព្រមពីប្រជាពលរដ្ឋ ពួកខ្ញុំអត់ឱ្យបោះឆ្នោតបានទេ»។
អភិបាលរងខេត្តសៀមរាប ដែលទៅឃ្លាំមើលការបោះឆ្នោតជ្រើសរើសតំណាងសហគមន៍កាណូត និងទូកអុំ ដឹកភ្ញៀវទេសចរកំពង់ភ្លុក លោក ប៊ុន ថាឫទ្ធិ បានហៅប្រជាពលរដ្ឋ ១ក្រុមដែលស្រែកទាមទារនោះថា បានលើកគ្នាទៅឆាឆៅអ្នកកំពង់ភ្លុក មិនឱ្យបង្កើតសហគមន៍កាណូត និងទូកអុំដើម្បីទទួលកម្រៃពីទេសចរនៅតំបន់នោះកើតឡើងតាមរយៈការបោះឆ្នោតបាន។ អាជ្ញាធរខេត្តសៀមរាប សុខចិត្តផ្អាកការរៀបចំការបោះឆ្នោតនេះមួយរយៈ ហើយព្យាយាមដោះស្រាយបញ្ហាប្រឈមមុខដាក់គ្នារវាងប្រជាពលរដ្ឋទាំងពីរក្រុមនោះ ឱ្យស្ងប់ស្ងាត់ជាមុនសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។